Read lango Tic Okwena 9 Bible Online

Tic Okwena 9 - lango bible

Tic Okwena 9

¹Caulo kun pwod olido kop me buro kede neko jo a lubo Rwot, en owoto baŋ alamdog adwoŋ.

²En te kwayo waraga pi kacokere luŋ ame tye i Damaciko, ame mie twer me kelo dano moro keken me Yo man, ame ebino nwoŋo, co onyo mon; myero etwegi, ekelgi i Jerucalem.

³I kare ame en tye i wottere-nono, kun doŋ eceggi tuno i Damaciko, oyotoyot acara moro te ya i polo, omenye kun otwode dyere.

⁴En te rette piny, eka te winyo dwon ŋattoro ame penye ni, “Caulo, Caulo, pi ŋo kara itye ka wuna?”

⁵En ogamo ni, “Kara yin iŋa, Rwot?” Te dokke ni, “An a Yecu en ame yin giri itye ka wuno-nono.

⁶Ya malo me idony i boma, obino kobbi gin a myero itim.”

⁷Jo a rik onwoŋo owoto kede ocuŋ kun oliŋ iti. Gin owinyo dwon, cite mom oneno ŋattoro.

⁸Caulo oya malo, waŋe te yabere, ento mom te neno piny. Ka doŋ ote mako ciŋe, peye tere i Damaciko.

⁹Eka te tyeko nino adek kun mom neno piny, mom cemo, kadi mato pii.

¹⁰Dano moro a lubo Yecu rik onwoŋo tye i Damaciko, nyiŋe Anania. Rwot rik te kop kede i ginanyuta ni, “Anania.” En te ye ni, “An ene, Rwot.”

¹¹Rwot te kobbe ni, “Ya iwot i yo ame olwoŋo ni Ocuŋ Atira, ite penyo pi dano moro me Taruco ame nyiŋe Caulo ka tye i ot a Juda, pien, nen ba, en tye akwayo Obaŋa.

¹²Dok en doŋ otyeko neno i ginanyuta, dano moro a nyiŋe Anania kun tye adonyo baŋe, pi keto ciŋe i kome me enen piny.”

¹³Anania te gamo ni, “Rwot, awinyo doŋ i baŋ jo apol kit ame dano-nono owuno kede joni a tye i Jerucalem.

¹⁴Anaka kan daŋ olamdog adoŋo doŋ otyeko miye twer me tweyo jo luŋ ame lwoŋo nyiŋi.”

¹⁵Cite Rwot te kobbe ni, “Yin woti, pien lonnono en gi-ticca ame ayero me tero nyiŋa baŋ Orok, kede baŋ rwode kede ikwae Icrael.

¹⁶Pien an ikoma abino nyutte kit can ducu a myero ekany pira.”

¹⁷Anania te wot donyo i ot, te keto ciŋe i kome kun kobo ni, “Ominna Caulo, Rwot Yecu ame onwoŋo onen baŋi i yo a rik ibino kede ca, doŋ oora baŋi me waŋi dok nen piny, kede Cuny Acil daŋ poŋ iyii.”

¹⁸Cucuttono ginnoro acalli pok rec te poto i waŋe, eka waŋe te dok cako neno piny. En oya te batijia,

¹⁹daŋ te cem, te doŋ nwoŋo teko. En rik koŋ te bedo kede jo a lubo Yecu ame onwoŋo tye i Damaciko pi kare moro,

²⁰daŋ te ero rabo kop i kom Yecu oko oyotoyot i kacokere luŋ kun kobo ni, “En Wot Obaŋa.”

²¹Jo ducu ame owinyo koppere te wuro meicel, kun okobo ni, “Man mom en lon a rik mito tyeko jo ame olwoŋo i nyiŋ man i Jerucalem? En obino kan daŋ pi kop acellono, me etwe jo-nono, etergi baŋ olamdog adoŋo.”

²²Ento Caulo gire te medde ameda i teko, Ojudaya a rik bedo i Damaciko wigi te cuŋ oko, ka en onyuto atir ni Yecu gire en Kricito.

²³Ame kare doŋ okato alalac, Ojudaya rik te yiko kop me neko Caulo,

²⁴cite en te ŋeyo yikgi oko. Gin rik ote bedo kuro dogcel dyeceŋ kede iwor benebene me oneke;

²⁵ento jo a lubo Yecu rik te tere oko dyewor, ore cwaye oko i kan a twolo i apama cel, kun omie elyerre i dwoŋo naka piny.

²⁶Ame en doŋ otuno i Jerucalem, te poro notte kede olub Yecu, cite gin luŋ rik ote lwore oko, mom oye ni en daŋ alub Yecu.

²⁷Cite Baranaba ojole, okele baŋ okwena, te tittigi kite a Caulo oneno kede Rwot i waŋayo, kede kite ame okobo kede, naka kite ame en orabo kede kop i nyin Yecu i Damaciko i tekcuny.

²⁸Caulo te bedo wowota i akinagi i Jerucalem, kun rabo kop i nyiŋ Rwot kede tekcuny.

²⁹En okobo i jo a kobo leb Grik kun pyem kedgi, cite gin oyenyo yo me neke.

³⁰Ka omego oŋeo, gin te tero Caulo oko i Kaicaria, ote cwaye Taruco.

³¹Amannono lwak jo oye Kricito te bedo i kuc i lobo Judaya luŋ kede i Galilaya kede i Camaria, te medde doŋo; ote daŋ nya kun owopo yo me woro Obaŋa, dok Cuny Acil kweo cunygi.

³²I kare ame Petero owowota i dul lobo luŋ, en te tuno baŋ jo Obaŋa ame onwoŋo bedo i Ludda.

³³En rik te nwoŋo lo moro ame nyiŋe Ainea kuno, ame otyeko mwakki aboro kun buto abuta, pien rik onwoŋo kome okwe oko.

³⁴Petero te kobbe ni, “Ainea, Yecu Kricito ocaŋi oko. Ya malo, ipet ka butoni.” En daŋ te ruyo ya oko.

³⁵Jo a rik bedo i Ludda kede Caron onene, eka gin te lokere baŋ Rwot.

³⁶I Yopa rik onwoŋo tye iye dako moro a lubo Yecu nyiŋe Tabica, ame te koppere ni, Dorika[1]. En rik onwoŋo tio tic abeco apol, dok konyo ocan i yo apapat.

³⁷I kare-naca too rik obin omake, eka te to oko. Rik ote lwoko kome, pyele i ot a malo.

³⁸Pien Ludda onwoŋo ceggi kede Yopa, jo a lubo Yecu rik te winyo ni Petero tye kuno, omio gin te oro jo aryo baŋe, kun okwae ni, “Tun baŋwa oyotoyot, kur igal.”

³⁹Petero te ya wot kedgi, A doŋ en otuno, otere i ot a malo. Mon luŋ ame coggi oto onwoŋo ocuŋ i laŋete, okoko kun onyuto boŋi kede rukkogo ame rik Dorika okwoo a nwaŋ pwod tye baŋgi.

⁴⁰Petero te cwayogi ducu oko, eka te rumo piny kwayo Obaŋa; te lokere tuŋ kom oto kun kobo ni, “Tabica, ya malo.” En te yabo waŋe; ka oneno Petero, oya obedo abeda.

⁴¹Petero te mako ciŋe, yiye malo, te lwoŋo jo Obaŋa kede mon a coggi oto, omie baŋgi kun doŋ kwo.

⁴²Koppere rik te ŋeye i Yoppa ducu, te miyo jo apol ye Rwot.

⁴³Petero te bedo i Yoppa nino apol tuŋ anyoŋ-lao a nyiŋe Cimon.