Read lango Jo Roma 1 Bible Online

Jo Roma 1 - lango bible

Jo Roma 1

¹Waraga man oya i baŋ Paulo, amiro a Kricito Yecu ame olwoŋo me bedo akwena, ote pokoro pi tic me rabo amut aber ame oya i baŋ Obaŋa.

²Amut man aber Obaŋa nwaŋ ociko pire con i dog odwarpinnyere i coc acil a rik ocoo,

³en amut aber i kom Wode. I kite me kom rik onywale i kom ikwae a Daudi,

⁴ento pi Cuny Acil Obaŋa rik onyuto ni en obedo Wode i tic atek me cerrere iyi akina a jo oto, en Yecu Kricito Rwotwa.

⁵Pire wan doŋ onwoŋo winyo Obaŋa, kede kwena me miyo jo i akina rok luŋ miye me lubo iyee, pi nyiŋe;

⁶ame wun daŋ itye wunu i akinagi, wun jo ame olwoŋowu ibedo jo a Yecu Kricito.

⁷Baŋ wun jo luŋ a tye i Roma ame Obaŋa marowu, ame daŋ olwoŋowu me bedo jo mere ikome: Obaŋa Papawa kede Rwotwa Yecu Kricito miwu winyo kede kuc.

⁸Me agege, an apwoo Obaŋana i Yecu Kricito, pien iyee mewu doŋ orwo i wi podo luŋ.

⁹Obaŋa ame aworo i cunya kun arabo amut aber i kom Wode, en cadenna ni atuco nyiŋwu i kwacca baŋe me kare luŋ, kun mom aweko.

¹⁰Akwao ni, ka twerre, ka Obaŋa oye, oyabba yo, ol abino tuno baŋwu.

¹¹Pien aparo nenowu, me apokkiwu mottoro me ibed wunu atek;

¹²onyo kono akob ni, me idi wunu cunya kede iyeewu, an daŋ adi cunywu kede iyee mera.

¹³Gin amito iŋe wunu, omegona, onwoŋo abedo ka tamo tyen apol ni koŋ atun baŋwu, me atot anwoŋ jo mogo ame oya i akinawu, kite ame anwoŋo kede jo ame oya i rok ocele, ento anaka atot onyoni pwod ogeŋa oko.

¹⁴Atye kede banya baŋ jo aŋeo leb Grik, kede baŋ jo a kwia, baŋ oryeko kede baŋ omiŋo;

¹⁵en omio atye kede mit adwoŋ me rabo amut aber anaka atoŋ baŋwu, wun jo a bedo i Roma.

¹⁶An lewic mom maka i amut aber, ame kono en teko Obaŋa me laro jo a tye kede iyee, me agege Ojudaya, eka jo Grik daŋ.

¹⁷Pien amut aber nyuto kite ame Obaŋa kwano kede dano ni kite atir, kun cakere i iyee; tum daŋ i iyee; acalo yam ocoo ni, “Dano ame kite atir pi iyee bino bedo kwo.”[1]

¹⁸Pien akemo Obaŋa doŋ onyuto iya i polo i kom tim a jo areco luŋ a mom woro Obaŋa, ame tye a geŋo kop ateni i tic, pi timgi areco.

¹⁹Pien gin a twero ŋeye i kom Obaŋa onen oko kannaler baŋgi, Obaŋa doŋ onyuttigi.

²⁰Cakere ame oketo lobo, kite mere a mom nen doŋ onen, kun ŋeye i kom jami a en otio, en teko mere a mom gik, kede epone mere en Obaŋa. Mio gin a gin pid loogi oko;

²¹pien kadi rik gin oŋeo Obaŋa, nwaŋ mom gin oketo kwogo i kome acalo Obaŋa, kadi pwoye, ento tam megi olunyo dwokogi ka i gin a yore mom, kede tam i cunygi me miŋomiŋo doŋ odoko acol oko.

²²Gin olwoŋere kengi ni gin oryeko, kara bo gin olokere odoko omiŋo.

²³Gin oloko kwogo Obaŋa a mom to, kun oporo kede cal a dano ame to, onyo kede mea winyi, onyo mea leyi, onyo mea twole-gu.

²⁴En omio Obaŋa te jwaŋogi i mit areco a tye i cunygi me caro, me obal kede kwogo me komgi kengi kengi.

²⁵Gin oloko kop ateni i kom Obaŋa, owilo kede goba, kun oworo dok otio baŋ ginaketa, aka woro kede tic baŋ ŋat oketogi, ame opwoo nakanaka. Amen.

²⁶Pi kop man, Obaŋa ojwaŋogi i agoma yie me lewic. Anaka mongi oweko bedo i co i kite me anywalli, ote dwoko kan a mom oyiko.

²⁷Co daŋ amannono oweko bedo i mon i kite me anywalli, mitgi te waŋogi bala mac, ŋat man kede awottere, kun co timo gin me lewic i kom co wadgi, a kun adwoggi a myero pi balgi lunyo mako komgi kengi.

²⁸Doŋ acalo gin mom oneno konnyoro i ŋeyo Obaŋa, Obaŋa daŋ ojwaŋogi i tamgi a konnyere mom, me gin doŋ tim gin a mom myero.

²⁹Gin rik opoŋ kede kwone bal apol luŋ, timmogo areco, woro me lim, rac cuny. Gin opoŋ i nyeko, nek, daa, goba, colcuny. Gin okwoto jo,

³⁰oyeto jo, okwedde kede Obaŋa. Gin opala, jo a yon, a wakere, ame roto kit areco anyen, jo a mom winyo onywalgi,

³¹jo a kwia piny, ape gwoko cikeregi; mar mom i yigi, mom otye i kica.

³²Jo-nu niaŋ aber i cik Obaŋa, ni, jo a timo kodi timmono romo to, cite pe gin otio atia keken, ento dok opwoo daŋ jo ame tio.