Read lango Jo Roma 10 Bible Online

Jo Roma 10 - lango bible

Jo Roma 10

¹Omegona, gin ame amito i cunya ducu, ame akwao Obaŋa pire, en ene ni, jo Icrael myero olarre.

²An abedo cadengi ni, gin omoko atek i kom Obaŋa, cite mokogi-ni mom ocuŋ i ŋec ikome.

³Onwoŋo gin mom oŋeo kit ame Obaŋa kwano kede dano ni kite atir, omio gin otemo moko ni kitegi atir pirgi kengi, mom omiye i kodi kite atir ame Obaŋa mio.

⁴Pien cik doŋ ogik i Kricito, me wek jo luŋ ame ye en okwan ni kitegi atir.

⁵Muca rik ocoo ni, dano ame tio tic atira ame cik mito, bino kwo pire.

⁶Cite kite atir ame omio pi iyee kobo aman, ni, “Kur ikob keni keni ni, ‘Ŋaa bino yito malo i polo?’ (ni, me kela Kricito piny),

⁷onyo ni, ‘Ŋa bino donyo piny i bur ame agikki tere mom?’ ” (ni, me omo Kricito oko iyi akina a jo oto).

⁸Kara kobo niŋo? En kobo ni, “Kop-pi doŋ tye ceggi kedi, tye i dogi kede i cunyi,” en kop i kom iyee ame wan orabo.

⁹Pien ka ituco giri i dogi ni, “Kricito en Rwot”, a kun iye giri i cunyi ni Obaŋa ocere oko iyi akina a jo oto, ibino larre.

¹⁰Pien dano ye i cunye, en a mio ote kwane ni kite atir; en tuco i doge, en a mio Obaŋa te lare.

¹¹Pien coc a yam ocoo okobo ni, “Ŋat ame oye en, lewic mom bino make.”

¹²Mom tye apokapoka moro i akina Ojudaya kede jo Grik; gin ducu Rwotgi acel, en daŋ poko lonyo mere baŋ jo luŋ ame kok baŋe.

¹³Rik ocoo ni, “Jo ducu ame lwoŋo nyin Rwot bino larre.”

¹⁴Kara gin bino kok baŋe i kittene, ame mom ru gin oye en? Kede dok otwero ye en nino, ka mom owinyo kop i kome? Gin otwero winyo kop i kome niŋo ka ŋat a rabbigi mom?

¹⁵Jo twero rabo kop iŋo ka mom oorogi? Acalo yam ocoo ni, “Tyengi beco a rom mene, jo ame rabo amut aber!”

¹⁶Ento mom gin luŋ ogamo amut aber; pien Icaya rik okobo ni, “Rwot, ŋa oye kop ame wan otito?”

¹⁷Kakare, iyee bino pi winyo kop ame otito, kop ame owinyo bino pi rabo kop i kom Kricito.

¹⁸Ento an koŋ apenyo ni, “Kara gin yam pe owinyo bo?” Gin owinyo gigi, acalo okobo i jabuli ni, “Dwongi owinyere i wi podo luŋ; kop a gin okobo otuno i agikki piny.”

¹⁹An dok apenyo ni, “Jo Icrael rik gin mom oniaŋ?” Muca en ame ogeo gamo kop, ni, “Abino miyo nyeko makowu i kom jo a gin mom rok ikome, abino miyo akemo makowu i kom rok amiŋ.”

²⁰Icaya dok cunye tek akato kun kobo ni, “Jo a yam mom yenya doŋ onwoŋa, doŋ anen kannaler baŋ jo a nwaŋ pe penyo pira.”

²¹Ento i kom jo Icrael en okobo ni, “Ceŋ aryeo ciŋa dyeceŋ benebene baŋ jo a mom winyo doga, jo a pyem keda.”