Read lango Jo Roma 11 Bible Online

Jo Roma 11 - lango bible

Jo Roma 11

¹Doŋ apenyo ni, “Obaŋa doŋ okwero jo mere oko?” Mom amanno gire. An ikoma daŋ an dano me Icrael, akwar Iburaim, me i atekere a Benjamin.

²Obaŋa mom okwero jo mere a yam en oŋeogi con. Mom iŋeo wunu kop ame coc a yam ocoo okobo i kom Elia, kite a en obako kede doge baŋ Obaŋa i kom jo Icrael ni,

³“Rwot, odwarpinynyi doŋ oneko oko, omuko keno me lam-gu oko; an kena a pwod adoŋ, daŋ omito neka oko.”

⁴Cite Obaŋa rik odok iye niŋo? Ni, “An pwod aweko odoŋ baŋa co tutumia abiro ame mom ru orumo coŋgi i nyim Baal.”

⁵En i kite acellono tye jo mogo ame odoŋ ame Obaŋa oyerogi pi kica mere.

⁶Aco ka oyerogi pi kica, pe nwoŋo doŋ ocuŋ i kom tic a gin otio; kono ocuŋ i kom tic, kica kono doŋ mom dok kica.

⁷Kara ŋo doki? Gin ame jo Icrael oyenyo, pe onwoŋo. Jo ame oyerogi keken onwoŋo, cite jo ocele cunygi odoko nwaŋ,

⁸acalo rik ocoo ni, “Obaŋa omiogi cuny ame odil, omio waŋgi mom neno, yitgi daŋ mom winyo, anaka ceŋ tin.”

⁹Daudi daŋ okobo ni, “Mi mejagi me cem dok kumma kede owic, obed gin a miogi rette, pi culo waŋ balgi.

¹⁰Mi waŋgi dok acol me kur onen piny; mi pyergi kudde atwal.”

¹¹An doŋ apenyo ni, “Jo Icrael rik otwomere wek orette meicel bo?” Mom amannono gire! Pi balgi omio larre, doŋ obino baŋ Orok, me nyeko mak jo Icrael.

¹²Ka balgi okelli lobo lonyo, dok ka potogi okelo lonyo baŋ Orok, berre bino bedo rom mene ka gin ducu odwogo iweŋ?

¹³Aman akop kedwu, wun Orok. Doŋ acalo an gira akwena baŋ Orok, adworo ticca,

¹⁴me gwok onyo ami nyeko mak jo me rokka, me atot ya alar jo mogo i akinagi.

¹⁵Pi bologi oko omio Obaŋa odwoggo lobo luŋ baŋe; kara ka doŋ ogamogi, bino kela ŋo? Mom bino bedo calo kwo oya i akina jo oto?

¹⁶Ka doŋ oyoko moko kwon an ok me wi mwaka, moko luŋ nwoŋo doŋ cil; ka lwit yat cil, jaŋe daŋ doŋ cil.

¹⁷Tye acalo oturo jaŋe mogo i kom yat jeituni aber, eka ote jako jaŋ yat jeituni moro me tim, ote como kakargi me mok i tyen yat aber ca, eka te nywako waya pige amio ame ya i lwite. Jaŋ yat ame ojako i tim en yin;

¹⁸cite kur iwakere i kom jaŋe ocele ca. Kadi bed iwakere, pe yin ame itiŋo lwite, lwite en a tiŋi.

¹⁹Yin ibino kobo ni, “Rik oturo jaŋe mogo me wek coma i kom yat.”

²⁰Kakare. Rik oturogi oko pien gin mom oye Obaŋa; yin pwod icuŋ pien iyee meri tye. Kur ibed kede tam me awaka, ento bed kede lworo.

²¹Ka Obaŋa yam pe oweko jaŋ yat ikome, pe doŋ bino weki.

²²Koŋ yin inen kica Obaŋa kede gero mere. En ger baŋ jo opoto, cite nyuto kica mere baŋi, ka imedde cuŋ i kica mere. Ka pe, obino toŋi oko daŋ.

²³Dok gin Ojudaya daŋ, ka oweko bedo aboŋo iyee, obino dwokogi i kom yat; pien Obaŋa tye kede twer me dwokogi iye.

²⁴Pien yin Arok irom i jaŋ yat jeituni me tim ame otoŋo, ocomo i kom yat jeituni aberrere, a yam pe en olot iye; mom bedo yot akato baŋ Obaŋa me dwoko jaŋe ocele ca i kom yat ikome a nwaŋ oturogi iye?

²⁵Omegona, tye muŋŋoro ame amito ni iŋeu, me kur itam wunu kenwu ni iryek wunu. En ene: jo Icrael cunygi odoko nwaŋ pi kare moro, ituno ka wel Orok bino romo.

²⁶Icennere Obaŋa bino laro jo Icrael luŋ, acalo rik ocoo, ni, “Alar bino tuno kun ya i Cion, en bino kwanyo kite me dago lworo Obaŋa oko i baŋ Yakobo”;

²⁷“man en cikere ame abino cikere kedgei i kare ame akwanyo balgi oko.”

²⁸Pi kop a dok i kom amut aber, gin odoko okwor Obaŋa pirwu, ento pi kop a dok i kom yer. Obaŋa marogi pi kwarigi.

²⁹Mot Obaŋa me kica, kede lwoŋo mere, mom twero lokere.

³⁰Wun rik mom iwinyo wunu dog Obaŋa, cite amanni doŋ otimowu kica, a kun gin doŋ olunyo kwero bedo i winy.

³¹I kite acellono, gin amanni doŋ okwero winyo doge i kare ame otimowu kica, me wek gin daŋ timgi kica amanno.

³²Pien Obaŋa oketo jo luŋ i buc me kwero winyo doge, me etim i jo luŋ kica.

³³Lonyo Obaŋa dwoŋ ame okato kare! Ryeko mere kede ŋeccere tut meicel! Kop a en ŋolo tere mom rotte; kittere niaŋ iye tek!

³⁴“Ŋa aŋeo tam a Rwot? Ŋa a yam mie tam?”

³⁵“Ŋa ce a rik koŋ omie ginnoro, eka en daŋ te dwoko baŋe?”

³⁶Pien en yam oketo jami ducu, jami luŋ obedo tye pire, daŋ dok baŋe. Kwogo bed baŋe nakanaka. Amen.