Read lango Jo Roma 12 Bible Online

Jo Roma 12 - lango bible

Jo Roma 12

¹Pi mannono, omegona, abako doga baŋwu pi kica Obaŋa, imiye wunu kenwu acalo gin akwo ame oŋolli Obaŋa, gin acil ame yomo yi Obaŋa; man en woro me cunywu.

²Kur ilub wunu tam me lobo man, ento weku Obaŋa lok tamwu dok anyen, me iniaŋ wunu i gin ame Obaŋa mito, gin aber, ame yomoro yie, ame roccoro mom iye.

³Pi mot me kica ame omio baŋa akobbiwu luŋ ni, dano acel acel kur par pi dittere okato kare, ento bed i par atira, ŋat acel acel kun lubo pokkere me iyee ame Obaŋa opimme.

⁴Wan otye kede dule komwa apol i kom acel, gin dul kom daŋ ticgi papat;

⁵amannono daŋ kadi bed wan opol, wan obedo kom acel i Kricito, kun ŋat acel acel bedo acalo dul kom awottere.

⁶Wan otye kede mot apapat ame lubo winyo ame Obaŋa omiowa; ber oketgi i tic. Ka omiowa mot me rabo kop Obaŋa acalo adwarpiny, ber orab acalo iyeewa tye.

⁷Ka omiowa mot me tiyi jo, otiyi wunu jo. Ŋat ame apwony myero pwony;

⁸ŋat a cuko cuny jo, cuk cunygi; ŋat a poko mot, pok i cunye luŋ; ŋat ame atelwic, ti kede mitkom; ŋat a konyo ocan, konygi kede yomcuny.

⁹Marwu bed me ateni. Kwer gin arac oko, mok i kom gin aber.

¹⁰Marre wunu kenwu kenwu atek acalo omego, kun ŋat acel acel mio kwogo baŋ awottere.

¹¹Komwu bed mit, aboŋo wackom, bedu alyet i cunywu; kun itiyi wunu Rwot acalo omiro.

¹²Cunywu bed yom pi gin ame igeno wunu; di wunu cunywu i can, kun imiye wunu i kwayo Obaŋa i cunywu luŋ.

¹³Poku jamiwu baŋ jo Obaŋa ame tye kede peko; ketu cunywu i gwoko wele.

¹⁴Lamu winyo aber i kom jo a wunowu; lammigi wunu winyo, kur icenugi acena.

¹⁵Lelu karacel i jo a lelo, koku karacel kede jo a kok.

¹⁶Bedu kede niaŋere i akinawu kenwu; kur iwakere wunu, ento notte wunu kede okopi. Kur ibed paro kenwu ni iryek wunu.

¹⁷Kur iculu rac pi rac, ento tamu pi gin ame jo luŋ pwoo ni ber.

¹⁸I tuŋ baŋwu ka twerre, bedu kede kuc baŋ jo luŋ.

¹⁹Owotena, kur iculu kwor, ento iwekki wunu akemo Obaŋa kare, pien rik ocoo ni, “An ame abino culo kwor, an abino lunyo icen, man kop a Rwot.”

²⁰Rik ocoo daŋ ni, “Ka kec oneko amoneni, mie cam; ka oryo ocire, mie mat pii; pien ka itimo amannono, ibino yido loti mac i wie.”

²¹Kur imi gin arac loi, cite lo gin arac kede gin aber.