Read lango Jo Roma 13 Bible Online

Jo Roma 13 - lango bible

Jo Roma 13

¹Dano acel acel myero winy oloc a loc; pien mom tye twerroro a pe oya i baŋ Obaŋa; oloc a tye, Obaŋa en oketogi.

²Pi mannono, dano a pyem i oloc, nwoŋo apyem i gin a yam Obaŋa ociko; jo a pyem kedgi obino ŋolo kop i wigi.

³Pien jo a timo gin aber mom bedo kede lworo moro i kom oloc, kono ka jo a timo gin arac. Yin imito ni mom ibed kede lworo i kom aloc? Tim gin aber, mio en te pwoyi;

⁴pien en atic Obaŋa ame tio pi konyi, Ento ka itimo gin arac, bed kede lworo i kome, pien twer me neko jo mom omie nononono, En atic Obaŋa ame kelo akemo i kom jo a timo gin arac.

⁵En omio myero iwinyu oloc, mom pi lworo akemo Obaŋa keken, cite me ibed a yiwu ler daŋ.

⁶Man daŋ gin omio igelo wunu ocoro, pien oloc gin otic Obaŋa ame omiye i ticcono.

⁷Culu gin a myero baŋ ŋat acel acel; gelu ocoro baŋ wegi ocoro, kede oŋwalo baŋ wegi oŋwalo, lworu jo a myero alwora, woru gin a myero awora.

⁸Kur ibedu i banya a ŋattoro i komwu, Bedu ka i banya me marre kenwu kenwu; pien jo ame maro jo wadgi nwoŋo doŋ ocobo cik.

⁹Pien maginogo ni, “Kur icod cot, Kur inek, Kur ikwal, Kur imit jami a ŋat ocele,” kede icwillogo ocele luŋ onotte karacel i kop man ni, “Mar dano wadwu acalo imarre keni.”

¹⁰Amar jo mom timo dano wadgi arac; pi mannono, mar en a cobo cik.

¹¹Tiu man kun iŋeo wunu kare ame otye iye, ni, caa doŋ orommiwu me cooko i waŋ nino; pien onyoni larre mewa doŋ onoko ceggi, kato i kare a rik okwoŋo ye iye Rwot.

¹²Dyewor doŋ ceggi tum, piny doŋ mito ru. Doŋ obolu tic me piny acol oko, oruku jami romo me dyeceŋ.

¹³Olubu kite a myero me dyeceŋ, aboŋo gat me yomcuny arac kede mero, aboŋo tiŋo luk kede tim me tarwaŋ, aboŋo daa kede nyeko.

¹⁴Ruku Rwot Yecu Kricito acalo rukwu me romo, dok kur itam wunu pi kwowu me anywalli pi cobo mittere.