Read lango Jo Roma 14 Bible Online

Jo Roma 14 - lango bible

Jo Roma 14

¹Dano ame iyee mere goro jole wunu, ento kur ipyemu kede tammere.

²Dano moro twero bedo kede iyee me camo gin ducu, ento dano ame iyee mere goro camo ka pot dek keken.

³Dano a camo gin ducu kur ca dano a mom camo, dano a mom camo kur ŋol kop i kom dano a camo; pien Obaŋa doŋ ojole.

⁴Yin i ŋa ame iŋolo kop i kom amiro me paco a ŋat ocele-nie? Mano kop a ŋat a loc, me ŋolo onyo opoto. Cite en bino cuŋ gire, pien Rwot tye kede twer me miye cuŋ.

⁵Dano acel paro ni nino acel dit kato en ocele, dano ocele tamo ni nine ducu gire tye rom aroma. Myero dano acel acel mok tammere kene.

⁶Dano a paro pi nino moro, paro pire pi Rwot; dano a camo, camo pi Rwot, pien pwoo Obaŋa; dano a kwero cam daŋ kwero pi Rwot, pwoo Obaŋa daŋ.

⁷Pien mom tye dano moro i akinawa ame kwo pire kene, daŋ dano a to pire kene mom tye.

⁸Ka wan okwo, okwo pi Rwot; ka oto, oto pi Rwot. En omio kadi ka wan okwo, onyo kadi oto, wan giwa jo a Rwot.

⁹Pien Kricito rik oto te dok kwo me wek ebed Rwot a jo oto kede jo akwo.

¹⁰Piŋo yin iŋolo ominni kop? Onyo yin, piŋo icao ominni? Wan luŋ obino cuŋ i nyim kom me ŋolo kop Obaŋa.

¹¹Pien rik ocoo ni, “Acalo an akwo, man kop a Rwot, jo luŋ bino rumo coŋgi i nyima, leb jo luŋ bino pako Obaŋa.”

¹²Amannono ŋat acel acel i akinawa bino dok iye pire kene baŋ Obaŋa.

¹³Myero doŋ ogiku ŋolo kop ŋat man i kom awottere; ento aberrere imok wunu ni, mom ibino wunu tiyo ginnoro ame twero miyo ominwu moro twomere onyo poto i bal.

¹⁴An aŋeo dok aniaŋ aber i Rwot Yecu ni, mom tye ginnoro ame bedo me kwer pire kene; ento bedo me kwer baŋ dano moro-ni ame tamo ni me kwer.

¹⁵Ka iwaŋo yi ominni pi cam a yin icamo, nwoŋo pe doŋ ilubo yo me mar. Kur imi gin a yin icamo bal kwo a ŋat ame Kricito oto pire.

¹⁶Kur imiu gin aberriwu, jo bed kobo ni gin arac.

¹⁷Pien loc Obaŋa mom cem kede mat, ento kite atira, kuc, kede lelo a Cuny Acil kelo.

¹⁸Dano ame tiyi Kricito amannono yomo yi Obaŋa, dok jo daŋ pwoe.

¹⁹Myero doŋ otamu pi gin a kelo kuc kede gin ame doŋo iyeewa kenwa kenwa.

²⁰Pi kop me cem kur ibal kede tic ame Obaŋa otio. Cem ducu myero ocam, ento bedo rac ka dano camo gin a mio ŋattoro poto i bal.

²¹Bedo ber meicel ka mom icamo riŋo kadi mato koŋo onyo tiyo ginnoro a bino miyo ominni poto.

²²Iyee ame itye kede, bed kede keni i nyim Obaŋa. Tye kede winyo dano a mom ŋolo kop loc kene i gin a en opwoo.

²³Ento dano ame tamere atama, kop loc ka ocamo, pien gin etimo mom oya i kom iyee; gin ducu a pe oya i kom iyee, en bal.