Read lango Jo Roma 15 Bible Online

Jo Roma 15 - lango bible

Jo Roma 15

¹Wan jo ame otye kede teko myero okonyu jo a mom kede teko i kom goro megi, kun mom otio ka gin a yomo yiwa kenwa.

²Ŋat acel acel i akinawa ber yom yi dano wadgi, me konye, kede me doŋ iyee mere;

³pien kadi Kricito rik pe otio gin a yomo yie kene, cite obedo acalo rik ocoo, ni, “Ayet ame oyeti kede opoto i koma.”

⁴Coc ducu a rik ocoo nwaŋ ocoo pi pwonyowa, me wek ka okanyakino, kop a tye i coc a rik ocoo cukoro cunywa, mio obedo kede gen.

⁵Kanyakino kede cuko cuny ya i baŋ Obaŋa; myero en miwu ibedu kede niaŋere i kinwu kenwu kun ilubo wunu kite a Kricito Yecu,

⁶me inotte wunu i pako Obaŋa Papa a Rwotwa Yecu Kricito kede dwon acel.

⁷Jolle wunu kenwu kenwu, acalo Kricito doŋ ojolowu, me ikelu kwogo baŋ Obaŋa.

⁸Akobbiwu ni, Kricito nwaŋ odoko akony Ojudaya pi nyuto ni Obaŋa kobo kop me ateni, kun cobo gin a rik Obaŋa ocikere iye baŋ kwariwa acon,

⁹dok daŋ kun mio Orok pako Obaŋa pi kica mere, acalo rik ocoo ni, “Doŋ pi mano abino pwoyi i akina Orok, abino wero wer me pako nyini.”

¹⁰Dok rik okobo ni, “Omau wun Orok, lelu karacel i jo mere”,

¹¹dok ni, “Pak wunu Rwot, wun Orok ducu, wek rok luŋ aluŋa opake.”

¹²Icaya daŋ okobo ni, “Akwar Yece ceŋŋoro bino; en bino pello me loyo Orok, Orok daŋ bino keto gengi i kome.”

¹³Obaŋa a mio jo bedo kede gen myero mi lelo ducu kede kuc poŋ i yiwu pi iyeewu i kome, me genwu wot kun medde ameda pi teko a Cuny Acil.

¹⁴Omegona, an aŋeo gira atira ni, wun jo abeco meicel, ame ŋec ducu opoŋ i yiwu, daŋ itwero wunu pwonyere kenwu kenwu.

¹⁵Ento atyeko coyiwu koppogo i tekcuny adwoŋ, a kun amito poyo wiwu iye. Mannono atimo pi winyo ame Obaŋa omia,

¹⁶me bedo atic a Kricito Yecu baŋ Orok. Atye atic acalo alamdog kun arabo amut aber ame oya i baŋ Obaŋa, me wek Orok bed acalo gin ame oŋolo ame Obaŋa pwoo, ame Cuny Acil olonyo obedo acil.

¹⁷Doŋ atwero wakere i Kricito Yecu i kom ticca pi Obaŋa.

¹⁸An mom atiŋere me kobo kopporo ocele, kono pi gin ame Kricito otio me kela Orok i te loccere, kun tio karacel keda i kop kede i tic,

¹⁹pi teko ame onen i kom anyuttogo kede taŋo mogo, pi teko a Cuny Acil. Mano omio atyeko rabo amut aber i kom Kricito, cakere i Jerucalem, mano kede anaka i Iliriko;

²⁰pien onwoŋo aketo cunya i rabo amut aber kan ame mom ru owinyo iye nyiŋ Kricito, me wek kur ager i wi ot a yam ŋat ocele ocako gero iye,

²¹cite bed acalo rik ocoo ni, “Jo ayam mom ru orabbigi kop i kome ol obino nene, jo a yam pe ru owinyo kop i kome obino niaŋ.”

²²Man en gin obedo geŋa kare apol me bino baŋwu.

²³Ento amanni kannoro odoŋ kan a myero ati iye doŋ mom, daŋ doŋ onwoŋo abedo kede mit adwoŋ me bino baŋwu pi mwakki apol.

²⁴Doŋ ageno ni abino nenowu ka abeo kuno i kare me wota i Cipein, daŋ ibino konya wunu i wotta kuno ame nwoŋo koŋ agalo waŋa baŋwu anonok.

²⁵Cite aman pwod koŋ awot i Jerucalem me tero kony baŋ jo Obaŋa.

²⁶Pien jo a tye i Makedonia kede Akaya otyeko moko me rayo lim me konyo jo Obaŋa a tye i Jerucalem ame can omakogi.

²⁷Gin omoko amanno, cite gin otye daŋ kede banya baŋ jo Jerucalem; pien ka Orok onywako gamo mot me cuny karacel Ojudaya, myero gin daŋ okony Ojudaya kede jami me kom.

²⁸Ka doŋ mano otum, ame doŋ atyeko miyogi gin a rik orayigi, abino beo weno baŋwu, ate wot i Cipein.

²⁹Aŋeo ni, ka atuno baŋwu, abino bino kede winyo adwoŋ ame oya i baŋ Kricito.

³⁰Abako doga baŋwu, omegona, pi Rwotwa Yecu Kricito kede pi mar a Cuny Acil, ket wunu tek i kwacwu karacel keda,

³¹me wek abwot i baŋ jo a mom oye Kricito a tye i Judaya, dok daŋ me jo Obaŋa a tye i Jerucalem pwo tic a tera kuno.

³²Amannono doŋ abino tuno baŋwu kede lelo adwoŋ ka Obaŋa oye, me ate weo karacel kedwu.

³³Obaŋa won kuc bed kedwu luŋ. Amen.