Read lango Jo Roma 16 Bible Online

Jo Roma 16 - lango bible

Jo Roma 16

¹Anyuto baŋwu aminwa Foibe, ame en atic a lwak jo oye Kricito tye i Kenkeria,

²lole wunu i Rwot acalo myero i jo Obaŋa, daŋ ikonye wunu i ginnoro ducu a en bino mito baŋwu; pien yam en okonyo jo apol, kede an ikoma daŋ.

³Motta wunu Puricika gin kede Akwila, ame gin tio karacel keda i Kricito Yecu.

⁴Gin rik ojalo ŋutgi pi laro kwona; mom an kena apwoogi, cite anaka lwak Orok oye Kricito luŋ.

⁵Mot wunu daŋ jo oye Kricito a cokere i otgi. Mot wunu dyera Epaenato; en ame ogeo ye Kricito i Acia.

⁶Mot wunu Maliam a ceŋ ololle atek i akinawu.

⁷Mot wunu Anduroniko gin kede Yunia, a gin watina a rik otweogi karacel keda i buc. Gin jo a ŋeye i baŋ okwena, daŋ gin en ogeya bedo i Kricito.

⁸Motta wunu Ampuliato, ame dyera i Rwot.

⁹Mot wunu daŋ Urbano atic wadwa i Rwot, gin kede dyera Citakic.

¹⁰Mot wunu Apelle, ame en dano a genne i Kricito. Mot wunu jo me ot a Aricitobulo.

¹¹Mot wunu Kerodion ame watta, kede jo me ot a Narocico ame tye i Rwot.

¹²Motu jo-nu a tye ololle i Rwot, Terofaina gin kede Terofosa, kede dyera Perici daŋ, ame ololle atek i Rwot.

¹³Mot wunu daŋ Rufo, dano a ŋeye i Rwot, gin kede tottere, ame en daŋ totta.

¹⁴Dok imot wunu Acinkerito, Pelegon, Keremec, Patroba, Keremac kede omego a tye karacel kedgi.

¹⁵Motu daŋ Pilogo gin kede Julia, Nerea gin kede aminnere, kede Olimpa, kede jo Obaŋa luŋ a tye karacel kedgi.

¹⁶Motte wunu kenwu kede amot acil me mar. Lwakkogo oye Kricito luŋ omotowu.

¹⁷Abako doga baŋwu, omegona, nen wunu jo ame kelo apokapoka kede kop a mio jo poto, a mom rwatte kede pwony a rik opwonyowu kede. Dupu jo-nu adupa.

¹⁸Kodi jo-nu mom gin omiro a Rwotwa Kricito; rwotgi en yigi kengi. Gin bwolo tam a jo a mom i bal, kun olebo kop aber ame winyo mit.

¹⁹Winy mewu baŋ Obaŋa doŋ owinyere baŋ jo luŋ, en omio iyomoro wunu cunya. Doŋ amito ibed wunu oryeko i gin aber, cite igeŋere wunu i bal;

²⁰Obaŋa won kuc bino canyo Catan piny i te tyenwu piopio. Winyo a Rwotwa Yecu bed kedwu.

²¹Temoteo ame tio karacel keda i Rwot omotowu, kede Lukio, kede Jacon, kede Cocipater a gin watina.

²²An Tertio ame acoo waraga man amotowu i Rwot.

²³Gayo ame abuto i ode daŋ omotowu, en ame gwoko lwak oye Kricito luŋ. Eracito akanlim me boma-ni, kede ominwa Kwarto daŋ omotowu. [

²⁴Winyo a Rwotwa Yecu Kricito bed kedwu wun ducu. Amen.]

²⁵Ber imiu kwogo baŋ Obaŋa ame twero miyowu cuŋ atek, acalo apwonyo i amut aber ame atito, kede kop ame arabo i kom Yecu Kricito. Muŋ man Obaŋa rik omio oliŋ iti pi runi apol, eka te yabo.

²⁶A man doŋ onyuto oko kannaler i coc odwarpiny acalo Obaŋa ame pero odoco ociko, kun omio rok luŋ oŋeo, me gin lub iyee.

²⁷Kwogo bed nakanaka baŋ Obaŋa, ame en kene won ryeko, pi Yecu Kricito. Amen.