Read lango Jo Roma 2 Bible Online

Jo Roma 2 - lango bible

Jo Roma 2

¹En omio gin ipid loi, yin dano, kadi yin iŋa, ka iŋolli dano kop; pien pi ŋolli dano ocele kop, nwoŋo doŋ iŋolo kop oloi yin ikomi, pien yin aŋolkop daŋ itimo kite tim acellono.

²Wan oŋeo ni, Obaŋa ŋolo kop kakare ka oŋolo kop oloo jo a timo gin acalo mano.

³Yin dano ame iŋolli jo a timo kodi timmono kop, a kun yin ikomi daŋ itimo, yin itamo ni ibino bwot i kom ŋolo kop Obaŋa?

⁴Onyo yin icao lonyo Obaŋa me kica mere, kede me jukere mere, kede me diyo cunye, a kun mom iŋeo ni, kica Obaŋa wai i kom iŋut?

⁵Ento pi nwaŋ a cunyi, kede cunyi a mom ŋut, yin itye ka kano piri keni mono me akemo pi nino me akemo ame bino nyuto iye kop atir ame Obaŋa ŋolo.

⁶En bino culo dano acel acel acalo ticcere tye.

⁷Jo a kanyakino i tic abeco, a kun oyenyo kwogo kede woro kede kwo a mom to, en bino miyogi kwo a perakino odoco.

⁸Ento jo a laro dito pirgi kengi, ame pe lubo kop me ateni, cite olubo ka kite areco, gin bino cop i akemo kede kecyic.

⁹Can kede peko bino rido dano acel acel ame timo gin arac, me agege Ojudaya, eka jo Grik daŋ.

¹⁰Ento dano acel acel ame timo gin aber bino nwoŋo kwogo kede woro kede kuc, me agege Ojudaya, eka jo Grik daŋ;

¹¹pi en Obaŋa mom poko akina a jo.

¹²Jo ame obalo boŋo cik a Muca, gin bino to aboŋo cik daŋ; kede jo ame obalo i te cik, obino ŋolligi kop kun lubo cik.

¹³Pe ni, jo ame winyo cik awinya i yitgi gin jo ame kitegi atira i nyim Obaŋa; ento jo ame tio gin a cik mito, gin jo ame obino kwanogi, ni gin jo a kitegi atir.

¹⁴Ka Orok, a mom tye kede cik, ce tio gin a cik mito pi kitegi me anywalli, nwoŋo gin ikomgi doŋ odoko wegi cik, kadi bed cik a Muca pe baŋgi.

¹⁵Gin nyuto ni, gin ame cik mito doŋ ocoo oko i cunygi, ŋec ame i cunygi ame nyuttigi balgi daŋ bedo caden karacel kedgi, kun tam megi twomere; kagi mogo ŋolo ni kop oloogi, kagi mogo cwakogi acwaka.

¹⁶Bino bedo amannono i nino-naca ame Obaŋa bino ŋolo iye kop i kom gin a jo tio i muŋ, pi Yecu Kricito, kun lubo amut aber ame atye arabo.

¹⁷Ento ka ilwoŋere keni Ajudaya kono? Nwoŋo ŋenere i kom cik, a kun iwakere pi Obaŋa,

¹⁸daŋ iŋeo mittere, dok ipwoo gin aber akato, pien otyeko pwonyi kede i cik.

¹⁹I tuŋ baŋi, iŋeo ni yin atel otowaŋ, yin ceŋ a menyo jo a tye i piny acol,

²⁰daŋ yin ame atir jo ame omiŋo, kede apwony otino, pien i cik itye kede ŋec kede kop ateni ikokome.

²¹Aco, yin apwony jo ocele, mom ipwonyere keni keni? Irabo kop ni, “Kur ikwal”, cite yin ikwalo?

²²I kobo ni, “Kur icod cot”, cite yin icodo? Yii dag cal jogi, cite yin ikwalo gin a tye i ot jok?

²³Iwakere pi cik, cite yin icao Obaŋa kun ikalo wi cik?

²⁴Tye acalo coc a rik ocoo, ni, “Nyiŋ Obaŋa oyeto i akina Orok pirwu.”

²⁵Lirre konyo ka ce ilubo cik, ento ka ituro cik, dwoki acalo mom oliri.

²⁶Doŋ ka dano a mom oliro ogwoko icwil a tye i cik, ŋat a mom oliro-nu mom obino kwane acalo ŋat ame oliro?

²⁷Mio dano ame mom oliro, ame cobo cik, bino ŋolo kop loi, pien itye kede cik a rik ocoo, dok oliri daŋ oko, cite pwod ituro cik.

²⁸Pien dano ame en Ajudaya i oko keken, pe en Ajudaya; dok lirre ame nen i oko i kom, mano pe lirre ikome.

²⁹Ajudaya ikome en dano ame Ajudaya i yie, lirre ikome daŋ en lirre me yi dano, en tic me Cuny Acil, pe me gin ame ocoo acoa. Kodi dano-nu, kadi bed jo pe pwoe, Obaŋa pwoe.