Read lango Jo Roma 3 Bible Online

Jo Roma 3 - lango bible

Jo Roma 3

¹Kara ka tye amannono, Ajudaya dok kato jo ocele iŋo? Onyo lirre konnyere ŋo?

²Konyo atek i yo ducu. Me ageyi mere, ceŋ omiogi koppogo ame oya i baŋ Obaŋa, kun ogenogi.

³Bedo niŋo ka jo mogo i akinagi rik gin mom ogen? Pi pe genne megi twero miyo Obaŋa doko a mom genne?

⁴Pe amannono! Obaŋa myero bed me ateni, kadi bed jo luŋ ogoba, acalo rik ocoo ni, “Wek kop ame ikobo nyut ni kiti atir, dok me, ka oŋolli kop, yin ilo.”

⁵Ento ka kitewa a mom atir nyuto kit ame Obaŋa kite atir kede, kara enni doŋ wan obino kobo ŋo? Ni Obaŋa mom kite atir pi keto akemo i komwa? (An gira akop i kite a dano.)

⁶Mom amannono! Kara ka tye amannono kono, Obaŋa twero ŋolli jo me wi lobo kop iŋo?

⁷Ka goba mera miyo ateni Obaŋa medde ameda kun kelle kwogo, kara piŋo an pwod aŋolla kop bala an abal?

⁸Piŋo wan mom otimo gin arac me gin aber ya iye? Pien tye jo mogo ame coko dogwa kun okobo ni wan okobo amannono. Ka oŋolo kop oloo jo-nono, nwoŋo oŋolo kakare.

⁹Kara nino doŋ? Wan Ojudaya otye aber akato gin? Amaa, kadi acelloro; pien atyeko kelo adote ni, jo luŋ, Ojudaya kede jo ame pe Ojudaya, bal doŋ oloogi,

¹⁰acalo rik ocoo ni, “Ŋattoro a kite atir gire mom, pe kadi acelloro;

¹¹ŋat ame niaŋ daŋ mom, ŋat ame yenyo Obaŋa pe tye.

¹²Gin luŋ doŋ ogak oko teŋe, gin ducu oballe oko; ŋat a timo gin aber pe, moro acelloro doŋ mom.”

¹³“Dwongi obedo lyel a wie olaŋara, lebgi gin bwolo kede jo.” “Kwir cocodo tye i te lebgi.”

¹⁴“Doggi kec, opeŋ iye kop me ceno jo.”

¹⁵“Tyengi dwir i onyo remo,

¹⁶Yorgi i duru, daŋ kelo cen,

¹⁷gin kwia yo me kuc.”

¹⁸“Lworo Obaŋa mom tye i tamgi.”

¹⁹Wan oŋeo ni, gin ame cik okobo, okobo baŋ jo ame cik loogi, me dog jo ducu lin, wi podo luŋ bed i te ŋolo kop Obaŋa.

²⁰Pien mom obino kwano dano moro ni kite atir i nyim Obaŋa pi cobo cik; cik ticcere me niaŋo jo i kom bal.

²¹Ento amanni kit ame Obaŋa kwano kede dano ni kite atir ame mom pi cik doŋ onen oko kannaler. Cik a Muca kede odwarpiny daŋ rik otito pire;

²²en kit ame Obaŋa kwano kede dano ni kite atir pi iyee mere i kom Yecu Kricito, daŋ tye pi jo luŋ ame ye eno Apokapoka mom;

²³pien jo luŋ obalo, mom otuno i kwogo Obaŋa.

²⁴En kwanogi ni kitegi atir nono, kun miogi acalo mot pi kica mere, pi kite ame Yecu olakorogi kede.

²⁵Obaŋa oketo en ibedo gin me kwanyo bal kede remo mere, pi jo ame ye en, wek enyut kede kite mere atir; pien Obaŋa rik ojukere kene, pe otimo ginnoro i kom bal a rik jo otimo con,

²⁶wek enyut kite mere atir i kare man, ni, en ikome kite atir, dok kwano dano ni kite atir pi ye Yecu.

²⁷Kara ka wakere tye kwene? Doŋ ogeno oko. Pi cikkene? Pi cik me tic? Amaa, ento pi cik me iyee.

²⁸En omio omoko tamwa ni, dano okwano ni kite atir pi iyee mere, mom pi ticcere me cobo cik.

²⁹Onyo Obaŋa tye pi Ojudaya keken? Mom ŋit en daŋ Obaŋa Orok? Ee ta, me Orok daŋ,

³⁰pien Obaŋa en acel; en bino kwano jo ame oliro ni kitegi atir pi iyee megi, dok bino kwano jo a mom oliro ni kitegi atir pi iyeegi daŋ.

³¹Wan dok obolo cik a Muca oko bo pi iyee-ni? Mom amanno gire, wan omoko cik amoka.