Read lango Jo Roma 4 Bible Online

Jo Roma 4 - lango bible

Jo Roma 4

¹Kara wan obino kobo ŋo i kom Iburaim, ame en kwarowa i kite me kom?

²Kono yam okwano Iburaim ni kite atir pi tic ame otio, kono en tye i gin ewakere iye, cite mom i nyim Obaŋa.

³Coc a yam ocoo kobo niŋo? Ni, “Iburaim oye Obaŋa eka ote kwane ni kite atir.”

⁴Dano a tio tic, ocara mere mom omie acalo mot, ento acalo jami mere;

⁵cite dano a pe tio, ento ame ye ŋat ame kwano jo a mom lworo Obaŋa ni kitegi atir, kodi dano-nu okwano ni kite atir pi iyee mere.

⁶I kite acellono, Daudi daŋ rik okobo pi winyo a dano tye kede, ka Obaŋa okwane ni kite atir aboŋo ticcoro a en otio, acalo rik ocoo ni,

⁷“Tye kede winyo, jo a doŋ otimogi kica i kom timgi areco, ame owumo balgi;

⁸tye kede winyo, dano ame Rwot mom okwano balloro i kome.”

⁹Winyo man tye pi jo ame olirogi keken, onyo ŋit pi jo a mom oliro daŋ? Wan okobo ni, pi iyee omio okwano Iburaim ni kite atir.

¹⁰Kara man dok rik okwano i kome niŋo? A doŋ otyeko lire, aŋar ame mom ru olire? Pe a doŋ otyeko lire, ento a mom ru olire gire.

¹¹Omie lirre me bedo acalo anyut onyo anen ame omwoŋo, ame nyuto ni, doŋ otyeko kwane ni kite atir pi iyee mere, ame mom ru olire. Mano mio Iburaim bedo kwaro a jo luŋ ame ye ame pe ru olirogi, me gin daŋ kwangi ni kitegi atir;

¹²dok daŋ en kwaro a jo a mom olirogi alira keken, ento daŋ owopo kodi iyee a rik kwarowa Iburaim obedo kede ame onwoŋo mom ru oliro.

¹³Cikere a nwaŋ Obaŋa ociko baŋ Iburaim kede ikwae, ni, wi podo luŋ bino bedo megi, rik mom ociko pien Iburaim ocobo cik, cite pien en oye, ote kwane ni kite atira.

¹⁴Pien ka jo a cobo cik gin en ame wi podo luŋ bino bedo megi, kono iyee doŋ yore mom, cikere daŋ konnyere mom.

¹⁵Pien cik kelo akemo, cite kan ame cik pe iye, turo cik daŋ mom.

¹⁶En gin omio cik ocuŋ i kom iyee, wek bed me kica, dok pi moko cikere baŋ ikwae mere luŋ, mom baŋ jo a lubo cik keken, ento anaka baŋ jo a bedo kede iyee acalo Iburaim. Pien en kwarowa wan ducu,

¹⁷acalo rik ocoo ni, “Doŋ amii idoko kwaro a rok apol.” Cikere-ni doŋ omoko i nyim Obaŋa ame rik Iburaim oye, en Obaŋa ame mio kwo i kom jo oto, dok ame cwano gigi mogo a yam mom tye, mio bedo tye.

¹⁸Iburaim nwaŋ oye, kun oketo gennere i kom gin ame nen bala mom genne, omio odoko kwaro a rok apol, acalo rik ocoo ni, “Ikwai bino bedo kite-nono.”

¹⁹Naka en mom obedo i nyapo i kom iyee ka oparo pi kome, a rik doŋ rom aroma i gin oto, pien mwaka me dittere buco romo mia twal, dok medo i mano Cara-gu onwoŋo oraŋa.

²⁰Iyee mere pe odok cen, pe ocacapa i tammere i kom cikere Obaŋa, ento iyee mere omedde ameda i doko atek kun en mio kwogo baŋ Obaŋa,

²¹kun nwoŋo kop odonyo atut i cunye ni, Obaŋa twero tiyo gin a doŋ ociko pire.

²²En gin omio “ote kwane ni kite atir.”

²³Kop man ni, “ote kwane” rik mom ocoo pire en kene,

²⁴ento anaka pirwa daŋ. Wan daŋ obino kwanowa ni kitewa atir, wan jo ame oye Obaŋa ame ocero Rwotwa Yecu Kricito iyi akina ajo oto,

²⁵en a rik omio me aneka pi bal wa, dok ocere me kwanwa ni kitewa atir.