Read lango Jo Roma 6 Bible Online

Jo Roma 6 - lango bible

Jo Roma 6

¹Kara wan obino kobo ŋo doki? Myero omedde wunu i bal, me kica nya?

²Mom amannono! Kara wan a rik oto i tun bal otwero dok kwo iye niŋo?

³Mom iŋeo wunu ni, wan luŋame doŋobatakino idonyo i Kricito nwaŋ obatŋawa me donyo i to mere?

⁴Nwaŋ oyikowa karacel kede Kricito me donyo i to mere, me obed acalo en. En rik ocer i akina a jo oto pi kwogo a Pappere, me wan daŋ owapu kodi kwo anyen-nu.

⁵Pien ka doŋwan onotte karacel i en i to moro a cal i to mere, amanno daŋ wan obino notte kede i cer ame cal i cerrere.

⁶Pien wan oŋeo man, ni, kwowa acon rik oguro kede karacel i kom yataria, wek kwowa me bal myero doŋ to oko, me kur dok wan odok omiro a bal.

⁷Pien ŋat a doŋoto, bal doŋgik i kome.

⁸Ento ka doŋwan otyeko to karacel kede Kricito, wan oye ni, obino bedo kwo karacel kede daŋ.

⁹Pien oŋeo ni, Kricito a ceŋ ocer i akina a jo oto mom dok bino to; to mom dok tye i loccoro i kome.

¹⁰To a en oto, oto i tuŋ bal, tyen acel atwal-li; ento kwo a en kwo kede, en kwo i tuŋ baŋ Obaŋa.

¹¹Wun daŋ amannono, myero itamu i komwu kenwu ni, wun jo oto i tun bal, cite ibedo wunu jo a kwo i tun baŋ Obaŋa i Kricito Yecu.

¹²Kur imi wunu bal lo komwu ame to, me pe bed miyowu lubo mitgi.

¹³Kur dok imi wunu dule komwu i bal, acalo bala jami tic me tiyo gin arac; ento miye wunu kenwu baŋ Obaŋa bala jo a doŋotyeko ya i to, otuno i kwo; miu daŋ dule komwu baŋ Obaŋa acalo bala jami tic me tiyo gin a tye atir.

¹⁴Pien bal mom dok bino bwoyowu, pien wun doŋ pe itye wunu i te cik, ento itye wunu i te kica.

¹⁵Kara ŋo doki? Wan doki otimu bal, ni pien wan mom otye i te cik cite i te kica? Mom amannono gire!

¹⁶Wun mom iŋeo wunu ni, ka imiye wunu kenwu baŋ ŋattoro bala omiro me winyo doge, daŋ doŋ idoko wunu omiro a ŋat ame iwinyo wunu doge? Onyo idoko wunu omiro a bal, ame telowu i to, onyo idoko wunu omiro me winyo dog Obaŋa, ame telowu i kite atir.

¹⁷Cite myero opwo iye Obaŋa, pien rik ibedo wunu omiro a bal, cite doŋ itye wunu ka lubo kite me pwony ame oketowu iye, kede cunywu luŋ.

¹⁸Doŋ ogonyowu oko i opii me bal, idoko wunu omiro me kite atir.

¹⁹An akop i kitewa me dano, pi gorowu me anywalli. Pien acalo ceŋ imio wunu dule komwu me bedo omiro me caro kede tim areco, omio idoko wunu otim areco, aman doŋ mi wunu dule komwu obed omiro me kite atir, me idok wunu jo acil.

²⁰A nwaŋ pwod ibedo wunu omiro a bal, ceŋ mom itye wunu i te loc me kite atir.

²¹Kara ŋo a rik inwoŋo wunu i gin a lewiccere makowu iye amanni? Agikki a kodi ginnogo en to.

²²Aman doŋ ogonyowu oko i opii me bal, doŋ idoko wunu omiro Obaŋa; gin ame inwoŋo wunu, idoko wunu jo acil, agikki mere en kwo a perakino nakanaka.

²³Pien ocara me bal en to, ento mot ame Obaŋa mio nono en kwo a perakino nakanaka i Kricito Yecu Rwotwa.