Read lango Jo Roma 8 Bible Online

Jo Roma 8 - lango bible

Jo Roma 8

¹En omio amanni mom dok oŋolo kop oloo jo ame bedo i Kricito Yecu.

²Pien cik a Cuny me kwo a tye i Kricito Yecu doŋogonya oko i te cik me bal kede to.

³Gin ame onwoŋo cik pe twero tiyo, pien kwowa me anywalli oloko odoko agoro, Obaŋa en a doŋotimo. Ooro Wode ikome me bino i kit kom a cal i megwa ame bal obwoo, acalo gin ame oŋolo me yalo Obaŋa pi bal. Amannono oŋolo kop oloo bal a tye i kwowa me anywalli,

⁴me wek gin ame cik mito cobere i komwa, wan jo ame pe doŋowapo kwowa me anywalli, ento owopo yo me Cuny.

⁵Pien jo ame wopo kwo me anywalli, tamgi daŋ wopo kwo me anywalli; ento jo ame wapo yo me Cuny, tamgi daŋ wapo yo me Cuny.

⁶Tam ame wopo kwo me anywalli kela to; tam ame wopo Cuny kela kwo kede kuc.

⁷Tam me kwowa me anywalli i tun baŋ Obaŋa en kwor, pien pe winyo cik Obaŋa, daŋ pe twero winyo.

⁸Jo ame wopo kwo me anywalli mom otwero yomoro cuny Obaŋa.

⁹Wun mom itye wunu i kwo me anywalli, itye wunu i Cuny, ka Cuny Obaŋa bedo i yiwu. Cite ka dano moro mom tye kede Cuny a Kricito, en mom dano a Kricito.

¹⁰Ento ka Kricito tye i yiwu, komwu doŋoto pi bal, ento cunywu doŋbedo kwo, pien doŋokwanowu ni wun kitewu atir.

¹¹Doŋ ka ce Cuny ŋat a rik ocero Yecu iyi akina a jo oto bedo i yiwu, en daŋ bino miyo kwo anaka i komwu a doŋoto-ni, pi Cunye ame bedo i yiwu.

¹²Omegona, wan doŋ otye kede banya, cite pe me kwo me anywalli, me wopo kwo me anywalli.

¹³Pien ka iwopo wunu kwo me anywalli, ibino to wunu; cite ka ineko wunu tic me kom oko pi Cuny, ibino bedo wunu jo akwo.

¹⁴Jo ame Cuny Obaŋa telogi, gin itino Obaŋa.

¹⁵Rik mom igamo wunu cuny me opii me dwokowu i lworo; gin igamo wunu en cuny me bedo itino me paco, en kodi cuny a mio wan okok ni, “Aba! Papawa!”

¹⁶Cuny Acil ikome notte kede cunywa kun tuco ni, wan iti no Obaŋa.

¹⁷Aco, ka wan itino, lonyo daŋ abedo megwa, en lonyo Obaŋa ame wan obino nywako i Kricito, ka ce wan okanyo can karacel kede, me onwoŋ kwogo daŋ karacel kede.

¹⁸An atamo ni, can me kare man pe romo apora kede kwogo ame obino nyuttiwa.

¹⁹Pien ginaketa ducu tye ka kuro nyuto itino Obaŋa kede mit adwoŋ ame okato kare.

²⁰Ginaketa luŋonwoŋo oketo i te twer me gin a tere mom, pe pi mittere kene, ento pi mit Obaŋa ame rik oketo i te twerrono; kun gen tye ni,

²¹ginaketa ikomgi ceŋŋoro obino gonyo oko i opii me bedo gin atop, me onwoŋ kuc kede kwogo ame omio itino Obaŋa.

²²Wan oŋeo ni, jami ducu ame oketo aketa tye acucura onyoni kun tye ka rem karacel anaka i kare-ni.

²³Pe gin-nu keken, wan daŋ ame omiowa Cuny Acil acalo mot me ageyi, wan daŋ otye ocucura i yiwa kun okuro kare lokowa doko itino me paco, en me lakoro komwa.

²⁴Pien rik olarowa pi bedo kede gen man. Gin ame igeno ka doŋonen oko, pwod ikobo ni igeno agena? Ŋa ame moko gennere i kom gin ame doŋoneno?

²⁵Ento ka wan ogeno nwoŋo gin ame mom ru oneno, odio cunywa me kuro.

²⁶I kite acellono Cuny Acil daŋ konyo gorowa. Wan mom oŋeo kwac i kite a myero, ento Cuny ikome bako doge akakarwa, kun cucura liliŋ.

²⁷Ŋat ame ŋio cuny Jo ŋeo tam a Cuny Acil, pien en bako doge pi jo Obaŋa kun lubo mit Obaŋa.

²⁸Wan oŋeo ni, jami ducu tio karacel pi konyo jo a maro Obaŋa, en jo ame olwoŋogi acalo en oyiko.

²⁹Jo a yam en oŋeogi con, en omokogi con, ni myero nywak cal a Wode, me Wode bed atin kao i akina omego apol.

³⁰Jo a yam en omokogi con, daŋ olwoŋogi; jo ame olwoŋogi, okwanogi ni kitegi atir; jo ame okwanogi ni kitegi atir, omiogi kwogo.

³¹Kara doŋobino kobo ŋo i kom kop man? Ka Obaŋa tye luŋ baŋwa, ŋa ame akworwa?

³²En rik mom oweko Wode ikome, cite omie pi wan ducu. Pe doŋbino miyowa jami ducu karacel i en, kun mom twonowa?

³³Kara ŋa a bino piddi jo ame Obaŋa oyero? Obaŋa en ame kwanogi ni kitegi atir.

³⁴Ŋa a twero ŋolo kop loogi? Kricito Yecu en ame rik oto, dok akato mano, rik ocere oko. En daŋ tye i kabedo me kwogo i laŋet Obaŋa tuŋ cem, en ame abako doge pirwa.

³⁵Kara ŋa a bino pokowa i kom mar a Kricito? Neno can bo, aŋar ŋit peko, onyo awuna, aŋar kecbo, aŋar bedo onoro, onyo ginnoro arac a twero poto i komwa, ya aŋar ŋit pala?

³⁶Acalo rik ocoo ni, “Piri obedo ka nekowa ceŋ iyul; okwanowa bala romi me aneka.”

³⁷Ento magu luŋwan otye ka loyo atek pi ŋat a ceŋ omarowa.

³⁸Pien an aŋeo gira atira ni, kadi to, kadi kwo, kadi omalaika, kadi oloc, kadi gin a tye koni, kadi gin a mito bino, kadi teko,

³⁹kadi gin a tye malo, kadi gin a tye piny, kadi gigi mogo me ginaketa luŋ, mom bino bedo i twer me pokowa i kom mar Obaŋa a tye i Kricito Yecu Rwotwa.