Read lango Jo Roma 9 Bible Online

Jo Roma 9 - lango bible

Jo Roma 9

¹Atye akobbo kop ateni i Kricito, pe akobo goba; ŋec ame i cunya ame nyutta bal daŋ bedo caden karacel keda pi Cunya Acil,

²ni, atye kede waŋcuny atek, rem i cunya mom gik.

³Pi mit mera, kono rik ocena an ikoma me kwanya oko ibaŋ Kricito, pi omegona, ame gin watina me rokka.

⁴Gin jo Icrael, jo ame Obaŋa oloko odoko otino mere, omiogi kwogo mere kede cikere luŋ, omiogi daŋ cik kede kite me wore, dok daŋ gin en a rik ociko pi miyogi gigi mogo abeco.

⁵Kwariwa acon obedo megi, dok Kricito daŋ onywalo i akinagi i kite me kom. Obaŋa aloo jami luŋmyero opwoo nakanaka. Amen.

⁶Cite pe ni kop Obaŋa oto nono; pien anywalli Icrael pe gin luŋjo Icrael,

⁷dok daŋ mom gin ducu itino Iburaim, ni, pien gin ikwae mere; cite yam ocoo ni, “Itino Icaka en ame obino cwano ni ikwaeni.”

⁸Ame te koppere ni, mom ikwae me kome ame gin itino Obaŋa, ento ikwae ame rik ociko pirgi gin en ame obino kwano ni gin ikwae mere.

⁹Pien kop ame ociko baŋe en ene, ni, “Abino dwogo i kare ame aciko, eka Cara te nywalo atin awobi.”

¹⁰Mom mannono keken, ento daŋ Lebeka oyac kede dano moro acel, en kwarowa Icaka,

¹¹cite a mom ru onywal, ame itino ca mom ru itimo ginnoro aber onyo arac,

¹²rik okobbi Lebeka ni, “Atin atidi bino loyo atin kao,” me wek yer ame Obaŋa oyiko moki, ame pe cuŋ i kom ticgi, ento i kom lwoŋo mere.

¹³Obedo acalo rik ocoo ni, “Ceŋ amaro Yakobo, ento akwero Ecau.”

¹⁴Kara wan dok okob iŋo? Ni Obaŋa tiyo gin a mom atira? Mom amanno gire.

¹⁵En rik okobbi Muca ni, “Abino timo kica baŋ jo ame abino timogi kica, dok abino timo ber baŋ jo ame abino timogi ber.”

¹⁶Doŋ pe cuŋ i kom mit a dano, onyo i kom lolle mere, ento i kom kica Obaŋa.

¹⁷Coc a yam ocoo okobbi Parao ni, “Pi kop man omio atini malo, me wek anyut twer mera i komi, me rab nyiŋa i wi podo luŋ.”

¹⁸Kittono en timo kica baŋ ŋat a en mito ni etime kica, dok ŋat a en mito loko cunye doko nwaŋ, en loko doko nwaŋ.

¹⁹Gwok ibino penya ni, “Piŋo en pwod kobo ni wan obalo? Kara ŋa a twero geŋo gin a en mito?”

²⁰Kara yin dano yin iŋa, ame igamo dog Obaŋa? Gin ame ocweo twero penyo ŋat ocwee ni, “Pi ŋo icwea kit man?”

²¹Acwec mom tye kede twer i kom lobo, me cweyo kede aŋina lobo acel, tabo acel me wel kede moro ocele ame pe me wel?

²²Kara bedo ni ŋo ka Obaŋa odio cunye pi kare alac i kom tabbi mogo me akemo ame doŋ oromo me aneka, pi mito nyuto akemo mere kede miyo teko mere ŋeye?

²³Otimo man wek emi lonyo me kwogo mere ŋeye i kom tabbi me kica, ame en rik oyiko con me bed i kwogo,

²⁴en wan ikomwa, wan jo ame en olwoŋo, mom i akina a jo Icrael keken, cite anaka iyi akina Orok daŋ.

²⁵Acalo en daŋ rik okobo i buk a Kocea, ni, “Jo a nwaŋ mom jona abino lwoŋogi ni ‘jona’, dako a rik mom amaro abino lwoŋo ni, ‘dako ame amaro.’ ”

²⁶“Dok daŋ i kabedo ame rik okobbigi iye ni, ‘Wun mom i jona wunu’, obino cwanogi iye ni, ‘itino Obaŋa akwo.’ ”

²⁷Icaya daŋ rik olemo kede dwoŋ aloŋo i kom jo Icrael ni, “Kadi wel jo Icrael rom i kwoo me dog nam, jo odoŋ anonok keken en a bino bwot;

²⁸pien kop a Rwot oŋolo i wi lobo en bino cobo me oyotoyot”

²⁹Dok tye acalo kaya yam okobo con, “Ka kono Rwot me mony mom owekkiwa ikwaewa mogo, kono wan obedo calo Codoma, onyo kono odoko bala Gomorra.”

³⁰Kara man wan dok okob iŋo? Ni mano, Orok a yam pe lolle pi doko jo a kitegi atir doŋ okwanogi ni kitegi atir, cite kitegi atirrono gin onwoŋo pi iyee.

³¹Ento jo Icrael ame yam lolle pi cobo cik me gin bed jo a kitegi atir, cobo oloogi oko.

³²Piŋo? Pien gin mom oyenyo i yo me iyee, ento i yo me tic. Gin otwomere i gweŋ me twomere ca,

³³acalo rik ocoo ni, “Nen, aketo i Cion gweŋ me twomere, lela a mio jo rette; ŋat ame oye en, lewic mom bino make.”