Read lango 1 Korinti 1 Bible Online

1 Korinti 1 - lango bible

1 Korinti 1

¹Waraga man oya i baŋ Paulo ame pi mit Obaŋa rik olwoŋe me bedo akwena a Kricito Yecu, kede i baŋ ominwa Cocetene.

²Baŋ lwak jo oye Obaŋa a tye i Korinti, a gin jo ame olonyo odoko acil i Kricito Yecu, ame Obaŋa olwoŋogi me bedo jo mere ikome, karacel i jo luŋ a tye i kabedo luŋ, ame lwoŋo nyiŋ Rwotwa Yecu Kricito, en Rwotgi kede megwa daŋ:

³Obaŋa Papawa kede Rwotwa Yecu Kricito miwu winyo kede kuc.

⁴An nino luŋ amio pwoc baŋ Obaŋana pi winyo ame omiowu i Kricito Yecu,

⁵pien pi bedowu i Kricito omio doŋ idoko wunu olonyo i yore luŋ, Itye wunu doŋ i ŋec luŋ dok daŋ itwero kobo wunu aber,

⁶pien kop a wan orabo i kom Kricito odonyo atek i yiwu.

⁷Omio mom ikeŋ wunu mottoro me cuny a kun pwod ikuro wunu kare me nyuto Rwotwa Yecu Kricito.

⁸En bino miyo icato wunu atek naka iyi agikki, kun mom tye ginnoro a myero dotwu iye i nino a Rwotwa Yecu Kricito.

⁹Obaŋa ame olwoŋowu me notte karacel i Wode Yecu Kricito Rwotwa, en genne.

¹⁰Abako doga baŋwu, omegona, pi nyiŋ Rwotwa Yecu Kricito, ni wun luŋ myero ikob wunu kop acel, apokapoka moro daŋ myero kur bedo i akinawu; ento myero ikubere wunu i cuny acel kede tam acel.

¹¹Pien jo mogo ame oya i baŋ Koloe otitta kop i komwu kannaler, ni mano daa tye i akinawu, omegona.

¹²Gin ame akobo ene: ŋat acel acel iyi akinawu tye ka kobo ni, “An gira a dano a Paulo”, “An gira a dano a Kepa”, “An gira a dano Apolo”, “An a dano a Kricito.”

¹³Kom Kricito opokere bo? Rik oguro Paulo i kom yataria pirwu? Rik obatijawu i nyiŋ Paulo?

¹⁴An apwoo Obaŋa, pien rik an gira mom abatija ŋattoro iyi akinawu, kono ka Kricipo gin i Gayo,

¹⁵me ŋattoro kur kob ni ebatija i nyiŋa.

¹⁶Abatija daŋ jo i ot a Citepano; mom doŋ atwero poyo ka kono abatija dok ŋattoro ocele.

¹⁷Kricito mom ocwaa pi batija jo, ento pi rabo amut aber, ame mom arabo i ryeko moro me limdog, me to a Kricito i kom yataria kur konnyere bed pe.

¹⁸Kop i kom yataria i tuŋ baŋ jo ame arwenyo odoco, gin neno bala kop me miŋo, cite i tuŋ baŋ wan jo ame Obaŋa tye alarowa, obedo teko Obaŋa.

¹⁹Pien yam ocoo ni, “Abino balo ryeko a jo aryek, abino keto ŋec a jo a ŋeo piny oko,”

²⁰Ane kara jo aryek? Ane opwony-cik? Ane jo apyem me kare-ni? Mom Obaŋa doŋ oloko ryeko me lobo man odoko me miŋo?

²¹Pien pi ryeko Obaŋa omio lobo mom oŋee pi ryekogi, ento Obaŋa pi mittere gire olunyo laro jo oye en pi kop me miŋo ame orabo.

²²Ojudaya mito neno anyuttogo, jo Grik yenyo ryeko;

²³aco wan giwa orabo pi Kricito a rik oguro i kom yataria, ame koppere tuŋ baŋ Ojudaya obedo gin a retogi, i baŋ Orok nen me miŋo.

²⁴Cite baŋ jo ame olwoŋo, Ojudaya kede jo Grik, en Kricito ame obedo teko kede ryeko Obaŋa.

²⁵Pien miŋo Obaŋa kato ryeko a dano oko i ryeko, goro Obaŋa daŋ tek kato teko a dano oko.

²⁶Omegona, koŋ iparu lwoŋo ame Obaŋa olwoŋowu kede. Jo apol i akinawu onwoŋo mom tye i ryeko moro me lobo-ni, polwu onwoŋo mom wegi twer, polwu onwoŋo mom obedo wegi kwogo.

²⁷Cite Obaŋa oyero gigi mogo ame lobo lwoŋo ni omiŋo, me miyo oryeko lewic; Obaŋa oyero gigi mogo ame lobo lwoŋo ni ogoro, me miyo oteko lewic;

²⁸Obaŋa oyero gigi mogo ame lobo cao ni ojotojot, anaka gigi mogo a mom tye, me mi jami a tye dok piny ata,

²⁹me dano moro kur wakere i nyim Obaŋa.

³⁰Obaŋa en omio ikwo wunu i Kricito Yecu, ame Obaŋa omio odoko ryekowa. Pi Kricito omio Obaŋa okwanowa ni kitewa atira, olonyowa obedo jo acil, olakorowa.

³¹Doŋ acalo bala rik ocoo, “Ŋat a wakere, myero wakere pi Rwot.”