Read lango 1 Korinti 10 Bible Online

1 Korinti 10 - lango bible

1 Korinti 10

¹Omegona, amito iŋe wunu ni, kwariwa luŋ rik obedo i te pol, gin luŋ rik obeo i dye nam,

²gin luŋ daŋ rik obatija-yi i pol kede i nam, me gin obedjo a Muca.

³Gin luŋ rik ocamo cam acel me cuny,

⁴gin luŋ omato ginamata acel me cuny. Pien gin omato pe oya I lela me cuny ame woto karacel kedgi, lela-nono rik en Kricito.

⁵Kadi bed amannono, Obaŋa rik mom opwoo pol a jo i akinagi; pien komgi oto oradde ata i tim.

⁶Mannono luŋ odoko apor baŋwa, me kwenyorowa ni kur obed gomo gin arac acalo rik gin ogomo.

⁷Kur owor wunu cal jogi acalo jo mogo i akinagi; bala a rik ocoo ni, “Lwak obedo piny ka cem kede mat, ote ya malo i myel.”

⁸Kur oumu um me coco, acalo jo mogo I akinagi yam otimo, eka jo tutumia pyeraryo wie adek te to oko i nino acel.

⁹Kur wan oom wunu yi Rwot, acalo jo mogo i komgi yam oomo yie, eka twol te nekogi.

¹⁰Kur inunura wunu acalo jo mogo i akinagi yam Oŋuŋura, eka Anek te nyotogi oko.

¹¹Mannono luŋ rik otimere i komgi acalo apor, ote coyo me kwenyorowa, wan jo ame agikki piny otuno i komwa-ni.

¹²Pi mannono, ŋattoro a tamo ni en ecuŋ myero gwokere kur rette.

¹³Abita moro mom omakowu a mom binni jo luŋ; Obaŋa gwoko cikere mere, mom bino ye ni bitwu atek akato ame iromo wunu kanyo, cite i kare ame Catan abitowu, Obaŋa bino miyowu yo me bwot, me ibed wunu i twer me kanyo.

¹⁴Amannono ba, wun ame amaro cac wunu woro cal jogi oko.

¹⁵Akop kedwu acalo jo ame oryeko; tam wunu kedwu kop ame akobo.

¹⁶Ikopo me winyo Obaŋa, a wan okwao iye winyo, mom onotte iye wunu i remo a Kricito?

¹⁷Pien ogati bedo nina acel, wan jo apol wok-ki obedo kom acel, pien wan luŋ onywako camo ogati acellono.

¹⁸Koŋ inen jo Icrael; jo a camo gin ame oŋolli Obaŋa mom gin onotte i kom keno me lam?

¹⁹Mano akobo niŋo? Ni nijo ame oyalo kede cal jogi obedo gmnoro onyo ni cal jogi obedo ginnoro?

²⁰Pe gire. Gin ame akobo en ene ni gin ame jo a mom oŋeo Obaŋa ŋolo, gin yalo i jogi, mom oyalo Obaŋa. Mom amito inotte wunu kede jogi.

²¹Mom itwero wunu mato ikopo a Rwot kede ikopo a jogi. Mom itwero wunu cem i meja a Rwot kede dok i meja a jogi.

²²Onyo wan omito wunu omo yi Rwot me nyeko make? Wan otye kede teko akato en?

²³“Atwero timo jami luŋ,” cite mom jarm luŋ konyo. “Atwero timo jami luŋ,” cite mom ni jami luŋ doŋo iyee a jo.

²⁴Dano kur lub gin a konyo en kene, cite lub gin a konyo awottere.

²⁵Cam wunu gin luŋ ame ocato i cuk aboŋo penyo ginnoro iye pi lworo bal:

²⁶Pien lobo gire mea Rwot, kede jami luŋ a tye iye.

²⁷Ka dano moro a mom oye Rwot ocwanowu i cem, kun imito wunu wot iye, cam wunu ginnoro luŋ ame oketo i nyimwu, aboŋo penyo ginnoro iye pi lworo bal.

²⁸Cite ka ŋattoro okobbiwu ni, “Man en gin a rik oyalli jok,” kur icamu, pi paro pi ŋat a doŋ oryonorowu-nono, kede pi tammere me cunye a nyutte ballere.

²⁹Mano an akobo pi tammere me cunye en dano ocele ca, mom me cunyi yin. Piŋo kuc ame an atye kede me timo ginnoro-ni ogeŋo oko pi tam me cuny dano ocele?

³⁰Ka an anywako cem kun apwoo Obaŋa, piŋo oyeta pi gin a doŋ atyeko pwoyo Obaŋa pire?

³¹Doŋ kadi icamo onyo imato wunu onyo gin ame itio wunu luŋ, tim wunu ducu pi miyo Obaŋa kwogo.

³²Kur ibal wunu cuny Ojudaya, kadi jo Grik, onyo lwak jo oye Obaŋa,

³³acalo an daŋ atemo yomoro cuny jo luŋ i gin ame aŋeo ducu, kun mom alaro pi gin a konya, cite alaro pi gin a konyo jo apol, me gin larre.