Read lango 1 Korinti 11 Bible Online

1 Korinti 11 - lango bible

1 Korinti 11

¹Wop wunu kitena, acalo an daŋ awopo kite a Kricito.

²Apwoowu pien i kop luŋ ipoyo wunu an, kun ilido wunu pwony a rik akelliwu.

³Cite amito iŋe wunu ni wi ico acel acel en Kricito, wi dako en cware, wi Kricito en Obaŋa.

⁴Ico moro-ni a kwao Obaŋa, onyo a rabo kop Obaŋa, kun owumo wie oko nwoŋo oketo lewic i wie;

⁵cite dako a kwao Obaŋa onyo a rabo kop Obaŋa a kun mom owumo wie, nwoŋo oketo lewic i wie, pien mom tye apoka poka moro baŋe kede dako olyelo wie.

⁶Ka dako pe wumo wie, ber en mwor yer wie oko. Doŋ ka bedo me lewic dako ilyelo wie, onyo mworo wie, myero doŋ wum wie oko.

⁷Ico mom myero wum wie, pien en cal Obaŋa kede kwogo Obaŋa; cite en dako kwogo ico.

⁸Ico rik mom oketo iya i kom dako, dako en ame oya i kom ico.

⁹Ico rik mom oketo pi dako, dako oketo pi ico.

¹⁰En omio dako myero bed anyut me twer i wie, pi omalaika.

¹¹Ento i Rwot, mon pe twero Cuŋ kengi aboŋo co, co daŋ mom twero Cuŋ kengi aboŋo mon;

¹²pien acalo dako rik otio iya ikom ico, i kite acellono ico daŋ dako a nywalo, dok jami luŋ ya i baŋ Obaŋa.

¹³Koŋ iŋol wunu kenwu; nen aber ka dako okwao Obaŋa kun mom owumo wie?

¹⁴Anaka kite ame onywalowa kede daŋ mom pwonyowu ni ka ico opito yer wie, lane?

¹⁵Cite dako ka opito yer wie bedo me kwogo baŋe, pien omie yer aboco-nono me wumere kede.

¹⁶Cite ka ŋattoro mito kela iye pyem, wan mom otye i kodi kite-nono, mom daŋ tye i akina lwak jo oye Obaŋa luŋ.

¹⁷Acikowu kun daŋ atye i koppogo ame mom yia yom iye i komwu, pien cokerewu konnyoro mom iye, kela ka bal keken.

¹⁸Kop me agege atyeko winyo ni, ka lwak ocokere karacel, apokapoka bedo tye i akinawu. An daŋ tuŋ cel aye koppono,

¹⁹pien eryoŋettogo myero bed i akinawu, me jo a tye aber nen oko kannaler.

²⁰Pien ka icokere wunu karacel mom gire icamo wunu cam a Rwotwa,

²¹pien wun ducu ŋat acel acel ŋuko camo cemmere kene, kun jo mogo buto iye kec, mogo luŋyo mer amera.

²²Pacciwu mom bo, me cem kede me mat? Onyo icao wunu lwak jo oye Obaŋa, ite keto wunu lewic i kom jo a mom i ginnoro? Myero akobbiwu niŋo? Myero apwowu? Pe gire atwero pwoyowu i kop-pi!

²³Pien pwony ame apwonyowu kede, Rwot en omia, ni, i dyewor a rik oketo erupe i kome iye-nono, Rwot Yecu omako ogati;

²⁴ka doŋ opwoo, onyinyilo, omiogi kun kobo ni, “Man en koma ame tye pirwu. Tim wunu man me poyo an,”

²⁵Amannono ka gin ocamo otum, otiŋo ikopo kun kobo ni, “Ikopo man en cikere anyen i remona. Tim wunu man kare luŋ ame imato wunu, me poyo an.”

²⁶Pien i kare luŋ ame icamo wunu ogati man, dok daŋ imato wunu ikopo-ni, nwoŋo ilalo wunu kop me to a Rwot, ituno ka en bino dwogo.

²⁷En omio ka dano ocamo ogati man, onyo omato ikopo man a kun kite mere mom myero, nwoŋo en odoko abal i kom kom kede remo a Rwot.

²⁸Dano acel acel myero kwon ŋiye kene, en amio en te camo ogati-ni kede mato gin iyi ikopo-ni.

²⁹Pien ŋat a camo onyo mato a kun mom oniaŋ aber te kop me kom Rwot, nwoŋo en akelo ŋolo kop i kome kene ka ce en ocamo onyo omato.

³⁰Mano en gin omio polwu two, daŋ igoro wunu, jo apopol otyeko to oko.

³¹Kono rik oŋolo kop i komwa kenwa kakare, kono mom oŋolliwa kop.

³²Doŋ ka Rwot tye aŋolliwa kop, en nwoŋo apwodowa me pwonyowa, me kur ŋol kop loowa karacel i jo me lobo.

³³Doŋ ba, omegona, ka icokere wunu me camo cam a Rwotwa, ŋat acel acel myero koŋ kur wadgi.

³⁴Ka ŋat a kec aneko, myero en ge cem i paco, me kur kop lowa ka ocokere wunu. Kop ocele ame odoŋ, abino yiko ka atuno.