Read lango 1 Korinti 12 Bible Online

1 Korinti 12 - lango bible

1 Korinti 12

¹Aco kop i kom mot a ya i baŋ Cuny Acil, omegona, amito iniaŋ wunu iye.

²Iŋeo wunu ni a rik pwod mom ru iŋeo wunu Obaŋa, rik irwenyo wunu ata baŋ cal jogi a mom kobo, kan ame owirowu luŋ.

³Pi mannono, amito iniaŋ wunu ni, mom tye ŋattoro ame Cuny Obaŋa mio kobo ni, “Yecu oceno”; daŋ mom tye ŋattoro a twero kobo ni, “Yecu en Rwot,” kono ka Cuny Acil en a mie kobo.

⁴Mot tye a kwongi papat, cite Cuny gire tye acel.

⁵Tic tye a kwongi papat ame otio pi Rwot, ento Rwot tye acel.

⁶Teko Obaŋa tio i yo apapat, cite en Obaŋa acellono en ame tio i yore luŋ i jo luŋ aluŋa.

⁷Dano acel acel tye anyut me cuny ame konyo lwak.

⁸Cuny mio dano acel kwena me ryeko; en Cuny acel-lu mio dano ocele kwena me ŋec.

⁹En Cuny acel-lu mio iyee baŋ ŋat ocele, i baŋ dano ocele en Cuny acel-lu mio mot me caŋo jo;

¹⁰baŋ ŋat ocele en mio mot me tiyo ginawura, baŋ ŋat ocele rabo kop Obaŋa acalo adwarpiny, baŋ ŋat ocele ryeko me poko i kin cuny apapat, baŋ ŋat ocele dumo leb apapat, baŋ ŋat ocele ryeko me gonyo leb apapat.

¹¹Cite en Cuny acellono en a tio tic i mot magi luŋ; en poko mot apapat baŋ dano acel acel acalo en mito.

¹²Pien Kricito cal i kom acel ame tye iye dul apol; inwoŋo pwod en kom acel, kadi otye dul apol.

¹³Pien wan luŋ, Ojudaya kede jo Grik, opii kede jo a loye kengi, wan obatija odoko kom acel i Cuny acel-lu, wan luŋ omato en Cuny acel-lu.

¹⁴Pien kom dano mom tye iye dul acel, ento tye iye dul apol.

¹⁵Kono ka tyen rik kobbi, “Pien an gira mom a ciŋ, an mom a dul kom,” mannono mom mone bedo dul kom.

¹⁶Dok kono yit rik kobbi, “Pien an gira mom a waŋ, an mom a dul kom,” mannono mom mone bedo dul kom.

¹⁷Ka kono kom luŋ obedo waŋ, kara kono cwinyo kop iŋo? Dok kono kom luŋ obedo yit, kara kono eŋweo niŋo?

¹⁸Cite kite a tye kede ni, Obaŋa doŋ oketo dul apapat i kom, dul acel acel acalo en mito.

¹⁹Ka kono gin luŋ obedo dul acel keken, kom kono obedo kwene?

²⁰Acalo tye-ni, tye dul apol, cite kom gire en acel.

²¹Waŋ mom twero kobbi ciŋ ni, “An mom amiti gira.” Wic mom twero kobbi tyen ni, “An gira mom amitowu.”

²²Akaka mannono, dule maka me kom ame otamo ni goro mitte meicel,

²³dok daŋ dule maka me kom ame otamo ni kwogogi mom, dule-naca en ame oruko kede kwogo akato,

²⁴a kun dule komwa a nen aber mom dok mito ginnoro. Obaŋa orurubo dule me kom kun mio kwogo adwoŋ akato baŋ dule a kwogogi nok,

²⁵me wek apokapoka bed mom i kom, cite me dul acel acel par pi dul wadgi.

²⁶Ka dulloro acel arem, dule kom acele daŋ rem karacel kede; ka opako dul acel, dule ocele-gu daŋ notte ilelo kede.

²⁷Doŋ ba, wun luŋ ibedo wunu kom Kricito, dano acel acel en dul kom Kricito.

²⁸Cite Obaŋa doŋ oketo jo magi i lwak jo oye Kricito: me agege okwena, me aryo mere odwarpiny, me adekkere opwony, kede dok jo a tio ginawura, lubere kede jo ame omiogi mot me caŋo jo, jo a tio tic me konyo jo, jo a romo loyo tic, kede a dumo leb apapat.

²⁹Jo luŋ obedo okwena bo? Jo luŋ obedo odwarpiny?

³⁰Jo luŋ tye i mot me caŋo jo? Jo luŋ dumo leb apapat? Jo luŋ gonyo leb?

³¹Ket wunu cunywu i nwoŋo mot a pirgi dito.