Read lango 1 Korinti 13 Bible Online

1 Korinti 13 - lango bible

1 Korinti 13

¹Aman doŋ amito nyuttiwu yo a dok ber kato. Ka adumo i leb jo kede me omalaika, kun mom atye kede mar, abedo bala olaŋ a kok, kakaŋ a kok aloŋo.

²Ka arabo kop Obaŋa acalo adwarpiny, kun aniaŋ i muŋ luŋ, daŋ atye i ŋec luŋ, dok ka abedo kede iyee ducu, ame aromo kobo kiddi adoŋo kan ocele, kun mom atye kede mar, an mom a ginnoro.

³Ka apoko jami luŋ ame atye kede, ame daŋ ajalo koma me waŋ kede mac, kun mom atye kede mar, mom konya i ginnoro.

⁴Mar dio cunye, daŋ akica; mar mom anyeko, mom wakere;

⁵mom yon, mom tio gin a mom myero, mom yenyo gin a tiko kome kene; yie mom kec, mom kwano gin arac ame otimo i kome;

⁶cunye mom bedo yom i tim a mom atira, ento cunye yom i kop me ateni.

⁷Mar dio cunye i jami luŋ aluŋa, ye kop ducu, tye kede gen i kare luŋ, kanyakino i jami luŋ.

⁸Mar mom gik; dwaro piny bino tum oko; kadi dumo leb bino gik oko; kadi ŋec bino tum oko.

⁹Pien wan oŋeo dullogo anonok keken, odwarpiny tito dulloro anonok keken;

¹⁰cite ka en a tye alutu obino, gin obedo dudul bino gik oko.

¹¹A rik an atin, akobo bala atin, aparo bala atin; aman a doŋ ateggo-ni, doŋ atyeko weko kite me tino.

¹²Gin ame wan oneno amanni cal i tipo a nen ribiribi i araŋ; cite i kare ca obino nenne wunu waŋ i waŋ. Aman an aŋeo dulloro keken; cite i kare ca abino bedo i ŋec ducu aduca.

¹³Doŋ ba, gin adekki bedo atwal; iyee, gen, mar; ento en a pire dit a katogi luŋ, en mar.