Read lango 1 Korinti 14 Bible Online

1 Korinti 14 - lango bible

1 Korinti 14

¹Lolle wunu pi nwoŋo mar; ketto wunu cunywu daŋ i nwoŋo mot me cuny, akato luŋ mot me rabo kop Obaŋa acalo adwarpiny.

²Pien dano a dumo leb apapat mom kobo i jo, cite nwoŋo en akop Obaŋa. Ŋat a winyo koppere mom; nwoŋo en akobo muŋ me Cuny Acil.

³Cite dano a rabo kop Obaŋa kobo i jo kun doŋo iyeegi, cuko cunygi, kweo yigi.

⁴Dano a dumo leb apapat doŋo ka iyee mere kene; ento dano a rabo kop Obaŋa nwoŋo adoŋo lwak jo oye Kricito.

⁵Amito ni wun idum wunu leb apapat, cite akato ducu amito irab wunu kop Obaŋa. Dano a rabo kop Obaŋa pire dit akato ŋat ame dumo leb apapat, kono ka nwoŋo ogonnyi jo gin ame en kobo, me kony lwak jo oye Kricito i doŋo.

⁶Omegona, kara ka an abino tuno baŋwu kun adumo leb apapat, abino bedo kede kony aŋo baŋwu, ka mom akelliwu kopporo ame Obaŋa oyabba, onyo ŋeccoro, onyo kopporo acalo mea adwarpiny, onyo pwonnyoro?

⁷Anaka kadi gin a mom kede kwo, ame kok, calo nyamulere onyo tum, ka mom dwone owinyere aber, jo bino niaŋ iŋo i wer ame akutto onyo agoyo?

⁸Kede gwara daŋ, ka mom okuto kede lwoŋo aber, kara ŋa abino yikere i lweny?

⁹En i yo acellono, ŋa abino niaŋ i gin ame ikobo wunu ka idumo wunu leb apapat, kun ikobo wunu kop a mom niaŋere? Kopwu bino ke i yamo ata.

¹⁰Tye kwone leb apol meicel i wi podo a daŋ gin luŋ papat, cite pe tye moro ame te koppere mom.

¹¹Ka mom aŋeo leb a dano moro-ni akobo, an amyere baŋe, en daŋ amyere baŋa.

¹²Doŋ kittono ba, wun daŋ acalo iketo wunu cunywu i nwoŋo mot me cuny, tem wunu loyo jo ocele luŋ i gin ame doŋo lwak jo oye Kricito, mio cuŋ atek.

¹³Pi mano, dano a dumo leb apapat ber kwa Obaŋa konye me gonyo tere.

¹⁴Pien ka akwao Obaŋa a kun adumo aduma, cunya kwao, cite nwoŋo tamma mom timo ginnoro iye. Kara atim ŋo doki?

¹⁵Abino kwayo Obaŋa kede cunya kun akwao kede tamma daŋ; abino wer kede cunya kun awero i tamma daŋ.

¹⁶Ka mom amanno, ka ipwoo Obaŋa i cunyi keken, dano a tye i kabedo a jo ocele ata a mom tye kede mottono twero gamo “Amen” i pwoeci-ni i kite mene, a kun mom oniaŋ i gin ikobo?

¹⁷Kadi bed imio pwoc aber, mom konyo dano ocele ca i doŋo kadi acelloro.

¹⁸Apwoo Obaŋa pien an adumo leb apapat akato wun luŋ,

¹⁹cite i cokere a lwak jo oye Kricito amito kobo kop kannyoro keken kede tamma me apwony i jo ocele, akato kobo kop tutumia i tutumia a kun adumo leb aduma.

²⁰Omegona, kur ibed wunu bala itino i tamwu. I timo gin arac myero ibedu itino atino, cite i tamwu bedu jo oteggo.

²¹I cik rik ocoo ni, “Abino kop kede rok man i leb a jo dumo aduma, kede i dog jo ame omyere; cite kadi bed amannono, gin mombino winyo doga, man kop a Rwot.”

²²Mano nyuto ni dumo leb apapat omio me bed anyut baŋ jo a mom oye Kricito, mom baŋ jo oye, ento rabo kop Obaŋa tye pi jo oye, mom pi jo a mom oye.

²³Doŋ ba, ka lwak ducu ame oye Kricito ocokere karacel kun jo luŋ iye adumo leb apapat, eka jo ocele ata, onyo jo a mom oye te bino iye, mom gin bino kobo ni wun i baŋe?

²⁴Cite ka jo luŋ tye akobo kop Obaŋa acalo odwarpiny, eka dano moro a mom oye, onyo dano moro ata te bino i ot, en bino niaŋ i ballere pi gin a en owinyo i baŋ jo luŋ; kopa jo luŋ okobo bino ŋolle kop,

²⁵muŋ iyi cunye en bino kela oko kannaler, eka, te bino ryebere piny, woro Obaŋa kun tuco ni, “Iyi ateni, Obaŋa kara tye i akinawu.”

²⁶Kara doŋ ŋo, omegona? Ka icokere wunu, dano acel acel nwoŋo tye kede ginnoro; moro tye i wer, moro tye i pwony, moro tye i kop ame oyabbe, moro dumo leb apapat, moro ocele nwoŋo ŋeo gonyo tere. Gin-ni luŋ myero timere i yo a konyo doŋo lwak jo oye Kricito.

²⁷Ka adumo leb apapat, myero bed jo aryo onyo adek, kur kat wellono, kun oleo alea, ŋat acel gonyo tere.

²⁸Cite ka mom tye ŋattoro a gonyo, myero ŋat a mito kop i leb apapatono liŋ aliŋa i cokere a lwak jo oye Kricito, en kob kene kede Obaŋa.

²⁹Aco jo a rabo kop Obaŋa, aryo onyo adek twero kop, kun jo ocele mere-ni ŋio kop a gin akobbo.

³⁰Ka ce Obaŋa oyabo kopporo baŋ ŋat ocele ame obedo piny, dano a woki akop ca myero liŋ oko.

³¹Pien wun luŋ itwero rabo wunu kop Obaŋa kun ileo wunu alea, me jo luŋ pwonyere, dok daŋ ocuk cunygi.

³²Jo a rabo kop Obaŋa acalo odwarpiny twero bwoyo cuny ame omiogi me rabo kop;

³³pien Obaŋa mom won arubaruba, en gire won kuc. Acalo lwak jo Obaŋa luŋ,

³⁴mon myero liŋ iti i cokere. Pien pe oyegi me kop; gin myero bed i te bwoc, acalo cik daŋ okobo.

³⁵Ka ce gin mito ŋeyo kopporo, myero gin peny coggi i paco. Bedo gin me lewic meicel, dako ikop i cokere a lwak jo oye Kricito.

³⁶Onyo ca itamo wunu ni kop Obaŋa rik oya i baŋwu, dok obino baŋwu wun keken?

³⁷Ka ŋattoro tamo ni en arab kop Obaŋa onyo etye i mottogo me cuny, myero en ŋe ni, kop ame acoyiwu ni en cik oya i baŋ Rwot.

³⁸Cite ka en mom oketo man i tam, mom daŋ obino keto tam i kome.

³⁹Doŋ ba, omegona, ket wunu cunywu i rabo kop Obaŋa, dumo leb apapat daŋ kur igeŋ wunu.

⁴⁰Ento ginnoro luŋ myero tim i kite aber, i yore i yore.