Read lango 1 Korinti 15 Bible Online

1 Korinti 15 - lango bible

1 Korinti 15

¹Omegona, amito poyo wiwu i amut aber a rik arabo baŋwu, a doŋ igamo wunu, en daŋ a doŋ icuŋ wunu iye;

²en ame ilarre wunu pire, ka doŋ imako wunu atek i kit a rik arabbiwu, ka mom iye wunu nono.

³Pien kop a nwaŋ amiowu a pire dwoŋ me agege, en kop a rik omia, ame kobo ni, Kricito rik oto pi balwa, kun lubo coc a rik ocoo;

⁴dok daŋ ni oyike, ote cere i nino me adekkere, kun lubo coc a yam ocoo,

⁵dok ni rik onen baŋ Petero, eka te nen baŋ jo apar wie aryo ca.

⁶Te dok nen baŋ omego a kato mia abic awaŋacel; i kom jo-nono pollere pwod tye kwo, kadi mogo doŋ onino.

⁷Dok te nen baŋ Yakobo, icennere baŋ okwena luŋ aluŋa.

⁸Me agikki mere ducu, te daŋ nen baŋ, kadi bed abedo bala atin abwoggi.

⁹Pien an atidi meicel i akina okwena luŋ, ame mom myero lwoŋa ni an akwena, pien rik awuno lwak jo oye Kricito.

¹⁰Pi winyo ame Obaŋa omia en omio atye acalo atye-ni; winyo mere a tye baŋa-ni rik mom obedo me nononono. Rik abin amedde meicel i tiyo tic atek akato jo-nono luŋ; cite pe an gira atio, ento winyo Obaŋa en otio karacel keda.

¹¹Doŋ kadi an kadi gin jo-nono, kop a wan orabo en ennono, kop ame iye wunu daŋ ennono.

¹²Doŋ ka kwena ame arabo tito ni ocero Kricito iyi akina a jo oto, piŋo jo mogo i akinawu okobo ni cer a jo oto mom tye.

¹³Ka cer a jo oto mom tye, Kricito daŋ gire mom ocero.

¹⁴Aco do, ka Kricito rik mom ocero, kwena ame orabo doŋ yore mom. Anaka iyee megwu daŋ yore mom.

¹⁵Medo kede enno, wan daŋ ocaden me goba i kom Obaŋa, pien wan okobo kop i kom Obaŋa ni en ocero Kricito, cite ka cero jo mom tye, rik daŋ mom ocere.

¹⁶Pien ka cero jo oto mom tye, Kricito daŋ rik mom ocero.

¹⁷Cite ka Kricito rik mom ocero, kony me iyeewu daŋ mom, nwoŋo pwod itye wunu i balwu.

¹⁸Man doŋ tere ni jo onino i Kricito doŋ orwenyo oko odoco.

¹⁹Ka genwa i kom Kricito konyo ka i kwo me kare-ni keken, wan doŋ otye arac akato jo luŋ.

²⁰Cite iyi ateni mere, Kricito doŋ ocere oko iyi akina a jo oto, en tye acalo wi mwaka a jo onino oko.

²¹Pien dano en ame okelo to, dok daŋ cer a jo oto dano en ame okelo.

²²Pien acalo jo luŋ to iyi Adam, en i kite acellono jo luŋ obino miyogi kwo iyi Kricito.

²³Ento ŋat acel acel i kakare: me agege Kricito, me wi mwaka, eka icennere jo a Kricito i kare me dwogo mere.

²⁴Eka agikki piny te bino tuno, ame Kricito bino miyo iye loc iciŋ Obaŋa Papo, ame doŋ otyeko turo kwone loc kede twer kede teko luŋ.

²⁵Pien en myero bed i loc, ituno ka Obaŋa bino keto okworrere luŋ piny i te tyene.

²⁶Akwor ame obino turo me agikki en to.

²⁷Pien rik ocoo ni, “Obaŋa oketo jami luŋ i te twerrere.” Ka okobo ni “oketo jami luŋ,” nen kannaler ni mom okwano iye Obaŋa ikome, ame oketo jami luŋ aluŋa i te loc a Kricito.

²⁸Ka doŋotyeko keto jami luŋ i te loccere, en Wod ikome daŋ obino keto i te loc Obaŋa, me Obaŋa doŋ bed jami luŋ iyi jami luŋ.

²⁹Eyo, ka jo oto mom bino cer, kara doŋ tye niŋo baŋ jo a batija pi jo oto? Ka ce cero jo oto mom tye kadi acelloro, kara piŋo dok gin batija pirgi?

³⁰Piŋo wan daŋ ocuŋ kan arac caa luŋ?

³¹An gira ato nino luŋ, omegona; mannono akobbiwu atir, pi wakere ame atye kede i komwu i Rwotwa Yecu Kricito.

³²Ka rik aromo kede leyi ager i Epeco, acalo jo kobe-ni, kara konnyene ame anwoŋo iye? Ka cero jo oto mom tye, doŋ ber “ocamu, omatu, pien diki wan obino to.”

³³Kur imi bwolwu: “Bedo i jo areco balo kite abeco.”

³⁴Dwog wunu cen i tam atira a mom me mero, ite giko wunu bal. Pien jo mogo mom tye i ŋeccono i kom Obaŋa. Akobo man me alee twodwu.

³⁵Cite gwok onyo ŋattoro bino penyo ni, “Jo oto ocerogi niŋo? Kite kommene a dok gin bino nwoŋo?”

³⁶Yin imiŋ amiŋa! Ka icoo koti i poto, pe nwoŋo kwo, kono ka koŋ oto oko.

³⁷Gin a yin icoo en koti nono, onyo koti kal onyo koti me kite ocele, mom kom ginapita ame bino doŋo.

³⁸Cite Obaŋa mie kom acalo rik oyero, koti acel acel kede kit kome.

³⁹Riŋo kom gin akwo luŋ mom bedo rorom; mea dano pat, mea leyi pat, mea winyi pat, mea rece daŋ pat.

⁴⁰Dok daŋ tye kom me polo kede kom me lobo; ento kwogo a maca me polo i yore, kede kwogo a kom me lobo daŋ i yore.

⁴¹Cen tye kede kwogo mere, kwogo a dwe daŋ pat, kede acer-gu daŋ kwogogi papat; pien kadi i akina acer tye iye kwogo papat.

⁴²Tye daŋ amannono i kom cer a jo oto. Koti ame ocoo en gin atop; ka doŋ ocero mom dok to.

⁴³Ocoo ame kwogo mere pe, ocero ame kwogo mere tye; ocoo ame goro, ocero ame tye kede teko.

⁴⁴Ocoo i kom me lobo man, ocero i kom me cuny. Ka tye kom me lobo man, anaka kom me cuny daŋ tye.

⁴⁵Rik ocoo ni, “Dano me agege, Adam, odoko gin akwo”; cite Adam me agikki odoko cuny a mio kwo.

⁴⁶Mom kom me cuny en a kwoŋo bino, cite kom me lobo man; eka me cuny te bino icennere.

⁴⁷Dano me agege rik otio kede apua me Iobo; dano me aryo mere oya i polo.

⁴⁸Jo me lobo cal i dano ame otio kede lobo; aco jo me polo daŋ ocal i dano oya i polo.

⁴⁹Doŋ acalo wan oruko cal a dano ame otio kede lobo, amannono daŋ obino ruko wunu cal a dano ame oya i polo.

⁵⁰Man en gin ame akobbiwu, omegona, ni, gin a tye i kom kede remo mom twero nwoŋo loc Obaŋa, gin a top daŋ mom twero nwoŋo gin a mom top.

⁵¹Koŋ iwiny wunu muŋ man, ni, mom wan luŋ obino nino, cite wan ducu obino lokowa,

⁵²ipao, bala waŋ atutuba, ka apel me agikki okok. Pien apel bino kok, eka ote bino cero jo oto kun mom dok obino to, wan daŋ obino lokowa.

⁵³Pien gin abaile myero rukere kede gin a mom balle, gin a to-ni myero rukere kede gin a mom to.

⁵⁴Ka gin a baile doŋ orukere kede gin a mom baile, dok ka gin a to doŋorukere kede gin a mom to, eka kop a rik ocoo te bino cobere kakare, ni, “To doŋ omwonyo oko, oloo oko atwal.”

⁵⁵“To we, ane locci kara? To we, ane kwirri kara?”

⁵⁶Kwir a to en bal, teko a bal tye i cik.

⁵⁷Ento myero opwoo wunu Obaŋa ame miowa loc pi Rwotwa Yecu Kricito.

⁵⁸Pi mannono, omegona ame amaro, cuŋ wunu ikiŋ aboŋo yeŋere, kun imedde wunu i tic a Rwot nino luŋ, kun iniaŋ wunu ni, i Rwotwa lollewu mom me nono.