Read lango 1 Korinti 16 Bible Online

1 Korinti 16 - lango bible

1 Korinti 16

¹Aco kop a mako rayo lim me konyo jo Obaŋa: kit a rik aciko lwak oye Kricito me Galatia ni oti, wun daŋ tim wunu amannono.

²Nino a geo me cabit acel acel, dano acel acel i akinawu myero pok limmogo ket pat, kun lubo kit a en nwoŋo, eka te kano, me kur ra limwu i koma, a doŋ an abino.

³Ka en atuno abino cwayo jo ame wun iyero wunu me wot tero motwu i Jerucalem, kun amiogi waraga.

⁴Aco ka ce nen ni ber an daŋ iwot, gin bino wot karacel keda.

⁵Abino tuno baŋwu a doŋ awoto abeo i Makedonia, pien abino bea i Makedonia.

⁶Gwok onyo abino dikere baŋwu pi kare mogo, aŋar onyo pi kare me koyo ducu, me ite konya wunu i wotta kan ame abino dok wot iye.

⁷Pien mom amito nenowu me i malo malo; ageno ni abino bedo baŋwu kare alalac, ka Rwot oye.

⁸Ento abino bedo i Epeco ituno i kare me Pentekote,

⁹pien doŋ oyabba yo alac me tiyo tic atek, dok jo a geno tic pol.

¹⁰Ka Temoteo obino, nen wunu ni en obedo baŋwu aboŋo Iworo moro, pien en daŋ tio tic a Rwot bala an ikoma,

¹¹ŋattoro mom myero cac, ento konye wunu me ewot i kuc, me tun baŋa, pien akure kede omegowa.

¹²Kop i kom ominwa Apolo, rik akwae meicel ni koŋ tun baŋwu, karacel kede omego ocele, en mom te mito bino kadi acelloro, i kare-ni; cite doŋ bino tuno ka ce en onwoŋo kare aber.

¹³Kiu piny, cuŋ wunu ikiŋ i kom iyeewu, bed wunu co ikome, bedu kede teko.

¹⁴Gin itimo wunu ducu, tiu kede mar.

¹⁵Akwaowu ba, omegona. Iŋeo wunu Citepana kede jo ame i ode, ni gin jo ame ogeo doko Okricitayo i lobo Akaya, daŋ gin omiye kengi i tic pi jo Obaŋa.

¹⁶Doŋ wun daŋ ba, myero iwiny wunu kodi jo-nono, kede jo ocele luŋ ame lolle kun otio karacel kedgi.

¹⁷An cunya yom i bino a Citepana gin kede Portunato kede Akaiko, pien gin ocuŋ akakarwu.

¹⁸Gin doŋ odwoggo cunya, kede cunywu daŋ. Kodi jo-nono myero itamu pirgi.

¹⁹Lwak jo oye Kricito luŋ a tye i Acia omotowu. Akwila kede Puricika omotowu atek i Rwot, karacel kede lwak cokere jo oye Kricito a i otgi.

²⁰Omego luŋ omotowu. Motte wunu kenwu kenwu kede amot acil me mar.

²¹An Paulo amotowu i coc me ciŋa.

²²Ŋat a mom maro Rwot myero cen oko. Biye Rwotwa!

²³Winyo a Rwotwa Yecu bed kedwu.

²⁴Mar mera bed kedwu luŋ i Kricito Yecu. Amen.