Read lango 1 Korinti 2 Bible Online

1 Korinti 2 - lango bible

1 Korinti 2

¹Eyo omegona, an rik abino baŋwu aboŋo kopporo onyo ryeko moro amalo i kare ame arabbiwu amut aber i kom muŋ me yik Obaŋa.

²Pien onwoŋo amoko ni mom amito ŋeyo ginnoro i akinawu, kono ka Yecu Kricito keken, kite ame ogure kede i kom yataria.

³Rik abedo kedwu kun agoro, alwor atek, koma daŋ myel atek.

⁴Koppa kede kwena ame arabo, rik mom obedo kopporo me ryeko me wayo tamwu, ento onyuto teko a Cuny Acil,

⁵me iyeewu kur cuŋ i kom ryeko a dano, ento i teko Obaŋa.

⁶Wan kono okobo ryeko baŋ jo ocwiny, ento ryeko ame mom me lobo man, onyo ryeko oloc me kare man, pien twergi tye doŋ arwenyo oko.

⁷Wan okobo giwa ryeko Obaŋa me i muŋ, ame okano, ryeko ame Obaŋa rik oyiko con i con me kelliwa kwogo.

⁸Mom tye aloccoro me lobo man ame oniaŋ iye; kono rik gin oniaŋ, kono mom rik oguro Rwot, won kwogo, i kom yataria.

⁹Cite acalo rik ocoo ni, “Gigi mogo a wan mom oneno kede a yit mom owinyo, gigi mogo a mom odonyo i tam a dano, ginnogo en ame Obaŋa oyiko pi jo a mare,”

¹⁰dok gin en ame Obaŋa omio Cuny Acil onyutogi baŋwa. Pien Cuny Acil ŋio jami luŋ, anaka tam i yi Obaŋa.

¹¹Ŋa a ŋeo tam i yi dano ocele, kono ka cuny dano-nono keken ame tye i yie? Kite acellono, mom tye ŋattoro a ŋeo tam Obaŋa, kono ka Cuny Obaŋa keken.

¹²Wan rik mom omiowa cuny me lobo, ento omiowa Cuny ame oya i baŋ Obaŋa, me oniaŋ mot ducu ame Obaŋa miowa pi kica mere.

¹³Mano en gin a wan okobo; wan mom okobo kop ame opwonyo i ryeko a dano, ento kop ame Cuny Acil opwonyowa kede, kun nyuto kop me Cuny baŋ jo a tye Cuny Obaŋa.

¹⁴Ento dano a mom i Cuny Obaŋa, mom twero gamo gin ame Cuny Obaŋa mio, pien i tuŋ baŋe, obedo gin me miŋo; en mom twero niaŋ iye pien kodi ginnono oŋio i Cuny.

¹⁵Dano a tye kede Cuny Obaŋa ŋio jami luŋ, cite en ŋat a ŋie mom,

¹⁶“Ŋa a ŋeo tam a Rwot? Ŋa a yam mie tam?” Ento wan otye kede tam a Kricito.