Read lango 1 Korinti 3 Bible Online

1 Korinti 3 - lango bible

1 Korinti 3

¹Ento wun omegona, an rik mom atwero kop kedwu bala jo a doŋ tye kede Cuny Obaŋa, cite akobo kedwu acalo jo a tye i kite me anywalli, acalo itino okere i Kricito.

²Rik apitowu kede cak, pe i cam ikome, pien rik onwoŋo mom ru itwero wunu cam; kadi amanni daŋ mom ru itwero wunu cam,

³pien wunu pwod itye wunu i kite me anywalli. Kara ka nyeko pwod tye i akinawu, kun ida wunu kenwu kenwu, mom nwoŋo pwod itye wunu i kite me anywalli, kun pwod ilubo wunu kite a dano?

⁴Ka dano moro i akinawu kobo ni, “An gira a dano a Paulo,” eka ŋat ocele ni, “An gira a dano Apolo,” mom nwoŋo wun pwod ibedo wunu dano adana?

⁵Kara Apolo en ŋa? Paulo en ŋa? Wan otic ame omio iye wunu Yecu. Ŋat acel acel tye kede gin a Rwot opokke.

⁶An rik apito koti, Apolo oonyo iye pii, ento Obaŋa omio odoŋo.

⁷Doŋ akadi ŋat opito onyo ŋat oonyo pii, gin ducu mom oginnoro kono ka Obaŋa keken ame miyo jami doŋo,

⁸ŋat opito kede aony pii, gin ducu orom, ŋat acel acel bino nwoŋo ocara mere a rom i tic a en otio.

⁹Pien wan otic karacel i Obaŋa; wun ibedo wunu poto Obaŋa, daŋ ibedo wunu gedo Obaŋa.

¹⁰Pi winyo Obaŋa ame omia, omio an rik acako tere bala twon agedo ame adiro; dano moro ocele tye agero i wie. Cite dano acel acel myero gwokere i kite egero kede.

¹¹Pien acakki tere ocele mom tye ame otwero cibo, kono ka maca a doŋ tye, en Yecu Kricito.

¹²Cite ka ŋattoro ogero i wi acakki tere-nono i jabu onyo i ryal, onyo gweŋe me wel, onyo yen, onyo lum, onyo aladu,

¹³tic a ŋat acel acel bino nen oko kannaler. Pien Nino-naca bino nen i mac, ame bino yeko tic a dano acel acel, nyuto kit a tye kede oko.

¹⁴Ka gedo a ŋattoro odoŋ, ame ogero i kom acakki tere-nu, dano-nono bino nwoŋo mot me pwoye.

¹⁵Aco ka ŋat a gedo mere owaŋ oko, en mom bino nwoŋo mottoro me pwoye, cite en ikome bino bwot, acalo ŋat obelo mac abela te kato.

¹⁶Mom iŋeo wunu ni wun ibedo wunu ot woro Obaŋa, dok Cuny Obaŋa bedo i yiwu?

¹⁷Doŋ ka ŋattoro onyoto ot Obaŋa, Obaŋa daŋ bino nyote oko; pien ot woro Obaŋa cil, wun ikomwu ibedo wunu ot Obaŋanono.

¹⁸Kur ŋattoro bwolle kene. Ka ce dano moro i akinawu tamo ni en eryek i lobo man, myero en koŋ dok amiŋo, me wek edok aryek.

¹⁹Pien gin ame jo me lobo man tamo ni obedo me ryeko i nyim Obaŋa bedo gin me miŋo. Pien rik ocoo ni, “En mako jo aryek i ryekogi kengi,”

²⁰dok ni, “Rwot ŋeo ni tam oryeko tere mom.”

²¹Doŋ myero ŋattoro kur wakere i kom dano, pien jami luŋ megwu;

²²kadi Paulo, onyo Apolo, onyo Kepa, onyo lobo man, onyo kwo, onyo to, onyo gin ame tye amanni, onyo gin ame bino bedo anyim; magi-nono luŋ megwu;

²³wun daŋ mea Kricito, aco Kricito me Obaŋa.