Read lango 1 Korinti 4 Bible Online

1 Korinti 4 - lango bible

1 Korinti 4

¹Myero inenwa wunu acalo wan otic a Kricito, kede ogwok muŋ Obaŋa.

²Gin a mitte i baŋ ogwok jami, en ene ni, gin myero obed jo a genne.

³1 tuŋ baŋa kopporo pe ka iŋolla wunu kop, kadi okiko moro mea dano. An daŋ mom aŋolo kop i koma kena.

⁴Pien i tuŋ baŋa aŋeo ni cunya ler, cite man mom mia aloo kop. Rwot en a ŋolo koppa.

⁵Pi mannono, kur iŋol wunu kopporo a mom ru kare oromo, ape ru Rwot odwogo. En bino menyo gin ame opono i piny acol, dok bino nyuto tam a tye i cuny jo kannaler. I kare-nono Obaŋa bino pwoyo ŋat acel acel i kite a myero.

⁶Omegona, kop magi adwoggo i i koma kede i kom Apolo pirwu, me wek ipwonyere wunu i komwa te kop man, ni, “Kur ikatu gin ame ocoo”, me ŋattoro i akinawu kur wakere, kun dworo dano acel, cao ŋat ocele.

⁷Kara ŋa omio yin ibedo pat i jo ocele. Ŋo a yin itye kede a mom omii amia? Aco ka omii amia, pi ŋo iwakere kede acalo mom omii amia?

⁸Doŋ ityeko wunu yeŋ oko? Idoko wunu doŋ olonyo oko? Ityeko doko wunu rwode aboŋo wan? Kono onwoŋo amito atika ni idok wunu rwode, me wan daŋ obed rwode karacel kedwu.

⁹Pien i tuŋ baŋa nen ni, Obaŋa onyutowa wan okwena i nyim lwak icen, bala jo ame oŋolligi kop me to; pien wan doŋ odoko gin me anena pi wi podo luŋ, pi omalaika kede pi jo.

¹⁰Wan odoko omiŋo pi Kricito, cite wun iryek wunu i Kricito. Wan ogoro, wun itek wunu. Wun oketo kwogo i komwu, aco wan ocaowa.

¹¹Ituno amanni kec tye anekowa, oryo pii acirowa, oruko-gu opeke, jo cipowa adoŋ, pacowa-gu pe;

¹²ololle kun otio i ciŋwa kenwa. Ka jo oyetowa, olammigi winyo, ka owunowa, okanyo akanya;

¹³ka obalo nyiŋwa, wan onwotte giwa anwota. Wan doŋ ocalli yugi me wi podo, wan ocilo me jami luŋ, anaka tin.

¹⁴Mom acoo kop man me ami alee twodwu, cite me pwonyowu acalo itinona ame amaro.

¹⁵Pien kadi bed itye wunu kede jo tutumia i tutumia a telowu i yo a Kricito, papawu mom tye apol. An rik adoko papawu i Kricito pi amut aber.

¹⁶Akawaowu, potto wunu kitena.

¹⁷Man en gin omio acwao Temoteo baŋwu. En atinna i Rwot ame amaro, ame genne. En bino poyo wiwu i yo a an alubo i Kricito Yecu, ame apwonyo i lwak jo oye Kricito luŋ i kabedo ducu.

¹⁸Jo mogo i akinawu tye atamo ni an mom abino baŋwu, omio gin tye ka wakere.

¹⁹Cite ka Rwot oye, abino tuno baŋwu oyot, eka ate bino niaŋ te ko a jo a wakerenono, ento mom kop a gin kobo akoba.

²⁰Loc Obaŋa gire mom ocuŋ i kop ame okobo akoba ento i teko.

²¹Imito wunu ŋo? Myero abinniwu abiro onyo abin i mar kede cuny me mwolo?