Read lango 1 Korinti 6 Bible Online

1 Korinti 6 - lango bible

1 Korinti 6

¹Ka dano moro iyi akinawu tye i kopporo i kom wadgi, piŋo lewic mom make me pide i nyim jo a kitegi mom atira akaka pide i nyim jo Obaŋa?

²Mom iŋeo wunu ni jo Obaŋa bino ŋolli jo me loba kop? Kara ka wun ibino wunu ŋolli loba kop, mom iromo wunu ŋolo koppogo atitino mege?

³Mom iŋeo wunu ni wan obino ŋolli omalaika kop? Kara kop a tiko kwo ame wan otye iye-ni kono?

⁴Kara doŋ ka itye wunu i koppogo me kwo a wan otye iye-ni, piŋo itero wunu i nyim jo a mom pirgi dito baŋ lwak jo oye Kricito?

⁵Akobo man me alee twodwu. Ŋattoro mom i akinawu aryek a twero tyeko kop a tye i akina omego mere?

⁶Akaka timo amannono, dano moroni dok pido ominnere anaka i nyim jo a mom oye Kricito.

⁷Ka ipidde wunu kenwu kenwu, mom nwoŋo doŋ ityeko poto wunu oko? Twara twara ikany wunu gin arac. Twara koŋ iwek wunu jo bubuowu.

⁸Akaka timo amannono, wun ikomwu dok olunyo wunu timo jo rac, kede buyo anaka omegowu daŋ.

⁹Mom iŋeo wunu ni jo a mom kitegi atir, loc Obaŋa mom bino doko megi? Kur imi bwolwu; kadi otim tim me coco, onyo owor cal jogi, onyo ocod cot, on yo jo a buto i co wadgi,

¹⁰onyo okwo, onyo oworo me jami, onyo omero, onyo wegi ayet, onyo oyak, loc Obaŋa mom bino doko megi.

¹¹Jo mogo i akinawu rik daŋ obedo kodi jo-nono. Cite wun doŋ otyeko Iwokowu oko, otyeko lonyowu bedo jo acil, otyeko kwanowu ni wun jo a kitewu atira pi nyiŋ Yecu Kricito kede pi Cuny Obaŋawa.

¹²“Atwero timo jami luŋ.” Kakare; mano mom nyuto ni jami luŋ konyo. “Atwero timo jami luŋ,” cite mom abino ye ginnoro loka adoko opii mere.

¹³“Cem tye pi yic, yic tye pi cem.” Kakare, cite gin aryo-nono luŋ Obaŋa bino tyekogi oko. Kom mom tye pi tim me coco, ento tye pi Rwot, Rwot daŋ tye pi kom.

¹⁴Obaŋa cen ocero Rwot iyi akina a jo oto, dok bino cerowa daŋ i teko mere.

¹⁵Mom iŋeo wunu ni komwu obedo dul kom Kricito? Myero doŋ akwany dul kom Kricito, alok dok dul kom acaro? Pe twerre!

¹⁶Onyo mom iŋeo wunu ni dano ame notte kede alaya doko kom acel kede? Pien rik ocoo ni, “Gin aryo bino doko kom acel.”

¹⁷Cite ŋat a notte kede Rwot, doko cuny acel kede.

¹⁸Cacu tim me coco oko! Bal ocele luŋ a dano timo mom gudo kome; ento ŋat a timo tim me coco balo kome kene.

¹⁹Mom iŋeo wunu ni komwu en ot a Cuny Acil ame bedo i yiwu, ame Obaŋa omiowu? Wun mom imegwu kenwu.

²⁰Wun owilowu awila kede wel. Pi mannono, miu komwu ket kwogo i kom Obaŋa.