Read lango 1 Korinti 7 Bible Online

1 Korinti 7 - lango bible

1 Korinti 7

¹Doŋ me dok i kop ame ico wunu waraga pire: Ka dano mom ogudo dako, bedo ber,

²cite pi geŋo tim me coco, myero ico acel acel bed i cege, kede dako acel acel bed i cware.

³Ico myero cob mit a cege, dako daŋ cob mit a cware.

⁴Dako mom tye kede twer i kome kene, cware en a tye i twer i kome; amanono daŋ, ico mom tye kede twer i kome kene, cege en a tye kede twer iye.

⁵Kur itwon awotti komi, kono ka pi kare anonokkoro keken ame nwoŋo iyiko wunu ayika, me inwoŋ wunu kare me kwayo Obaŋa. Icennere notte wunu doki karacel, me kur Catan bitwu, pi mitwu a mom jukere.

⁶Akobo man kun aye ayea keken, ento mom amio acalo cik.

⁷Onwoŋo kono amito ni jo luŋ kono obedo bala an-ni; cite dano acel acel tye kede mottere okeme, ame Obaŋa omie, moroni tye i man, en ocele i mot apat.

⁸Baŋ jo a mom ru onyomere, kede baŋ mon a coggi oto, akobo aman, ni, bedo ber ka kono gin obedo bala an.

⁹Cite ka gin mom romo jukere kengi, myero gin nyomere, pien nyomere ber kato ico onyo dako ikanyo mit me kom.

¹⁰Baŋ jo a doŋ onyomere, acikogi ni dako kur kwer cware, (cite pe an aciko, Rwot gire en ociko)

¹¹dok ico daŋ kur kwer cege. Ka ce dako okwero, myero en doŋ mom dok ger ico ocele, onyo odwog baŋ cware.

¹²Baŋ jo ocele mere, an ikoma en akobbo, mom Rwot, ni, ka ce Akricitayo moro tye kede cege amom oye Yecu, ce en dako-nono ye medde bedo kede, en myero mom ryeme.

¹³Ka dako moro daŋ tye kede cware a mom oye Yecu, ce cware-nono ye medde bedo kede, dako-nu myero mom kwere.

¹⁴Pien ico a mom oye Yecu doko acil pi cege, dako a mom oye Yecu daŋ doko acil pi cware ame Akricitayo. Ka mom amannono, kono itinowu mom bedo acil, cite gin cil gigi.

¹⁵Aco ka ŋat a mom oye Yecu mito pokere kede awottere, wek pokere gire. I kop acalo mano Akricitayo ame ico onyo a dako mom tye diccoro iye, pien Obaŋa olwoŋowa ni obed wunu i kuc.

¹⁶Kara iŋeo niŋo, yin dako, ka ibino laro cwari? Onyo iŋeo niŋo, yin ico, ka ibino laro cegi?

¹⁷Doŋ myero dano acel acel lub kit kwo ame Rwot omie, kede en ame Obaŋa nwaŋ olwoŋe iye. Man en gin ame aciko i lwak jo oye Kricito luŋ.

¹⁸Tye ŋattoro ame onwoŋo doŋ olirre i kare ame olwoŋe? En kur yeny yo me dwoko kome bedo acalo dano a mom oliro. Tye ŋattoro ame onwoŋo mom olirre i kare ame olwoŋe? En kur yeny yo me lirre.

¹⁹Pien bedo ame ilirre kede bedo a mom ilirre mom konyo ginnoro; ento gwoko cik Obaŋa en ame konyo.

²⁰Dano acel acel bed gire i kite a rik etye kede i kare ame olwoŋe.

²¹Yin i kare ame olwoŋi rik ibedo opii? Ee ta, kur ipar. Cite ka itwero nwoŋo yo me wotte i opii, ti giri kede.

²²Ŋat ame olwoŋo me bedo i Kricito kun en opii, en dano ame Rwot ogonyo oko i opii. Amannono daŋ, ŋat ame onwoŋo loye kene, en odoko opii a Kricito.

²³Wun jo ame owilo kede wel; kur idok wunu opii a dano moro.

²⁴Omegona, dano acel acel myero bed i nyim Obaŋa i kite a ceŋ olwoŋe kede.

²⁵Kop a dok i kom jo a pe ru onyomere, mom anwoŋo cikkoro oya i baŋ Rwot, cite amio tamma iye acalo dano ame Obaŋa otimo kica, omio abedo ŋat a genne.

²⁶An atamo ni, pi can ame oridowa, bedo ber ka dano moro-ni obedo kite acalo etye kede.

²⁷Yin cegi tye? Kur item gonyo nyom. Yin cegi pe? Kur iyeny nyom.

²⁸Cite ka inyomo, mom itimo giri balloro. Daŋ ka nyako onyomere, mom otimo gire balloro. Cite jo a nyomere bino nwoŋo ayela me kwo man, amito ni kono akwanyo ayela-nono oko i komwu.

²⁹Omegona, gin akobo ene, kare doŋoridde oko; ya amanni jo a tye kede mon myero bed bala jo a pe i mon,

³⁰kede jo a kumo myero bed bala jo a mom akumo, jo a lelo bed bala jo a mom alelo, jo a wilo jami bed bala jo a mom i ginnoro,

³¹jo a tio kede jami me lobo man bed bala mom atic kede, pien lobo kite a tye kede-ni bino tum oko.

³²Amito ibed wunu aboŋo parroro. Dano a mom ru onyomo, yie paro kop a Rwot, kite a myero eyomoro kede yi Rwot.

³³Cite dano a doŋ onyomo paro kop me lobo, kite a myero eyomoro kede yi cege,

³⁴tammere popoka. Dako a mom onyomo, onyo nyako, daŋ paro kop a Rwot, me ebed acil i kome kede i cunye. Cite dako ame onyomo paro gire kop me lobo, kite a myero eyomoro kede yi cware.

³⁵Akobo man pi konyowu, mom me geŋowu, cite me wek jami wot kakare, cunywu daŋ bed i kom Rwot a mom ginnoro wao tamwu teŋe.

³⁶Ka lo moro tamo ni kit bedo mere i nyan ecikere kede mom tye atira, ka marrere dwon i kome, ber en tim kite a cunye omito, ka myero bed amannono. Balloro mom iye, wekgi onyomere gigi.

³⁷Ento ka ŋattoro cunye tek kun mom tye ginnoro a diye, a daŋ doŋ otyeko miye me gwoko nya-nu a mom onyomere, en nwoŋo otimo ber ka ce twero loyo tammere.

³⁸Ŋat onyomo nyan ame ecikere kede daŋ nwoŋo otimo ber, ento ŋat a mom onyomo nyan ame ecikere kede nwoŋo otimo ber meicel.

³⁹Cik geŋo dako ya ka cware pwod kwo, cite ka cware oto, en doŋ tye i kuc me nyomere i lo a yie mito, ame tye i akina jo a Rwot keken.

⁴⁰Cite dan-nu yie twero bedo yom ikato ka ce en obedo amannono; mano tamma, daŋ atamo ni atye i Cuny Obaŋa.