Read lango 1 Korinti 8 Bible Online

1 Korinti 8 - lango bible

1 Korinti 8

¹Kop a dok i kom riŋo ame oyalo kede cal jogi. Wan oŋeo ni, “Wan ducu otye kede ŋec.” Kodi ŋeccono mio jo yeyea, cite mar meddi jo teko.

²Dano a tamo ni eŋeo ginnoro, nwoŋo mom ŋeo ginnoro kit onwoŋo myero eŋe kede.

³Cite ka ŋattoro ŋeo Obaŋa, Obaŋa ŋec.

⁴Doŋ kop i kom camo cem ame oyalo kede cal jogi: wan oŋeo ni “cal jok mom ginnoro a tye i lobo,” dok ni, “Obaŋa moro mom tye kono ka en acel-li.”

⁵Kadi bed tye gigi mogo ame olwoŋo ni obaŋa i polo onyo i wi lobo, kite acalo tye obaŋa apapat apol kede rwode apol,

⁶cite wan otye ka Obaŋa acel, en Papo, ame jami luŋ ya i baŋe, ame wan obedo pire; dok daŋ tye Rwot acel itac, Yecu Kricito ame mio jami luŋ bedo tye, wan daŋ obedo tye pire.

⁷Kadi bed amanno, jo luŋ mom tye i ŋeccono. Jo mogo tye a doŋ ona i cal jogi aton tin; gin cemo a kun pwod otamo ni, “Man gin ame oyalo kede cal jok,” mio tam me yigi ame nyuttigi balgi a pwod goro baile oko.

⁸Cem mom bino miyo Obaŋa pwowa; wan mom obino bedo arac ka mom ocemo, daŋ mom obino bedo aber ka ocemo.

⁹Cite gwokere wunu, me twer itye wunu kede kur dok ginnoro a mio jo poto i bal.

¹⁰Pien ka dano moro ame tammere me yie a nyutte ballere pwod goro, oneni yin ame itye kede ŋec icem i ot jok, mom bino medde tekcuny me camo riŋo ame oyalo kede cal jogi?

¹¹Aco kono en dano agoro-ni en ominni a rik Kricito oto pire, en bino to pi ŋecci yin!

¹²Doŋ ka ibala kit man baŋ omegowu agoro, eka ite waŋo wunu tamgi me yigi a nyuttigi balgi ame pwod goro, nwoŋo ibalo wunu i kom Kricito.

¹³Doŋ ka cem mio ominna poto i bal, mom doŋ abino camo riŋo atwal-li, me kur ami ominna pot i bal.