Read lango 1 Korinti 9 Bible Online

1 Korinti 9 - lango bible

1 Korinti 9

¹An mom aloye kena? An mom akwena? Rik mom aneno Rwot Yecu? Wun mom ibedo wunu ticca i Rwot?

²Ka jo mogo mom oye ni an akwena, cite i tuŋ baŋwu an akwena, pien wun ikomwu ibedo wunu anyut me kwenana i Rwot.

³Mano pidona ka oroka.

⁴Wan mom otye i twer me nwoŋo cemwa kede mat?

⁵Mom otye i twer me weno i dako ame Akricitayo, bala okwena ocele, kede omego a Rwot, kede Kepa?

⁶Onyo wan i Baranaba keken a myero oti pi camwa kenwa?

⁷Ŋa a woto i mony, te culo ocara mere kene? Ŋa a pito poto olok, mom te camo nyige? Akwattene a mom mato cak a ya i kom lim ame ekwao?

⁸Onyo akobo man kun ajuro kite a dano keken? Cik daŋ mom okobo kite gin acellono?

⁹Pien i cik a Muca ocoo ni, “Kur itwe dog twon ka adino kal.” En-ni Obaŋa oparo pi twoni bo?

¹⁰Mom ca akobo koppono pirwa? Iyi ateni mere koppere rik ocoo pirwa, pien apur myero pur kun tye kede gen, ŋat a dino daŋ myero din kun tye kede gen me nwoŋo dulloro iye.

¹¹Ka wan doŋ ocoo koti me Cuny i yiwu, en-ni dok bedo kop adwoŋ adwoŋa ka wan okao jami mogo me kom a ya i baŋwu?

¹²Ka jo ocele tye i twerrono baŋwu, wan mom okatogi kede oko? Cite ba, wan mom giwa otio kede twerrono; wan giwa odio cunywa i kop luŋ me kur ori iciki me geŋo yo amut aber i kom Kricito.

¹³Mom iŋeo wunu ni, jo a tio i ot Obaŋa gin nwoŋo camgi ame oya i ot Obaŋa, dok jo a tic i kom keno me lam opokkigi gin ame oŋolo?

¹⁴I kite yo acellono, Rwot rik ociko ni, jo a rabo amut aber myero nwoŋ gin ame gin kwo kede pi amut aber.

¹⁵Cite an mom atio kede twerrono kadi acel. Daŋ mom acoo kop-pi ni kono itima wunu amannono. Pien an twara ata gira, kato ame ŋattoro mio wakerena bedo a yore mom.

¹⁶Ka arabo amut aber, mano gire mom gin a myero awakere iye, pien odia iye adia. Ka mom arabo amut aber, kite ame abino neno can kede!

¹⁷Ka atimo man i cunya kena, abino nwoŋo ocara, cite ka atimo a kun mom amito, nwoŋo a tye acobo tic ame omia.

¹⁸Kara an anwoŋo ŋo me ocarana? Ocarana en yomyic ame anwoŋo i rabo amut aber aboŋo miyo jo culo iye ginnoro, kun mom atio kede twer ame atye kede me nwoŋo konnyoro i baŋ jo ame arabbigi amut aber.

¹⁹Kadi bed an aloye kena i nyim jo luŋ, atyeko miye kena me bedo opii a jo luŋ, me anwoŋgi abup.

²⁰I tuŋ baŋ Ojudaya rik abedo acalo Ajudaya, me anwoŋ Ojudaya mogo; baŋ jo a tye i te cik a Muca abedo bala ŋat a tye i te cik, kadi bed an ikoma mom atye i te cik, me anwoŋ jo a tye i te cik.

²¹Baŋ jo a mom kede cik abedo acalo ŋat a mom i cik, kun an gira mom atye aboŋo cik Obaŋa, cite atye i te cik a Kricito.

²²1 tuŋ baŋ jo agoro adoko agoro, me anwoŋ jo agoro. Apotto kite a jo luŋ me alar jo mogo i yo ducu.

²³Mano atio pi amut aber, me an daŋ anwoŋ winyo moro a ya iye.

²⁴Mom iŋeo wunu ni, jo a pyem i ŋwec oŋweco ducu, cite dano acel keken en a nwoŋo mot? Wun daŋ ŋwec wunu i yore ame bino miyo inwoŋo wunu mot.

²⁵Dano acel acel a pyem i tuko gwokere kene i yo ducu. Mano gin otimo me onwoŋ tok kwogo aballe oko, wan otimo pi nwoŋo en a mom balle.

²⁶An gira aŋwec atira a mom acacapa acacap; ka adoŋo, mom adoŋo bala ŋat a apo adoŋŋere aapa.

²⁷Awuŋo koma, kun daŋ aloe bala opiina, me kur ka doŋ atyeko rabbi jo ocele kop, an dok ote kota oko.