Read lango 2 Korinti 1 Bible Online

2 Korinti 1 - lango bible

2 Korinti 1

¹Waraga man oya i baŋ Paulo ame en akwena a Kricito Yecu pi mit Obaŋa, kede baŋ ominwa Temoteo. Baŋ lwakjo oye Obaŋa a tye i Korinti, karacel kede jo Obaŋa luŋ a tye i lobo Akaya luŋ.

²Obaŋ Papawa kede Rwotwa Yecu Kricito miwu winyo kede kuc.

³Myero opwoo wunu Obaŋa Papa a Rwotwa Yecu Kricito, Papo ame akica, Obaŋa ame kweo cuny jo luŋ.

⁴En kweo cunywa i canwa ducu, me wan daŋ obed i twer me kweyo cuny jo a tye kede cannoro apapat, kun okweo cunygi i yo acellono ame Obaŋa kweo kede cunywa.

⁵Kit acalo can adwoŋ ame Kricito okanyo opoto i komwa daŋ, amannono daŋ pi Kricito wan daŋ okweo cunywa meicel.

⁶Ka ce wan oneno can, mano mio okweo cunywu, dok inwoŋo wunu larre; ka okweo cunywa, mannono daŋ mio okweo cunywu, ite nwoŋo wunu daŋ teko me kanyo kite can acel ame wan okanyo-ni.

⁷Wan otye i gen atek i kom Obaŋa pirwu; pien oŋeo ni, ka inywako wunu kite can a wan okanyo, amannono daŋ obino kweyo cunywu i kite a yam okweo kede cunywa.

⁸Omegowa, wan omito ni iniaŋ wunu i kom can a wan oneno i Acia; peko mere odiowa okato kare oko a mom dok kanyere, omio pe doŋ ote bedo kede gennoro me bedo kwo.

⁹Wan rik oŋeo ni doŋ otyeko ŋolliwa kop me to. Mano otimere me kur ojeŋere i komwa kenwa, cite ojeŋere i kom Obaŋa ame cero jo oto.

¹⁰En larowa i can me to arac a rom man, dok daŋ bino larowa; wan daŋ omoko genwa i kome ni bino larowa doki.

¹¹Myero inotte wunu kedwa i kwac, me jo apol pwo Obaŋa pirwa, pi gin aber ame otimo baŋwa pi kwac a jo apol.

¹²Gin a wan owakere iye ene: oŋeo i cunywa ateni ni wan okwo i wi lobo man, akato mere wan okwo kedwu, aboŋo balloro, kun yiwa ler i kite ame Obaŋa mito, pe pi ryeko a dano, cite pi kony ame Obaŋa omiowa.

¹³Wan ocoyiwu ka gin ame itwero wunu kwano kede niaŋ iye. Ageno ni ibino niaŋ wunu atut,

¹⁴kite acalo doŋ iniaŋ wunu anonok ni, i nino a Rwotwa Yecu ibino wakere wunu pirwa bala wan ame daŋ obino wakere pirwu.

¹⁵Rik aniaŋ man aber, omio rik ayiko ni koŋ age weno baŋwu, me inwoŋ wunu winyo iryo.

¹⁶Pien onwoŋo rik amito ni abe baŋwu i wotta i Makedonia, kede i dwogona i kuno, me ite konya wunu i wotta i Judaya.

¹⁷I kare ame ayiko amannono onwoŋo mom acacaba i koppa. Mom ayiko acalo dano moro ame koŋ ye, te dok kwero.

¹⁸Acalo Obaŋa genne, kop a yam wan okobbiwu mom okobo ote dok kwero.

¹⁹Pien Yecu Kricito Wot Obaŋa a rik wan i Cilvano kede Temoteo orabo pire baŋwu pe obedo ŋat ame ye eka te dok kwero, cite en doŋ omoko kop Obaŋa;

²⁰i en gin ame Obaŋa ociko ni etimo luŋ ocobere i kome. Mano en gin omio wan okobo Amen i Yecu Kricito pi miyo Obaŋa kwogo.

²¹Ŋat a miowa Ocuŋ atek karacel kedwu i Yecu Kricito, dok owirowa i moo, en Obaŋa.

²²En doŋ omwono anennere oko i komwa, dok omio Cuny mere i yiwa, me moko ni en bino miyowa ginnoro ducu ame en ociko.

²³Alwoŋo Obaŋa me bedo cadenna kun akobbiwu i cunya luŋ ni, gin omona bino i Korinti, pien onwoŋo amito timowu kica.

²⁴Mom ni wan otye i twer i kom iyeewu, cite wan otio kedwu karacel me ibed wunu ilelo, pien icuŋ wunu atek i kom iyee.