Read lango 2 Korinti 10 Bible Online

2 Korinti 10 - lango bible

2 Korinti 10

¹An Paulo ikoma abako doga baŋwu kun ajuro mwolo kede ber a Kricito, an ame amwolle ka atye i nyimwu, ento ager i komwu ka atye teŋe.

²Akwaowu ni ka abedo baŋwu, pe imia wunu abed kede kite gero kede tekcuny ame ageno ni atwero bedo kede i kom jo mogo ame tamo ni wan olubo kite me lobo man.

³Pien kadi bed wan otye i lobo, wan mom oromo giwa i jami Iweny me lobo.

⁴Jami lwenya wan oromo kede mom toŋi me lobo man, ento jami lweny me teko Obaŋa, ame turo cel okworwa.

⁵Wan oturo kede tam a pe atir, kede kite awaka luŋ ame otiŋere me pyem kede ŋecwa i kom Obaŋa; kun omako tam luŋ otero iyi opii, me bed i te loc a Kricito.

⁶Dok daŋ wan oyikere me keto can i kom jo luŋ a mom i winy, ka doŋ wun ityeko nyuto winywu.

⁷Nen wunu gin a tye i nyimwu. Ka dano moro tye kede gen pire kene ni en edano a Kricito, koŋ etam dok kene ni, acalo en edano a Kricito, wan daŋ amannono.

⁸Pien kadi bed awakere atetek pi twer ame Rwot amiowa, lewic mom bino maka; twerrono daŋ omiowa me konyowu i doŋo, mom me dwokowu cen.

⁹Kur dok anen ni atemo poyo komwu kede waragana.

¹⁰Pien jo tye akobo ni, “waraga na pek, dok gwa, ento koma ka atuno baŋgi goro, koppa daŋ ginnoro pe iye.”

¹¹Jo acalo mano myero tam kop man ni, kite a wan okobo kede i waraga ka otye teŋe obino daŋ timo amannono ka otye baŋwu.

¹²Wan mom otiŋere kenwa me kette i rwom acel i jo mogo i akina jo a maro dworre, onyo me porre kenwa kedgi. Kite a gin pimere kede kengi kengi i akinagi kengi, dok gin oporre kengi kengi kede gi-porregi kengi, jo-nono kara omiŋo.

¹³Ento wan mom obino wakere ame okato kare; obino gik i kan a rik Obaŋa opokkiwa, ame wun daŋ itye wunu iye-ni.

¹⁴Wan mom okato ka gikwa bala mom opokkiwa ituno baŋwu, pien waa rik ogeo bino naka baŋwu me rabo amut aber i kom Kricito.

¹⁵Wan mom owakere okato kare i kom tic a jo ocele en ololle iye; ento otye kede gen ni ka iyeewu doŋ omedde, ticwa bino medde atek i akinawu, kun lubo kan a yam opokk iwa.

¹⁶Mio ote rabo amut aber i lobo i ŋewu kuno, kun mom owakere pi tic ame jo otyeko timo i ka tic a ŋat ocele.

¹⁷“Ŋat a wakere myero wakere pi Rwot.”

¹⁸Pien mom ŋat a dworre kene en ame Obaŋa pwoo, ento dano ame Rwot dworo.