Read lango 2 Korinti 11 Bible Online

2 Korinti 11 - lango bible

2 Korinti 11

¹Kono idio wunu cunywu anonokkoro i koma i miŋona. Diu ba cunywu koŋ!

²Nyeko omaka pirwu i kite nyeko ame Obaŋa tye kede; pien icalo wunu nyako ame ayiko nyommere baŋ ico acel, kun ageno ni abino tere baŋ cware, en Kricito, kun en nyako acil ame apayi mere moro mom.

³Cite alworo ni, acalo twol rik obwolo Kawa kede ryeko mere, wun daŋ jo bino balo tamwu oko, mio ite weko wunu maro Kricito kede cunywu ducu kede mar acil.

⁴Pien ka ŋattoro obino baŋwu, te rabo Yecu ocele a pat i maca a wan orabbiwu, onyo omiowu cuny apat a yam mom igamo wunu, onyo amut aber apat a yam mom igamo wunu, mannono wun idio wunu giwu cunywu iye aber meicel.

⁵An i tamma, okwena adoŋo ame okato kare ca mom okata gira kadi acelloro.

⁶Onyo ca an mom adiro me kop, ento i ŋec mom tye amannono. Mano wan rik onyuttiwu kannaler, i yo ducu kede i kare ducu.

⁷Rik an atimo bal ka amwolle kena me ayiwu malo, kun arabbiwu amut aber oya i baŋ Obaŋa nono aboŋo culloro?

⁸Otwero kobo ni rik ayako lwak oye Kricito ocele pirwu, pien rik agamo lim i baŋgi pi ticca baŋwu.

⁹Dok daŋ ka rik atye baŋwu, ka can omaka, rik mom alolo ŋattoro, pien omego ame oya i Makedonia okella gin a mitte luŋ; rik agwokere, dok daŋ abino gwokere, me kur amiwu peko moro.

¹⁰Doŋ akobbiwu ni, acalo ateni a Kricito tye i cunya, mom obino geŋo wakerena i kop man i lobo Akaya luŋ.

¹¹Piŋo? Pi ni an mom amarowu bo? Obaŋa ŋeo ni amarowu.

¹²Gin ame an atio abino medde tiyo, me kur awek jo ca onwoŋ kare a gin amito me miyo nen ni gin orom aroma kedwa i tic a gin owakere iye-nu.

¹³Pien kodi jo-nu gin mom okwena ikome, gin otic me bwolo jo, kun gin olokere onen acalo okwena a Kricito.

¹⁴Kur ŋattoro bed i wur, pien anaka Catan ikome daŋ lokere te nen acalo amalaika ame caro piny.

¹⁵Man mom doŋgin a pire dwoŋ wok ka ce otic a Catan olokere gigi ote nen bala otic me kite atira; agikkigi bino bedo a rom aroma bala tic a gin otio.

¹⁶Koŋ akob doki, dano moro kur par ni an amiŋ; ce ka itamo wunu amanno, gama wunu doŋ acalo dano amiŋ, me an daŋ awakere gira anonok.

¹⁷(Gin ame akobbiwu-ni mom gin a Rwot omia ni akobi; akobo acalo dano amiŋ i gen man ame atye kede me wakere.

¹⁸Acalo bala jo apol wakere pi gin a dok i kwo me lobo man, an daŋ abino wakere.)

¹⁹Pien idio wunu cunywu kede lelo i kom jo amiŋ, kun wun jo aryek.

²⁰Idio wunu cunywu tek ŋattoro lokowu doko opii, onyo camowu, onyo buowu, onyo yon, onyo bapo lemwu.

²¹Lewic omaka kun aye ni wan rik mom obedo atek i yo-nono. Ento ginnoro keken ame dano moro otiŋere me wakere pire, an daŋ atiŋere me wakere amannono, ame pwod akobo acalo dano amiŋ.

²²Gin jo Eburania? An daŋ amannono. Gin jo Icrael? An daŋ amannono. Gin ikwae Iburaim? An daŋ amannono.

²³Gin otic a Kricito? An akop gira bala ajarapoa, an akatogi oko. Acanne i tic akatogi, ari i buc akatogi, opwoda akatogi, abwot to tyen apol.

²⁴Tyen abic Ojudaya opwoda del pyeradek wie aboŋwen.

²⁵Tyen adek opwoda kede abiro, Onapa kede gweŋe tyen acel, mel otur i koma tyen adek, tyen acel abuto ari i nam atut dyewor kede dyeceŋ benebene.

²⁶Ario i wot apol ame can twero poto i koma, can oya i kuli i, can oya i baŋ oyak, can oya i baŋ jona, can oya i baŋ Orok, can a nen i boma, can a nen i tim, can a poto i nam kede can i baŋ omego a mom gin omego me ateni.

²⁷Acanne i tic atek; tyen apol pe anino iwor. Ario kec kede oryo pii; tyen apol abedo aboŋo cam ame romma, dok abedo i piny aŋic aboŋo ginaruka.

²⁸Medde i kom gin ocele luŋ, tye gin a kella peko didik, en par ame atye kede pi lwak oye Kricito luŋ.

²⁹Tye ŋattoro agoro ame an mom awinyo goro i koma? Tye ŋattoro ame omio opoto i bal ame an cunya mom waŋ iye?

³⁰Ka ce myero awakere, abino wakere pi gin a nyuto gorona.

³¹Obaŋa Papa a Rwotwa Yecu Kricito, ame opwoo nakanaka, en ŋeo ni mom akobo goba.

³²Ka rik atye i Damaciko, aloc a tye i te abaka Areta okio bomanu me emaka,

³³cite rik ote cwaya piny kede dwoŋo kun akato i waŋ dirica i apama cel, eka ate bwot gira oko i ciŋe.