Read lango 2 Korinti 12 Bible Online

2 Korinti 12 - lango bible

2 Korinti 12

¹Myero an awakere; kadi bed mom konyo ginnoro, abino doŋ kop i kom anyut ame aneno kede gin a Rwot oyabba.

²An aŋeo dano moro i Kricito, aman doŋ okato mwaka apar wie aŋwen: dano-nu rik otiŋo malo anaka i polo me adek. (Kaca rik Obaŋa otiŋo kome an akwia, onyo ca omie leko aleka keken daŋ akwia, Obaŋa en a ŋeo.)

³Aŋeo ni dano-nu rik otiŋo malo anaka i Paradic. (Ka ce rik Obaŋa otiŋo kome, onyo ka ce omie oleko aleka an akwia, Obaŋa en a ŋeo.)

⁴Rik en te winyo ginnoro a mom kobere, a mom oye ni dano tuci.

⁵Kodi kop a dano acalo mano en abino wakere iye, ento pira kena mom abino wakere, kono ka pi gorona.

⁶Kadi bed bala an amito wakere, mom abino bedo amiŋo, pien nwoŋo akobo kop me ateni. Cite mom abino wakere, me ŋattoro kur par i koma akato ame en oneno i koma onyo ame owinyo i baŋa.

⁷Me kur alyerre ame okato kare pi lwak gin apol meicel ame oyabba, rik oguro okuto i koma, ame en akwena a Catan me pwoda kur alyerre ame okato kare.

⁸Pi man rik akwao iye Rwot tyen adek ni gin-nu myero ya oko i koma;

⁹en te gamo ni, “Winyo a ya i baŋa rommi giri, pien tekona bedo atek meicel kan ame goro tye iye.” En omio an awakere kede yomcuny adwoŋ pi gorona, me teko a Kricito te bedo i koma.

¹⁰Doŋ pi Kricito an cunya yom i kom gorona apapat, kede i kom ayet, kede i can, kede awuna, kede peko a rida; pien kan a an agoro iye, en kan a an atek iye.

¹¹Onwoŋo an amiŋ! Wun ame irua wunu iye, pien rik myero wun en idwora wunu. Okwena adoŋo ame okato kare ca mom okata kadi acel, kadi bed an mom a ginnoro.

¹²Gin ducu ame nyuto ni an akwe na ikome rik otimere i akinawu kede diyo cuny adwoŋ, anyuttogo, taŋo kede tic atek adoŋo.

¹³Kara ŋo a nwaŋ oremowu aka to lwak oye Kricito i kabedo ocele luŋ, ka onyo man keken ni an rik mom abedo nuyowu kede peko? Tima wunu ber ba, ka abalo pi koyowu kittono!

¹⁴Man doŋ tyen me adek ame ayikere me bino kede baŋwu, daŋ doŋ mom abino nuyowu kede peko. Pien an gira mom amito jamiwu, amito ka wun ikomwu. Otino mom myero kan mono pi onywalgi, ento onywal en a myero kan pi itino.

¹⁵An gira abino bedo ilelo adwoŋ meicel me miyo jami luŋ ame atye kede, anaka tek koma luŋ, me konyo kwo me tipowu, Wun ibino wunu mara atitidi, ni, pien amarowu atek?

¹⁶Aton ibino kobo wunu ni, “Ber doŋ, en ikome mom onuowa kede peko, cite en edwali, rik ote makowa kede goba.”

¹⁷Iyi akina jo a rik acwao baŋwu, ŋattoro obuo ginnoro i baŋwu pira?

¹⁸Rik akwao Tito ni myero wot, eka ate oro ominwa ocele karacel kede. Tito rik obin obuowu? Wan rik mom otio i cuny acel? Rik mom owopo yo acel keken?

¹⁹I kare man luŋ itamo wunu ni wan otye ka pido pirwa kenwa i nyimwu? Pe gire; otye ka kop i nyim Obaŋa i Kricito, Dok daŋ, wun ame amaro, okobo me konyowu i doŋo.

²⁰Pien alworo ni ka atuno kuno, atot onyo abino nwoŋo ipat wunu i kite ame an amito, dok wun daŋ onyo ibino nwoŋa wunu apat i kite ame imito wunu, Gwok onyo abino nwoŋo daa, nyeko, akemo, laro dito, ayet, anike, yeyea, arubaruba.

²¹Alworo daŋ ni ka adwogo baŋwu, Obaŋana bino miyo alee twoda i nyimwu, te miya kok pi jo apol i akina jo a rik obalo eka mom ote ŋut i kom timgi me caro, me coco kede me tarwaŋ.