Read lango 2 Korinti 2 Bible Online

2 Korinti 2 - lango bible

2 Korinti 2

¹Ento i tuŋ baŋa onwoŋo atamo ni dwogowa baŋwu kur kelliwu waŋcuny.

²Kara ka an awaŋo yiwu, ŋa a bino yomoro cunya? Mom en dano ame an awaŋe cunyenono?

³En gin omio rik acoo waraga-naca baŋwu, me ka abino, jo a myero yomoro cunya kur waŋ yia; pien an onwoŋo ageno wun luŋ kun aŋeo ni, yomcunya en yomcunywu wun luŋ.

⁴Rik acoyiwu waraga kun pig waŋa cwer adwoŋ meicel pi cwercuny kede kumo ame abedo kede, pe pi waŋo yiwu, cite me iŋe wunu mar adwoŋ ame atye kede i komwu.

⁵Ka ŋattoro okelo waŋyic, mom nwoŋo owaŋo yia kena, ento nwoŋo otemo waŋo yiwu luŋ, kun mom amito dok anukino wok.

⁶Kodi dano-nono, can apol ame Iwak nwoŋo oketo i kome twero romme;

⁷en omio myero itimme wunu kica, dok ikwe wunu cunye, me atot ya cwercunye adwoŋ okato kare kur nue oko.

⁸Man omio abako doga baŋwu, myero inyut wunu marwu baŋe.

⁹Man en kop omio rik acoo waraganaca, me temowu, wek anen ka iwinya wunu i yore ducu.

¹⁰Ŋattoro ame itimo wunu kica, an daŋ atimme kica. Pien ka atimo kica i ginnoro, atimo pirwu i nyim Kricito,

¹¹me Catan kur lowa kede ryeko mere, pien wan mom okwia tammere.

¹²A doŋ atuno i Teroa pi rabo amut aber i kom Kricito, rik anwoŋo oyabba yo;

¹³cite cunya pe opye, pien pe anwoŋo ominwa Tito kuno. Mano okela ciko jo kuno, ate kato i Makedonia.

¹⁴Myero opwou Obaŋa ame nino ducu telowa i dorre me nyuto loccere, dok tio kedwa me miyo Kricito ŋeye, acalo gin akur a ŋwece kuto i kabedo luŋ.

¹⁵Pien wan ocal i gin akur ame Kricito owaŋŋi Obaŋa, ame ŋwece kuto, ŋweye baŋ jo a tye i yo me larre kede jo a tye i yo me rwenyo odoco.

¹⁶Baŋ jo a tye arwenyo, ŋwccwa obedo gin oto a kela to; baŋ jo a tye a larre, ŋewcwa obedo gin akwo a kela kwo. Kara ŋa a twero tic man?

¹⁷Pien wan mom ocal i pol a jo, ame rubo kop Obaŋa kede kop ocele; ento wan orabo ka kop Obaŋa, orabo i Kricito ame cunywa ler i nyim Obaŋa, acalo jo ame Obaŋa ooro.