Read lango 2 Korinti 4 Bible Online

2 Korinti 4 - lango bible

2 Korinti 4

¹Pi mannono, wan ame oorowa i tic man pi kica Obaŋa cunywa mom dok adok cen.

²Wan doŋ odag kite ducu ame okano, kede me lewic; daŋ okwero tic me bwol oko kede dwanyo kop Obaŋa, ento pi kobo kop me ateni kannaler wan ogeno ni ŋec ame tye i cuny dano acel acel ame nyutte ballere bino pwoyowa.

³Ka ce amut aber a wan okelo owumere oko, nwoŋo owumere ka i baŋ jo a tye arwenyo odoco.

⁴Gin jo a mom ye-nono, obaŋa me lobo man doŋ owumo tamgi oko me gin kur nen lero me amut aber i kom kwogo a Kricito, ame en cal Obaŋa ikome.

⁵Wan mom orabo kop i komwa kenwa, cite i kom Yecu Kricito ame obedo Rwot, ame wan ikomwa wan omirowu pi Yecu.

⁶Pien Obaŋa a rik okobo ni, “Lero myero ryeny kun ya i colpiny”, en a doŋ oryeny i cunywa, omiowa lero me ŋeyo kwogo Obaŋa ame oryeny i waŋ Kricito.

⁷Cite wan jo ame otye kede lonyo man ocal i tabo ame ocweo i lobo, me nyuto ni teko adwoŋ me twer obedo me Obaŋa, mom ya i baŋwa.

⁸Odiowa tuŋŋi i tuŋŋi, cite pe oridowa ame okato kakare; tamwa ocuŋ oko, cite genwa pe oballe;

⁹owunowa cite mom owekowa ata; ocanyowa piny, mom daŋ oto-gu.

¹⁰Nino luŋ wan oyeo to a Yecu i komwa, me kwo a Yecu daŋ nen oko kannaler i komwa-ni.

¹¹Pien nino ducu wan ame okwo omiye me to pi Yecu, me kwo a Yecu nen oko kannaler i komwa ato-ni.

¹²Omio to tye atic i komwa, cite kwo tye atic i komwu.

¹³Wan otye i kit cuny acellono, me iyee a rik omio ocoo ni, “Aye, en omio ate kobo”; wan daŋ oye, omio otye okobo.

¹⁴Wan oŋeo ni ŋat ocero Rwotwa Yecu bino cero wan daŋ karacel i Yecu, kede kelowa i nyime wan kedwu.

¹⁵Pien mano ducu otimere pirwu, me ka kica Obaŋa omedde baŋ jo apol, gin daŋ omedde kede pwoc adwoŋ ame kelli Obaŋa kwogo.

¹⁶En gin omio cunywa mom dok adok cen. Kadi bed kwowa me oko tye aballe oko, cite kwo me yiwa tye aroc, adoko anyen didik.

¹⁷Pien awunawa yot, tye pi kare anonokkoro keken, daŋ tye ka yikkiwa kwogo apek a mom tum, ame dwoŋ atek akato;

¹⁸pien mom ociko waŋwa i kom gin a nen, cite i kom gin a mom nen. Gin ame nen tye pi kare anonokkoro keken, ento gin a mom nen perakino nakanaka.