Read lango 2 Korinti 5 Bible Online

2 Korinti 5 - lango bible

2 Korinti 5

¹Pien wan oŋeo ni ka komwa me lobo man oballe oko, a wan obedo iye acalo i kema-ni, wan otye kede gedo ocele ame Obaŋa bino miyowa, ot a mom ogero kede ciŋ, ot a tye doŋ atwal i wi polo.

²Iyi ateni mere wan otye ocucura i kema man, kun omito atek ni rukwa kede kabedowa ame ya i polo, me odok i kom man,

³me ka doŋ oruko, mom obino nwoŋowa otye onoro.

⁴Pien ka pwod otye i kema man, ocucura pi cwercuny ame onuowa; mom ni mano omito ni obed a pe orukere, cite omit-ti orwak kom anyen i wi man, me kwo te mwonyo gin ame to oko.

⁵Ŋat ame oyikowa pi kop man ikome en Obaŋa, daŋ en omiowa Cunye acalo gin a moko ni en bino cobo gin eciko.

⁶En omio nino luŋ odio giwa cunywa aber, kun daŋ oŋeo ni, ka wan otye i paco me komwa-nie, obedo bor kede Rwot,

⁷pien kwowa cuŋ i kom iyee, pe i neno piny.

⁸Wan odio cunywa giwa aber, kun otamo ni twara owot owek komwa oko, obed doŋ paco baŋ Rwot.

⁹Doŋ ka otye paco kan onyo kuno, oketo cunywa i bedo jo a yomoro yie.

¹⁰Pien wan luŋ myeroonen kannaler i nyim Kricito me ŋolliwa kop, me dano acel acel nwoŋ gin otike ame lubo kite a yam otio kun tye i kom, ka ber ka rac.

¹¹Doŋ acalo wan oŋeo ni Rwot myero alwora, wan otemo waya tam a jo, kun kitewa nen oko kannaler baŋ Obaŋa; daŋ ageno ni kitewa onen baŋwu daŋ, i ŋec a tye i cunywu ame nyuttiwu bal.

¹²Wan mom dok odworre kenwa, cite otye ka miyowu gin a myero iwakere wunu kede pirwa, me ibedu kede yo me gamo dog jo a wakere pi gin a nen i oko, mom pi kite a dano tye kede i cunye.

¹³Ka yam wan opoo oko, opoo giwa pi Obaŋa; ka wiwa tye atic aber, mano bino konyowu.

¹⁴Pien mar a Kricito diowa, pien wan doŋ oŋolo aman ni, ŋat acel oto pi jo luŋ; mano omio jo luŋ doŋ oto.

¹⁵En rik oto pi jo luŋ, me jo akwo kur medde bedo kede kwo pirgi kengi, cite gin bed kede kwo pi ŋat a rik oto te cer pirgi ca.

¹⁶En omio ya amanni, wan mom oŋeo dano moro i kite me lobo man; kadi rik wan oŋeo Kricito i kite me lobo, mom dok oŋee kittono.

¹⁷En omio ka ŋattoro tye i Kricito, en bedo gin ame oketo anyen; gin acon nwoŋo doŋ orwenyo oko, gin anyen doŋ olunyo kakare.

¹⁸Mano ducu obedo tic ame Obaŋa otio, ame rik odwoggowa kede baŋe pi Kricito, daŋ te miyowa tic me dwoggo jo baŋe;

¹⁹ni mano, i Kricito, Obaŋa onwoŋo rik tye adwoggo jo i lobo baŋe, kun mom okwano balgi i komgi, daŋ omiowa kop me kwena i kom kite ame en doŋ odwoggogi kede.

²⁰En omio wan odoko okwena, owaŋ Kricito; Obaŋa kwaowu kede dwonwa, wan daŋ obako dogwa baŋwu akaka Kricito ni, weku Obaŋa dwoggowu baŋe.

²¹Ŋat a rik mom ŋeo bal, Obaŋa oloko odoko abal pirwa, me wek pire wan odok jo a nywako kite Obaŋa a tye atira.