Read lango 2 Korinti 7 Bible Online

2 Korinti 7 - lango bible

2 Korinti 7

¹Wun ame amaro, cikere-nono rik ociko pirwa. Pi mannono, myero wan olonyere wunu kenwa i ginnoro luŋ ame lila komwa onyo cunywa, kun olworo wunu Obaŋa, wek odok wunu jo acil ikokome.

²Yabbiwa wunu cunywa; wan mom otimo ŋattoro rac, mom obalo ŋattoro, mom obuo ŋattoro pi mito lim.

³Mom akobo man me kop lowu, pien rik akobbiwu koŋ ni wun ilittiwa wunu meicel, me oto dok okwo karacel kedwu.

⁴Atye kede gen meicel i komwu; awakere daŋ atek pirwu. Cunya okwe aber, apoŋ kede yomcuny i canwa ducu.

⁵Anaka i kare a wan otuno i Makedonia mom onwoŋo weo moro. Can onwoŋo ogurowa tuŋŋi i tuŋŋi; daa i akina jo kede lworo iyi cunywa.

⁶Ento Obaŋa ame kweo cuny jo a can obwoo, okweo cunywa i bino a Tito.

⁷Mom pi bino mere keken, cite daŋ pi kite a wun ikweo wunu kede cunye. En okobbiwa mitwu atek me nena, waŋcuny ame itye wunu kede, kede kit ilaro wunu pira, te medo lelona ameda.

⁸Kadi bed waraga mera ca rik owaŋo yiwu, an mom aŋut pi coyo, kadi bed rik aŋut, pien aneno ni waraga ca owaŋo cunywu pi kare moro.

⁹Aman an yia yom, pe ni pien awaŋo yiwu, ento pien waŋcunywu omio iŋut wunu. Waŋcunywu-nono onwoŋo oya ibaŋ Obaŋa, me kur inwoŋ wunu cannoro pirwa.

¹⁰Pien waŋcuny ame Obaŋa mio kelo ŋut ame tero jo i larre, aboŋo weko podo moro; ento waŋcuny me lobo kela to.

¹¹Koŋ inen wunu kite ame Obaŋa otio kede waŋcunywu! Nen kite a doŋ iketo cunywu kede, kite a doŋ iketo wunu teko me nyuto ni ipe wunu i bal, kite akemowu, kite lworowu, kite mitwu atek me nena, kite ilaro wunu kede pira, kite iculo wunu kede kwor! I yo luŋ wun doŋ inyutte wunu oko kenwu ni mom itye wunu kede balloro i koppono.

¹²Omio kadi bed acoyiwu waraga, mom acoo pi ŋat otimo gin arac i kome, ento acoo me kit ame ilaro wunu kede pirwa nen oko kannaler baŋwu i nyim Obaŋa.

¹³Man en gin omio yiwa doŋ okwe. Medo i kom kwecunywa, rik olelo daŋ meicel pi yomcuny a Tito, pien wun luŋ ikonyo wunu kweyo yie.

¹⁴Kadi bed rik awakere i nyime pirwu, lewic mom omaka; ento kite a rik kop luŋ a wan obedo kobo baŋwu obedo me ateni, kite-nono wakerewa i nyim Tito obedo me ateni.

¹⁵Ka en poyo winywu wun luŋ, kede kite ame ijole wunu kede i lworo dok i myelkom, mar medde ameda i yie i komwu.

¹⁶An alelo, pien atye i gen adwoŋ i komwu i yore luŋ.