Read lango 2 Korinti 8 Bible Online

2 Korinti 8 - lango bible

2 Korinti 8

¹Omegowa, wan omito iŋe wunu pi cuny me kica ame oya ibaŋ Obaŋa ame onen baŋ Iwak jo oye Kricito luŋ a tye i Makedonia.

²Gin okanyo awunawuna ame otemogi kede atek, cite gin ame oya ilelo adwoŋ a gin obedo kede i dye twon can a rik odiogi ca, en lonyo adwoŋ me cuny a gin obedo kede me miyo mot.

³Pien atwero kobo atira ni gin rik omio gin ame gin oromo miyo, kede akato daŋ ame gin romo miyo, kun omio i mitgi gigi kengi.

⁴Gin okwaowa kun obako doggi ni otim ber, oye gin oribere kedwa i konyo jo Obaŋa.

⁵Rik gin otio ame okato genwa oko, pien gin okwoŋo miye kengi baŋ Obaŋa, eka pi mit Obaŋa gin te miye baŋwa daŋ.

⁶Wan ote cuko cuny Tito ni, kite acalo rik doŋ ecako kede tic man me kica i kinwu, myero daŋ doŋ ecob oko.

⁷Doŋ acalo wun iloo wunu jo i yore luŋ, i kom iyee, i kobo kop, i ŋec, i keto cunywu kede marwu i komwa, ber ilo wunu jo daŋ i tic man me kica.

⁸Man ame akobo mom obedo cik ame amio, ento anyuttiwu kite a jo ocele keto kede cunygi, me anen marwu ka mar me ateni.

⁹Pien iŋeo wunu cuny aber ame Rwotwa Yecu Kricito obedo kede; kadi rik en alonyo, ento pirwu odoko acan, me i cannere wun idok wunu olonyo.

¹⁰Man tamma ame amio i kop man: twero bedo ber kono ityeko wunu oko gin a rik igeo wunu i mwaka okato. Rik ibedo wunu me agege, mom i tic keken, ento i ye me tiyo tic daŋ.

¹¹Aman amito imedde wunu anyim i ticwu-naca, icob wunu oko. Bed wunu i mit me tyeko a rom aroma i en a rik igeo wunu kede, kun ikwanyo wunu i kom gin a tye baŋwu.

¹²Obaŋa gamo mot a dano tye kede, tekki mittere me miyo tye; mom paro gin a en pe kede.

¹³Mom akobo ni jo ocele bed aber, wunu can diwu, ento ni jo bed rorom.

¹⁴Kite ame aman wun itye wunu kede abup-pi, kony wunugi i kom cangi, me ka cennoro gin tye kede abup, gin daŋ konywu i kan orem i baŋwu, te doŋ bedo arorom;

¹⁵acalo rik ocoo ni. “Ŋat ocoko abup, moro mom odoŋŋe, ŋat ocoko aduno, moro mom orem.”

¹⁶Wan opwoo Obaŋa pien oketo i yi Tito mit adwoŋ a rom i megwa me konyowu.

¹⁷En mom ojolo ka kwacwa keken, cite cunye tye iye atek, omio en abino baŋwu pi mittere, kene.

¹⁸Wan oore karacel kede ominwa ca ame ŋeye meicel baŋ lwak oye Kricito luŋ pi kite a en rabo kede amut aber.

¹⁹Mom enno keken, ento Lwak oye Kricito luŋ rik daŋ oyere me wot karacel kedwa i tic man me kica ame wan otye ka tiyo pi miyo kwogo baŋ Rwot kede pi mitwa me miyo kony.

²⁰Wan otemo gwokere me kur ŋattoro nwoŋ balloro i kom kit a wan otic kede i kom mot man abup-pi.

²¹Tamwa en aye me timo gin aber, mom i nyim Obaŋa keken, ento naka i nyim jo daŋ.

²²Wan oorogi karacel kede ominwa a wan doŋ otemo kite pi kare alac, ote nwoŋo obedo ŋat a keto cunye i kom tic apol, ento aman dok keto cunye meicel kato a rik, pi gennere adwoŋ i komwu.

²³Aco Tito en awotta dok atic wadwa pirwu; omegowa ocele mere-nu gin oor a Lwak oye Kricito luŋ, dok gin jo a kelli Kricito kwogo.

²⁴Pi mannono, nyut wunu marwu i nyim Iwak oye Kricito luŋ, me gin nen ni wakerewa pirwu onwoŋo tye kakare.