Read lango Jo Galatia 2 Bible Online

Jo Galatia 2 - lango bible

Jo Galatia 2

¹Icennere ka mwaka apar wie aŋwen doŋ okato, dok ate wot i Jerucalem wan i Baranaba, kun daŋ atero Tito woto keda.

²Gin omio awoto kuno, pien Obaŋa onwoŋo onyutta ni myero awot; eka ate keto i nyimgi amut aber ame arabo baŋ Orok, i muŋ baŋ jo a ŋeye, ni kur ca ticca ame atiyo, onyo ame doŋ atyeko tiyo, bed me nono.

³Ento Tito a rik owoto kede mom oketo diccoro i kome me lirre, kadi bed en rik dano me Grik.

⁴Kadi bed onwoŋo tye jo mogo ame okelo iyi akinawa ame mom gin omego ikome, jo ame olibere aliba me roto kuc a wan otye kede i Kricito Yecu, kun omito kelowa i opii,

⁵cite pe tye kare moro ame wan oye gin olowa, me wek ateni me amut aber gwok kakare pirwu.

⁶I baŋ jo ame ŋeye ni gin jo adito (kite a rik gin tye kede mom okelo apokapoka moro baŋa; Obaŋa mom lenere baŋ ŋattoro pi kite a en tye kede) jo a neye-nono mom omedda ginnoro.

⁷Ento gin oniaŋ ni, Obaŋa omia tic me rabo amut aber baŋ Orok, acalo omio Petero[2] daŋ tic me rabo baŋ Ojudaya;

⁸pien ŋat ame otio ticcere i Petero i kwena mere baŋ Ojudaya, obedo ka tic i koma daŋ baŋ Orok.

⁹Yakobo kede Petero kede Lakana a rik gin oŋeye acalo pagi me dini, ka doŋ oniaŋ pi winyo ame Obaŋa omia, gin ogamo Baranaba kede an acalo otic wadgi. Ote mako ciŋa kun omoko ni, wan owot baŋ Orok, kede gin baŋ Ojudaya.

¹⁰Gin okwaowa keken me po pi ocan, ame man en tic onwoŋo pire litta meicel.

¹¹Ka rik Petero obino i Antiokia ajuke kannaler, pien onwoŋo timo gin a pe ber.

¹²Pien i kare a mom ru jo mogo obino ame oya i baŋ Yakobo, en rik cemo kede Orok; cite ka gin obino, en te weko oko, opokere kene pi lworo eryoŋet a jo a mito ni, jo oye Kricito myero koŋ lirre.

¹³Ojudaya ocele luŋ rik daŋ ote potto kite a Petero me gobaŋono: naka Baranaba daŋ te rwenyo pi kiregi-nono.

¹⁴Ento an ka aneno ni gin tye awot ogotogot iyi ateni me amut aber, ate kobbi Petero i nyimgi luŋ ni, “Ka yin ame yin Ajudaya iwopo kite Orok, mom kite Ojudaya, kara dok itwero diyo Orok niŋo me wopo kite Ojudaya?”

¹⁵Wan ikomwa ame wan Ojudaya iyi anywalli, mom Orok ame obalo,

¹⁶wan oŋeo ni, dano mom okwano ni kite atira pi cobo cik, kono ka pi ye Yecu Kricito. Anaka wan daŋ otyeko ye Kricito Yecu me kwanwa ni wan kitewa atira pi ye Kricito, mom pi cobo cik; pien mom obino kwano dano moro ni kite atir pi cobo cik.

¹⁷Acalo wan omito ni kwanwa ni kitewa atir pi Kricito, cite wan ikomwa dok onwoŋo oko ni wan obalo, Kricito doŋ obedo atic pi bal bo? Mom amanno gire!

¹⁸Ka an dok agero jami a yam koŋ areto, mom dok amoko kena ni an abalo?

¹⁹Pien pi cik an rik ato i tuŋ cik, me abed kwo i tuŋ baŋ Obaŋa.

²⁰An rik ogura i kom yataria karacel i Kricito; mom dok an en akwo-ni, ento Kricito ame bedo kwo i an. Kwo ame aman atye kede i koma-ni, abedo kwo pi ye Wot Obaŋa, a rik omara te miye gire kene pira.

²¹An pe abolo kica Obaŋa oko; pien ka kwano jo ni kitegi atir tye pi cik, to a Kricito doŋ konnyere mom.