Read lango Jo Galatia 3 Bible Online

Jo Galatia 3 - lango bible

Jo Galatia 3

¹Wun jo Galatia, ibedo wunu ababaŋ meicel! Ŋa kara ologoro wu, wun jo a rik ogoo cal a Yecu kom i nyimwu, kite ame ogure kede i kom yataria?

²Koŋ iwek apenywu i penynyi keken: rik inwoŋo wunu Cuny Acil pi cobo cik, ya nyo pi amut aber ame iwinyo wunu?

³Wun kara ibedo wunu ababaŋ aman! Rik igeo wunu kede Cuny, aman imito giko wunu kede kom?

⁴Kodi gin adoŋodoŋonono otimere baŋwu nono ka ce obedo nono iyi ateni.

⁵Ka Obaŋa miowu Cuny Acil, dok tio taŋo i akinawu, en timo pien wun icobo wunu cik, onyo pien iwinyo wunu amut aber ite ye wunu?

⁶Amannono rik ocoo ni, Iburaim “Oye Obaŋa, eka ote kwane ni kite atir.”

⁷Doŋ myero iŋe wunu nijo ame ojeŋere i kom iyee, jo-nono gin ikwae Iburaim.

⁸Anaka coc a yam ocoo rik oneno con ni, Obaŋa bino kwano Orok ni kitegi atir pi iyee. Rik te rabbi Iburaim amut aber con kun okobbe ni, “Rok luŋ aluŋa bino nwoŋo winyo piri.”

⁹Kitenono, jo ame tye kede iyee omiogi winyo karacel kede Iburaim a rik obedo kede iyee.

¹⁰Pien jo ducu ame ojeŋere i kom cobo cik gin tye i te cen; pien yam ocoo ni, “Cen omak jo luŋ ame mom lubo gin ducu ame ocoo i buk me cik, kun cobo.”

¹¹Aman doŋ ŋeye oko ni, mom okwano dano moro ni kite atir i nyim Obaŋa pi cobo cik; pien ocoo ni, “Ŋat ame kite atir pi iyee, bino bedo kwo.”

¹²Ento cik mom ocuŋ i kom iyee, pien ocoo ni, “Ŋat a cobo bino kwo pire,”

¹³Kricito rik doŋ olakorowa oko i kom cen ame cik okelo, kun olokere en ikome odoko ŋat oceno pirwa. Pien yam ocoo ni, “Cen obed i kom dano moro ducu ame oŋabo i kom yat.”

¹⁴Mano otimo me winyo ame Obaŋa omio Iburaim Orok daŋ nwoŋ, pi Kricito Yecu, me wek pi iyee miwa Cuny Acil a yam ociko pire.

¹⁵Omegowa, koŋ ati kede anen a dano. Ka jo aryo ocikere i ginnoro, eka ote moko cikeregi, ŋattoro mom dok romo loko onyo medo ginnoro i cikeregi.

¹⁶Cikere-ni Obaŋa rik omio baŋ Iburaim kede ikwae; cite coc acon mom okobo ni, “Kede baŋ ikwae,” ame nyuto ni gin pol, ento okobo ni, “Kede baŋ akwari,” ame nyuto dano acel keken, ame en Kricito.

¹⁷Gin ame akobbo tye aman: cik ame obino a doŋ mwakki mia aŋwen kede pyeradek doŋ okato, mom dok romo turo cikere a nwaŋ Obaŋa otyeko moko, onyo miyo gin a en ocikere iye to nono.

¹⁸Pien ka leyo gin ame omio Iburaim ocuŋ i cik, nwoŋo mom dok ocuŋ i cikere. Ento Obaŋa rik omio baŋ Iburaim i cikere gire, acalo mot.

¹⁹Piŋo dok cik mitte? Cik rik omedo me wek turo cik onen oko, tuno waŋ ame akwar Iburaim a rik oketo cikere pire otuno. Omalaika en a rik okelo cik, kun omio i ciŋ anot-jo.

²⁰Aco anot-jo pe mitte pi ŋat acel keken, ento Obaŋa kono tye acel.

²¹Cik dok pyem kede cikere Obaŋa bo? Pe gire amanno; pien kono rik omio cik ame twero miyo kwo, kono atika kwano dano ni kite atira obedo pi cik.

²²Ento coc a rik ocoo otweo jo luŋ acalo obuc i te twer me bal, me wek cikere a rik ociko pi iyee i kom Yecu Kricito mi baŋ jo oye.

²³Ame rik iyee pwod mom ru obino, cik onwoŋo kuro-wa kun otweowa acalo obuc, ituno wan ame onyuttiwa iyee.

²⁴Cik rik tye acalo apidi ame okurowa ituno waŋ ame Kricito obino, me ote kwanowa ni kitewa atira pi iyee.

²⁵A man a doŋ iyee tye-ni, wan mom dok obedo i te apidi a kurowa;

²⁶pien iyi Kricito Yecu wun luŋ aluŋa ibedo wunu itino Obaŋa pi iyee.

²⁷Wun jo ducu ame doŋ ibatija wunu i Kricito, ityeko wunu doŋ ruko Kricito acalo boŋo.

²⁸Apokapoka moro doŋ pe i kin Ajudaya kede dano me Grik, opii kede ŋat a loye kene, ico kede dako; pien wun ducu irom wunu aroma i Kricito Yecu.

²⁹Ka wun jo a Kricito, wun doŋ ikwae Iburaim; dok i te cikere Obaŋa, wun ole gin ame ociko baŋ Iburaim.