Read lango Jo Galatia 4 Bible Online

Jo Galatia 4 - lango bible

Jo Galatia 4

¹An akobo aman ni, ale lim ka pwod en atin bedo rom aroma kede opii, kadi bed en won jami ducu.

²En koŋ bedo i te loc ogwoke kede ogwok jami mere, tuno i kare a pappere ociko.

³Wan daŋ otye amanno; i kare a wan yam pwod otino, rik wan obedo opii a jogi acon a tye ka loc i wi podo.

⁴Ento ka kare ikome doŋ oromo, Obaŋa te oro Wode ame dako onywalo, kun onywalo i te cik,

⁵me wek lakoro jo a rik tye i te loc a cik, me wan daŋ lokwa odok itino me paco.

⁶Pien wun doŋ itino me paco, omio Obaŋa doŋ ocwao Cuny a Wode i yiwa, ame kok ni, “Aba! Pappa!”

⁷Kite-nono pi tic Obaŋa mom doŋ yin opii, ento atin me paco; daŋ ka yin doŋ atin paco, doŋ yin ale lim.

⁸I kare acon a mom ru iŋeo wunu Obaŋa, rik wun opii a gigi mogo a mom gin obaŋa ikomgi.

⁹Ento amanni doŋ iŋeo wunu Obaŋa, twara akobbi, Obaŋa doŋ neowu; itwero wunu dok cen niŋo baŋ jogi acon agoro, ame piny oloo? Piŋo dok imito wunu bedo opiigi tyen me aryo?

¹⁰Itye ka gwoko wunu nino, kede dwete, kede kare, eka kede mwakki!

¹¹Alworo atek, ticca ame alolle kede baŋwu kara opoto piny nono.

¹²Omegona, akwaowu, bed wunu bala an, pien an daŋ doŋ adoko bala wun. Rik mom itimo wunu ginnoro arac baŋa.

¹³Wun iŋeo wunu ni, lit koma en omio arabo amut aber baŋwu tyen me agege.

¹⁴Rik mom ibwona wunu, mom iŋula wunu, kadi lit koma ceŋ okelliwu abita adwoŋ; ento iluŋyo jola wunu acalo amalaika Obaŋa, dok acalo Kricito Yecu.

¹⁵Ŋo kara a dok oŋolle i yomcunywu? An acaden ame kobo ni, Ka kono rik twerre, kono ikolo waŋwu oko, ite miyo wunu baŋa.

¹⁶Adoko dok akworwu pi kobbiwu kop ateni?

¹⁷Jo-nu diye baŋwu nono, tamgi mom beco. Gin mito ka cegowu oko, me wun ite luŋyo diye wunu baŋgi.

¹⁸Diye pi gin aber, ber i kare luŋ, ento mom ka i kare ame an atye baŋwu keken.

¹⁹Itinona, an pwod dok atye akanyo rem kedwu acalo imat kanyo rem i kare me nywal, ituno ka ocweo Kricito i yiwu.

²⁰Onwoŋo ber atek kono atye baŋwu aman, me ate loko dwona i koppa kedwu, pien icuŋo wunu wia oko.

²¹Wun jo ame mito ni cik bwowu, koŋ ikobba wunu. Wun mom iwinyo wunu cik bo?

²²Pien ocoo ni, Iburaim rik tye awobe aryo, acel mea dako aŋeca, eka acel mea agoŋ.

²³Ento wot a dako aŋeca rik onywalo i kite me kom, aco wot agoŋ rik onywalo pi cikere a rik Obaŋa ociko.

²⁴Man akobo-ni obedo carokop. Mon aryo-ni nyuto cikere aryo. Ŋat acel oya i wi kidi me Cinai, itino ame onywalo obedo opii; dako-nu en Agar.

²⁵Agar-ri nyuto kidi Cinai, ame tye iyi Arabia; en rom aroma i Jerucalem me kare man, pien en tye i opii, karacel kede itino mere.

²⁶Ento Jerucalem ca ame tye i polo loye kene, en obedo totowa.

²⁷Pien yam ocoo ni, “Leli, yin oraŋa a mom nywal; mwoc i wer, ired i yomcuny, yin ame rem nywal mom ogudi; pien itino a dako oweko pol, kato mea dako a bedo kede cware.”

²⁸Omegona, wan ocalli Icaka, wan itino me cikere Obaŋa.

²⁹Ento acalo rik i kare-naca atin ame onywalo i kite me kom owuno en ame onywalo pi Cuny Obaŋa, aman daŋ tye amanno.

³⁰Ento coc a rik ocoo kobo niŋo ce? Ni, “Ryem aŋeca oko gin kede wode, pien wot a dako aŋeca mom bino leyo lim karacel gin i wot agoŋ.”

³¹Doŋ ba, omegona, wan mom itino a dako aŋeca, ento wan itino agoŋ.