Read lango Jo Galatia 5 Bible Online

Jo Galatia 5 - lango bible

Jo Galatia 5

¹Kricito doŋ ogonyowa oko i opii me obed jo me kuc. Cuŋ wunu doŋ atek; kur dok ilokere wunu irwak tyenwu i kol me opii.

²Winyu ba, an Paulo akobbiwu ni, ka olirowu, kony a Kricito doŋ mom baŋwu.

³Anwoo dok kobo odoco baŋ dano acel acel ame olirre ni, en doŋ tye kede banya me lubo cik luŋ.

⁴Wun jo a mito ni kwanwu ni kitewu atira pi cobo cik, doŋ ipokere wunu oko giwu kenwu ibaŋ Kricito, doŋ ijer wunu oko teŋe i kica Obaŋa.

⁵Pi Cuny Acil wan otye kede gen adwoŋ me nwoŋo kite atir ame omio pi iyee.

⁶Pien i Kricito, bedo ame olirre onyo a mom olirre pe konyo ginnoro; iyee keken en ame konyo, kun ticcere ya i mar.

⁷Rik iriŋo wunu ŋwec aber; ŋa kara a dok ogeŋowu i lubo kop me ateni?

⁸Bito jo acalo man mom oya i baŋ ŋat a rik olwoŋowu.

⁹Ka otedo ogati, tobi aduno romo yenyo moko luŋ.

¹⁰Atye kede gen atek i Rwot ni, tamwu mom bino pokere i mega; ento ŋat a tye ka balo tamwu oko, kadi bed en ŋa, Obaŋa bino ŋolle kop.

¹¹Ento an ba, omegona, ka pwod arabo kop ni lirre ber, piŋo pwod owuna? Kono arabo amannono, kono omio mom dok tye ginnoro i kop i kom yataria ame obedo acalo iciki a reto joo

¹²Kono jo ca tye ka rubo tamwu oko omedde anyim, oroye kengi gigi!

¹³Omegona, rik olwoŋowu me bedo i kuc; ento kur dok imi kucwu obed me cobo mitwu me anywalli. Akaka ennu, ŋat man myero miye i tiyi wadgi i mar.

¹⁴Pien cik weŋ aweŋa onotte ka i kop acel, ni, “Mar dano wadwu acalo imarre keni.”

¹⁵Ento ka ikaye wunu bala gwogi, kun itimo dano wadwu cucu, gwokere wunu me kur ityekere wunu kenwu kenwu.

¹⁶Ento an akobbiwu ni, mi Cuny Acil telwu, me kur icob wunu mit me kwowu me anywalli.

¹⁷Pien mit me kwo me anywalli pyem i mit a Cuny Acil, dok mit a Cuny Acil pyem i mit me kwo me anywalli. Gin aryo-ni gin omone, en omio mom itwero tiyo wunu gin ame imito wunu.

¹⁸Ento ka Cuny Acil tye ka telowu, mom dok itye wunu i te cik.

¹⁹Tic me kwo me anywalli nen oko kannaler; gin ene: coco, caro, tarwaŋ,

²⁰woro cal jogi, tim jojok, amone, daa, nyeko akemo, laro dito, pyem, popoka,

²¹to kom, mero, gat me yomcuny arac, kede mogo acalo ginnono. Akwenyorowu acalo rik koŋ akwenyorowu ni, jo ame timo gin acalo magu, loc Obaŋa mom bino doko megi.

²²Ento nyig ame onyak pi Cuny Acil en mar, yomcuny, kuc, diyo cuny, kica, ber, genne,

²³mwolo, gwokere ken; cikkoro mom ame kwero gin acalo magi.

²⁴Jo ame gin jo a Kricito Yecu doŋ otyeko neko kwogi me anywalli oko, karacel kede parrere kede mittere, kun oguro i kom yataria.

²⁵Ka wan obedo kwo pi Cuny Acil, myero daŋ owop yore.

²⁶Oweku wakere nono, kede nyuto tekowa i kom owotewa, kede bedo i nyeko i akinawa.