Read lango Jo Galatia 6 Bible Online

Jo Galatia 6 - lango bible

Jo Galatia 6

¹Omegona, ka omako dano moro i balloro, wun jo ame itye wunu i Cuny Acil myero idwoke wunu kakare i cuny me mwolo. Cik wani i komi keni, me yin daŋ kur biti.

²Myero ikonyere wunu kenwu i tino kodi peko-nono; en i kite-nono ibino cobo wunu cik a Kricito.

³Pien ka ŋattoro tamo i cunye kene ni en e ginnoro, kun iyi ateni mere en mom ginnoro, nwoŋo en abwolle gire kene.

⁴Dano acel acel koŋ ŋi ticcere kene ka ber, en a mio te kop me wakere mere bed pi ticcere ikome, a mom dok eporo i tic awottere.

⁵Pien dano acel tye i yeccere me ayea.

⁶Dano ame otye ka pwonyo kede kop i kom Kricito myero nywak jami mere abeco luŋ kede apwonnyere.

⁷Kur imi bwolwu; Obaŋa mom otuko kede. Gin ame dano ocoo, en daŋ bino kayo ginnono,

⁸ŋat ame ocoo koti mere i poto me kwo me anywalli, gin ame en bino kayo iye en to; ento ŋat ame ocoo mere i poto me Cuny Acil, bino kayo iye kwo a perakino odoco pi Cuny Acil.

⁹Myero wan mom ool i tiyo gin aber, pien ka kare oromo, ka mom odwoko cunywa cen, obino kayo kac.

¹⁰Doŋ ba, didik ka onwoŋo kare, myero oti tic aber baŋ jo luŋ, akato mere baŋ omegowa ame oye Kricito.

¹¹Nenu ba twoni nukuta adoŋo ame atye ka coyo kede ciŋa kena-ni!

¹²Jo a tye adiyowu ni myero ilirre wunu, gin jo a mito ni timgi nen aber i oko. Tamgi tye keken ni kur wungi pi yataria a Kricito.

¹³Pien kadi jo ame oliro mom mako cik, ento gin omito ni lirwu me gin owakere i gin ame otimere i komwu me oko.

¹⁴Cite an gira mom aye wakere pi ginnoro, kono ka pi yataria a Rwotwa Yecu Kricito, ame i tuŋ baŋa wi lobo luŋ doŋ ogur oko i kom yataria, dok an daŋ ogura iye i tuŋ baŋ lobo.

¹⁵Pien bedo ame olirre onyo a mom olirre kopporo gire mom; gin a pire dit en aye me bedo ginaketa anyen.

¹⁶Kuc kede kica bed i kom jo luŋ ame poro kwogi kede cik man, kede i kom jo Obaŋa luŋ.

¹⁷Ya amanni ŋattoro kur lola, pien atye kede poo i koma a nyuto ni an opii a Yecu.

¹⁸Winyo a Rwotwa Yecu Kricito bed kede cunywu, omegona. Amen.