Read lango Jo Epeco 2 Bible Online

Jo Epeco 2 - lango bible

Jo Epeco 2

¹Ikare okato rik ibedo wunu jo oto pi turo cikwu kede pi balwu;

²pien i kare-naca rik ipotto wunu yo areco me lobo man, kun iwinyo wunu ŋat a loo twerrogo a tye i dye yamo, ame en cuny ame aman tye atic iyi jo a kwero winyo dog Obaŋa.

³Wan luŋ daŋ rik orom aroma kedgi i lubo mit me komwa me anywalli, kun ocobo mit a komwa kede gin a wan otamo kenwa; omio i kite a yam wan otye kede, akemo Obaŋa onwoŋo myero pot i komwa bala jo ocele.

⁴Ento Obaŋa alonyo i kica mere, mar a en omarowa kede dwoŋ meicel,

⁵omio kadi bed wan odoko jo oto pi turo cikkere, en omiowa okwo karacel kede Kricito. Obaŋa olarowu pi kica mere.

⁶Wan jo a Kricito, en ocerowa karacel kede, eka te cibowa bedo karacel kede i polo.

⁷En otimo man ducu me wek enyut i kare luŋ a tye i nyim lonyo mere adwoŋ a mom pimere me kica ame onen i berrere baŋwa i Kricito Yecu.

⁸Pien pi kica mere omio en olarowa, pi iyee. Rik mom otimere pi ticwu; mannono mot Obaŋa gire.

⁹Mom otimere pi ticwu moro, me ŋattoro gire kur wakere iye.

¹⁰Wan obedo gin ame Obaŋa otio; en ocweowa i Kricito Yecu me obed jo a tio tic abeco ame en rik oyiko ni wan oti.

¹¹Koŋ mono ipo wunu kite ame ibedo wunu kede, wun ame ibedo wunu Orok i kite me anywalli, Ojudaya cwanowu ni, jo a mom oliro, kun gin olwoŋere kengi ni gin jo olirre, pi lirregi ame ciŋ dano otio i riŋo komgi.

¹²Aco i kare-naca onwoŋo itye wunu nono aboŋo Kricito, rik okoowu oko i kom jo Icrael, mom inywako wunu cikere Obaŋa kede gin a en ociko miyo. Rik ibedo wunu i lobo man aboŋo gennoro, kun Obaŋawu daŋ mom.

¹³Ento aman i Kricito Yecu, wun jo a rik itye wunu kannabor doŋ okelowu ceggi pi to a Kricito.

¹⁴En ikome okelo kuc i akinawa, omio wan kedwu odoko jo acel; en ojalo kome kene pi kwanyo amone iyi akinawa acalo bala omuko apama ca a yam pokowa.

¹⁵Pi kelo kuc omio en oweo cik a Muca oko, kede cikkere, kede icwillere luŋ, me wek eket wan jo aryo odok rok acel anyen ame oribere karacel i en.

¹⁶Pi to mere i kom yataria odwoggo wan aryo luŋ baŋ Obaŋa i kom acel, omio amone te gik oko.

¹⁷Rik en Kricito obino orabo amut aber me kuc baŋwu wun jo ame tye kannabor, kede baŋwa wan jo ame tye kan a ceggi.

¹⁸Pi Kricito wan luŋ, Ojudaya kede wun Orok, oyabbiwa yo i cuny acel me tuno baŋ Obaŋa Papo.

¹⁹Aman doŋ wun mom ibedo wunu orok onyo wele; wun doŋ pacowu acel kede jo Obaŋa, wun doŋ ibedo wunu jo ode.

²⁰Aman doŋ idoko wunu ot ame ogero, ame acakki me tere obedo okwena kede odwarpiny. Yecu Kricito ikome obedo kidi adwoŋ me gwiccere.

²¹Gedo man luŋ okubere karacel i Kricito, daŋ tye ka doŋo me doko ot Obaŋa acil i Rwot.

²²Wun daŋ otye ka gerowu karacel i kome, me ibed wunu kan ame Cuny Obaŋa bedo iye.