Read lango Jo Epeco 3 Bible Online

Jo Epeco 3 - lango bible

Jo Epeco 3

¹Pi kop man, akwao Obaŋa pirwu, an Paulo ame abedo abuc a Kricito pirwu wun Orok.

²Pien atamo ni ityeko winyo wunu kite ame Obaŋa omia abedo akanlim me kica mere i tuŋ baŋwu,

³dok daŋ kite ame oyabba kede muŋŋere, omia aŋeo, acalo doŋ atyeko coyo pire acecek.

⁴Ka ikwano wunu itwero neno wunu aber kite ame aniaŋ kede i muŋ a Kricito.

⁵I kare a doŋ okato rik mom onyuto muŋ man baŋ dano adana, ento aman Obaŋa doŋ onyuto baŋ okwena kede odwarpin-nyere acil pi Cunnyere.

⁶Muŋŋono en ene ni, pi amut aber, Orok doŋ odoko ole lonyo Obaŋa karacel kede Ojudaya, gin dul kom acel kedgi, gin daŋ onwoŋo karacel kedgi ginnoro luŋ ame Obaŋa ociko pire i Kricito Yecu.

⁷An oketa me bedo atic me amut aber pi mot me winyo Obaŋa ame omia pi tic me teko mere.

⁸Kadi bed an atidi meicel ame jo Obaŋa luŋ kata, cite en omia winyo man me rabo amut aber baŋ Orok, i kom lonyo a Kricito ame tato tere tek,

⁹dok me kelo yik me muŋ man oko kannaler baŋ jo luŋ. Onwoŋo Obaŋa ame ocweo jami luŋ okano pi runi apol ata,

¹⁰me wek amanni oti kede lwak jo oye Kricito me miyo oloc kede wegi twer luŋ a tye i polo ŋeyo ryeko Obaŋa a kwone pol meicel.

¹¹Man wapere kede tam Obaŋa anaka nwaŋ con, ame obin, ocobere i kom Yecu Kricito Rwotwa,

¹²ame pire wan jo ame oye en olimo tekcuny, oyabbiwa yo me tuno i nyim Obaŋa kede gen.

¹³En omio akwaowu ni, kur idwok wunu cunywu cen pi can ame owuna kede pirwu; can-ni gire okelliwu kwogo.

¹⁴Kop man en omio arumo coŋa i nyim Obaŋa Papo,

¹⁵en kan ame nyiŋ man me papo ocuŋ iye i doggola me wat luŋ a tye i polo kede a tye i lobo.

¹⁶Akwao ni pi lonyo mere me kwogo en myero mi Cunnyere rukkiwu teko kede twer adwoŋ i yiwu.

¹⁷Kricito daŋ bed i yiwu pi iyewu; Dok daŋ ni Obaŋa myero mi icuŋ wunu atek i mar acalo yat a lwite odonyo atut,

¹⁸me ibedu kede teko me niaŋ, karacel kede jo Obaŋa luŋ, kite ame mar a Kricito pirwa lac kede, bor kede, odoŋo kede malo, dok kit a tut kede,

¹⁹me iŋe wunu mar a Kricito ame loo ŋec ducu, wek ipoŋ wunu i ginnoro luŋ ame opoŋ iyi Obaŋa.

²⁰Kwogo gire obed baŋ Obaŋa a twero tiyo adwoŋ meicel a kato gin a wan otwero kwayo onyo keto i tamwa, pi teko mere a tye atic i komwa.

²¹Kwogo bed baŋe nakanaka i Kricito kede lwak jo oye en i akina jo luŋ me kare luŋ. Amen.