Read lango Jo Epeco 4 Bible Online

Jo Epeco 4 - lango bible

Jo Epeco 4

¹Pi mannono, an ame abedo abuc pi Rwot akwaowu ni ilub wunu kite kwo a myero i lwoŋo a rik olwoŋowu iye.

²Bedu jo a woro jo ocele, jo amwol, jo a kanyo ginnoro luŋ abalo cuny, kun ŋat acel acel dio cunye i kom awottere kede mar.

³Ket wunu teko i gwoko notte ame Cuny Acil omiowu me ibed wunu acel i kuc ame otweowu iye.

⁴Kom tye acel, Cuny Acil daŋ tye acel, kite acalo gen daŋ tye acel ame Obaŋa olwoŋowu iye.

⁵Rwot tye acel, iyee acel, batija acel.

⁶Obaŋa daŋ tye acel ame Papa a jo luŋ aluŋa. En loo jami luŋ, tio i gin duc, dok daŋ tye i gin duc.

⁷Ŋat acel acel i akinawa Kricito omio winyo, kun oporo kede mot a Kricito omie.

⁸En omio rik okobo ni, “Ka rik oyito malo, otero opii apol ame oyako i lweny, omio daŋ mot baŋ jo.”

⁹“Oyito malo” te koppere niŋo? Ni koŋ oyitto piny i lobo kan atut.

¹⁰Ŋat oyitto piny en acellono a dok oyito malo kannabor i ŋe polo ducu me epoŋ wi podo duc aduca.

¹¹Mot a en omio gin ene: omio jo mogo me bedo okwena, jo ocele me bedo odwarpiny, jo ocele orab amut aber, okwat kede opwony.

¹²Omiogi pi yiko jo Obaŋa i ticgi me konyo jo, dok pi doŋo kom Kricito,

¹³ituno ka wan ducu odoko acel i iyeewa kede i ŋeyo Wot Obaŋa ituno ka wan odoko jo ame ocwiny, ame odoŋo a rom i Kricito, en ame jami luŋ aluŋa opoŋ iye.

¹⁴Mio wan mom dok obedo calo itino ame pii otagere tatago yeegi, jo a weko yamo me pwony apapat wirogi tuŋŋi i tuŋŋi, ryeko a jo kede porgi me goba mom dok miogi ocacapa.

¹⁵Akaka mannono, myero okob wunu kop ateni kede mar, me omedde, odoŋu malo, ocob anaka i Kricito, ame en wiwa.

¹⁶Dul kom luŋ ojoye i kome, dok otudde karacel i waŋ nyoo ducu a tye iye. Ka dul acel tye atiyo ticcere kakare, mio kom doŋo, gerre aber i mar.

¹⁷En omio akobo kop man kun acikowu i Rwotwa ni, myero kur dok imedde timere wunu kite a jo a mom ŋeo Obaŋa timere kede i tamgi a konnyere mom.

¹⁸Tamgi doŋ ojebere oko, mom doŋ otwero niaŋ, kwo ame Obaŋa mio obedo gin a welo baŋgi pi kwiya piny ame obinnigi pi cuny ame odil oko.

¹⁹Gin mom doŋ oparo ginnoro, omio doŋ omiye kengi i tim me tarwaŋ, dok daŋ owor atek i tiyo kwone tim me caro caro luŋ aluŋa.

²⁰Ento mannono mom kite a rik opwonyowu kede kop i kom Kricito.

²¹Ka ce rik iwinyo wunu kop ikome ateni, dok daŋ opwonyowu i kop me ateni a tye i Yecu.

²²Kite kwowu me anywalli a rik ibedo wunu kede acon, aman doŋ wek wunu bedi; kodi kwonaca oballe oko pi mit areco ame obwolowu.

²³Wek Obaŋa doŋ roc tam me cunywu bed anyen,

²⁴ite ruko wunu dano anyen ame oketo i cal Obaŋa ikome iyi ateni me kite atir kede acil.

²⁵Pi mannono, wek wunu goba oko; dano acel acel myero kob kop me ateni baŋ dano wadgi, pien wan otye acalo dul kom owotewa.

²⁶Ka akemo omakowu, kur ipot wunu i bal; ceŋ mom myero luŋere kun pwod ituŋ wunu akemo,

²⁷daŋ kur imi wunu Catan kare.

²⁸Akwal jami a jo wek doŋ kwo bedi; ber en ti tic aber kede ciŋe, me enwoŋ gin epokki jo a megi pe.

²⁹Kopporo arac kur ya i dogwu; kob wunu ka kop abeco keken ame doŋo tam a jo acalo mitte, me jo a winyo nwoŋ iye kony.

³⁰Kur imi wunu daŋ Cuny Acil Obaŋa kumo, ame omiowu me bed calo anennere ame omwono i komwu pi kuro nino me lakorowu.

³¹Kite keccuny luŋ, waŋyic, akemo, redo i wi jo, ayet kede raccuny ducu myero doŋ mom i nen baŋwu.

³²Bed wunu jo okica i cuny aber, dano acel acel baŋ awottere. Timmere wunu kica kenwu kenwu i kom balwu, acalo Obaŋa otimowu kica i Kricito.