Read lango Jo Epeco 5 Bible Online

Jo Epeco 5 - lango bible

Jo Epeco 5

¹Potto wunu kite Obaŋa acalo itino mere ame emaro.

²Wap wunu yo me mar, acalo Kricito rik omarowa, te miye kene pirwa, me ebed mot me aŋola me yalo Obaŋa, a ŋwece kur.

³Cite tim me coco kede tim me caro caro ducu kede woro me lim myero kur lwoŋ nyiŋe i akinawu, mano en aber baŋ jo Obaŋa.

⁴Gin me lewic kede kop me miŋomiŋo, onyo arat a konnyere mom, myero mom winyere baŋwu. Akaka magi-nono, mi wunu pwoc baŋ Obaŋa.

⁵Niaŋ wunu aber ni mom tye ŋattoro i kin otim tim me coco, onyo me carocaro, onyo oworo me jami, ame bino nwoŋo dulloro ame bedo megi i loc a Kricito kede me Obaŋa, pien woro me jami rom aroma kede woro cal jogi.

⁶Kur imi wunu ŋattoro bwobwolowu kede koppogo a yore mom, pien akemo Obaŋa bino i kom jo a mom winyo doge pi kodi timmono.

⁷Pi mannono, kur inotte wunu kedgi.

⁸Rik kom irom wunu aroma i piny acol, ento aman doŋ idoko wunu dyeceŋ i Rwot; kitewu myero doŋ bed kite a jo me ceŋ.

⁹Pien nyig onyak pi ceŋ nen oko i gin ducu a tye aber, kede atir, kede me ateni.

¹⁰Dok daŋ tem wunu pwonyo gin a yomoro yi Rwot.

¹¹Ticcoro ducu me piny acol a mom nyak, kur inotte wunu iye, ento yab wunu kodi ticcono kannaler.

¹²Pien me lewic me bedo kobo ka akoba keken gin a gin tio i muŋ.

¹³Ginnoro-ni ame lero onyuto nen oko kannaler; pien gin a nen kannaler doŋ odoko gire lero oko.

¹⁴Man en gin omio okobo ni, “Co oko, yin ame inino, cer oko iyi akina a jo oto, eka Kricito te menyi.”

¹⁵Gwokere wunu aber i kite kwo ame ibedo wunu kede; kur iwap wunu jo a kwia piny, ento jo aryek.

¹⁶Caa onen i nyimwu ti wunu kede i yo aber, pien kare-ni kare arac.

¹⁷Pi mannono, kur ibed wunu amiŋ, cite tem wunu niaŋ gin a Rwot mito.

¹⁸Dok myero mom imer wunu kede koŋo, pien mano kelo kite me caro caro. Akaka mannono, ber iweku Cuny Acil Poŋ i yiwu,

¹⁹kun ikobo wunu i akinawu kenwu kede jabuli, kede wer, kede wer me cuny, kun iwero wunu, ikuto wunu wer me pako Rwot i yiwu.

²⁰Pwo wunu Obaŋa Papo i kare ducu pi jami ducu i nyiŋ Rwotwa Yecu Kricito.

²¹Miye wunu kenwu i te loc a jo ocele, ŋat man baŋ wadgi, pi lworo Kricito.

²²Wun mon miye wunu i te loc a cogwu, acalo imiye wunu baŋ Rwot,

²³pien ico obedo awi dako mere, acalo Kricito en awi lwak jo oye en, daŋ en alargi, gin daŋ obedo kome.

²⁴Acalo lwak jo oye en bedo i te loc a Kricito, amannono daŋ mon myero bed i te loc a coggi i yore luŋ.

²⁵Wun co daŋ mar wunu monwu i kite a Kricito omaro kede lwak jo oye en, te jalo kwo mere pire,

²⁶me wek elony bed acil, a doŋ otyeko lwoke kede pii kede kop ame okobo iye,

²⁷me ekel lwak oye en i nyime kene acalo nyako amwonya meicel, kun mom tye kannoro ojonne i kome, onyo oduduga, onyo ojojoŋa, ento bed acil aboŋo balloro i kome.

²⁸Amannono daŋ, co myero mar mongi acalo omaro komgi kengi. Ŋat a maro cege, maro kome kene.

²⁹Mom tye ŋattoro a dago kome kene, a mom pito dok gwoko aber acalo Kricito timo timo i kom lwak jo oye en,

³⁰pien wan odul kome.

³¹Coc a yam ocoo kobo ni, “Pi kop man, dano bino weko pappere kede tottere, eka te bino notte gin i cege, gin aryo te doko kom acel.”

³²Man en muŋ adit meicel. An i tuŋ baŋa agonyo i kom Kricito kede lwak jo oye en.

³³Cite wun, ŋat acel acel myero mar cege bala kome kene, dako daŋ nen ni eworo cware.