Read lango Jo Epeco 6 Bible Online

Jo Epeco 6 - lango bible

Jo Epeco 6

¹Wun itino, winy wunu onywalwu i Rwot, pien mano en aber.

²Coc a yam ocoo kobo ni, “Wor pappi kede totti,” man en cik me ageyi ame ociko iye pi ginnoro aber a bino ya iye, ni,

³“me ibed aber dok iperakino i lobo kare alac.”

⁴Aco wun papo, kur iteru itinowu i yo arac a kelligi akemo, ento miugi odoŋ aber kun ipwonyogi wunu dok inaogi wunu i kite abeco ame Rwot pwoo.

⁵Wun opii, winy wunu odoŋewu me lobo man i cunywu acel, acalo iwinyo wunu Kricito, kun ilworogi wunu i myelkom.

⁶Ticwu myero mom bed tic me yeŋo waŋ keken me yomoro ka cuny dano, ento ti wunu gin Obaŋa mito kede cunywu ducu, acalo opii a Kricito.

⁷Ti wunu ticwu i cuny aber, acalo itiyi wunu Rwot, mom acalo itiyi wunu jo,

⁸kun iŋeo wunu ni, ginnoro luŋ a dano moro otio aber, Rwot bino cule pire a rom aroma i ticcere-nono, kadi en opii onyo loye kene.

⁹Aco wun wegi opii, ti wunu kedgi kite acellono, wek wunu burogi bedi, kun ipoyo wunu ni, adwoŋ a loowu karacel kede gin tye i polo, daŋ tero jo ducu arorom.

¹⁰Me agikki mere, bed wunu atek i Rwot kede i twero me teko mere.

¹¹Ruk wunu jami romo ame Obaŋa mio, me icuŋ wunu, igeŋere wunu iyi erupe a Catan.

¹²Pien wan mom oromo i dano wadwa, ento oromo oloc kede wegi twer me oko, kede ginnogo a loo wi podo luŋ i kare man me colpiny, dok kede lwak cunnyogo areco a tye i dye polo.

¹³En omio myero igam wunu jami romo luŋ ame Obaŋa mio, me wek bin konywu i cuŋ atek i nino arac, pwod daŋ ibino cuŋ wunu a doŋ ilolle wunu i yo luŋ aluŋa.

¹⁴Pi mannono, myero icuŋ wunu ame ilido wunu pyerwu kede ateni; ruk wunu kite atir bed nyonyo geŋo korwu,

¹⁵kun yikerewu me rabo amut aber me kuc bedo acalo amuk me tyenwu.

¹⁶Akato luŋ, iyee myero bed kwotwu a twero miyowu neko mac i kom atero ame Arac obao.

¹⁷Gam wunu larre bed tok nyonyo me wic, kede kop Obaŋa ame en pala bat a Cuny Acil.

¹⁸Kwa wunu Obaŋa kun ibako wunu dogwu i kare luŋ i Cuny Acil. Bed ame iterre wunu i kare luŋ i diyo cuny, kun ikwao wunu pi jo Obaŋa luŋ aluŋa.

¹⁹Kwa wunu pira daŋ me Obaŋa yab doga, mia kop me akoba, me ayab muŋ me amut aber kede tekcuny.

²⁰An akwena mere a rom aroma i ŋat a cuŋ pi lobo mere, cite otwea oko kede jegere. Obaŋa mia arab kede tekcuny, kit a myero akob kede.

²¹ Tukiko, ominwa ame omaro dok atic a Rwot me agena, bino tittiwu kop i koma kede i kom ticca.

²²Acwae baŋwu pi kop man ikome, me wek en miwu iŋe wunu kite a wan otye kede, dok en ocuk cunywu.

²³Kuc kede mar kede iyee ame ya i baŋ Obaŋa Pa po kede Rwotwa Yecu Kricito bed baŋ omegowa.

²⁴Winyo Obaŋa bed baŋ jo luŋ aluŋa ame maro Rwotwa Yecu Kricito kede mar a mom to.