Read lango Jo Pilipi 1 Bible Online

Jo Pilipi 1 - lango bible

Jo Pilipi 1

¹Waraga man oya i baŋ Paulo kede Temoteo ame gin omiro a Kricito Yecu. Baŋ jo Obaŋa luŋ a tye i Kricito Yecu ame bedo i Pilipi, karacel otelgi kede okonygi.

²Obaŋa Papawa kede Rwotwa Yecu Kricito miwu winyo kede.

³Apwoo Obaŋana i kare luŋ ame atye ka poyo pirwu.

⁴I kwacca luŋ akwao pirwu ducu i yomcuny,

⁵pien cakere i nino me ageyi tuno atot onyoni, inotte wunu keda i tic me rabo amut aber.

⁶Aniaŋ aber ni, ŋat ame ogeo tic man aber i akinawu bino cobo kakare naka ituno i nino a Kricito Yecu.

⁷Oporre an iparo pirwu luŋ i kite-nono, pien ilitta wunu meicel, pien wun ducu inotte wunu karacel keda i winyo ame Obaŋa omia kan i buc kede dok kare ame alaro pi amut aber me mok atek.

⁸Obaŋa obedo cadenna ame ŋeo ni, parra atut pirwu ya i mar a Kricito Yecu ikome.

⁹Dok akwao Obaŋa ni mano, mar mewu myero doŋ medde ameda i ŋec ikokome kede niaŋ atut,

¹⁰me ipwoo wunu gin aber akato. Mio ibedo wunu ame yiwu ler aboŋo roccoro i komwu i nino a Kricito,

¹¹dok daŋ mio tic ducu abeco me kite atira bino nya i komwu pi Yecu Kricito, kun kelli Obaŋa kwogo kede pak.

¹²Omegona, amito iŋe wunu ni, gin ame otimere i koma okonyo atek me nyayo amut aber.

¹³Ocirikali a Kaicari luŋ, kede jo ocele ducu, aman oŋeo aber ni, an atye i buc pi Kricito.

¹⁴Dok omegowa apollere gengi omedde i kom Rwot pi bedona i buc, omio gin orabo kop Obaŋa kede tekcuny adwoŋ meicel, aboŋo lworo.

¹⁵Ateni, jo mogo rabo pi Kricito i nyeko kede daa, ento jo ocele mere rabo i cuny aber.

¹⁶Joni rabo pi mar, kun oŋeo ni, omia tic me romo pi amut aber.

¹⁷Jo ocele ca rabo nyiŋ Kricito pi laro dito kun yigi mom ler, tamgi tye me medda can i buc kan.

¹⁸Kopporo gire mom, an gira alelo alela, pien i yore luŋ, onyo i goba aŋar iyi ateni, otye ka rabo pi Kricito.

¹⁹Eyo, pwod dok abino lelo. Pien aŋeo aber ni, pi kwacwu kede pi kony ame ya i baŋ Cuny Acil a Yecu Kricito, bino miyo abwot oko.

²⁰Pien mitta kede genna adwoŋ tye ni, lewic mom bino maka i ginnoro, ento ni abino kelli Kricito kwogo i koma-ni kede tekcuny adwoŋ, i kare man acalo i kare luŋ, kadi akwo onyo ato.

²¹Pien i tuŋ baŋa, bedo kwo en Kricito, aco to mio anwoŋo agoba.

²²Ka abedo kwo i kom, ticca bino medde nya; cite mom aŋeo gin ame abino yero.

²³Kwanyo acel i kin aryo-ni ocuŋo wia oko. Mitta tye ni kono ato me abed wan i Kricito, pien mano en ame ber akato meicel.

²⁴Ento bedo kwo i kom mitte meicel pirwu.

²⁵An aniaŋ i man, omio doŋ aŋeo ni, pwod abino bedo, dok abino ri baŋwu ducu me imedde wunu anyim, ibed wunu kede yomcuny i iyeewu.

²⁶Mano bino miyo wakerewu pira i Kricito Yecu bino bedo adwoŋ meicel, ka dok adwogo baŋwu.

²⁷Gin a pire dit keken en ene ni, kite me kwowu myero rwatte kede gin ame amut aber i kom Kricito mito, me kadi abino ate nenowu, onyo abedo teŋe, awinyo kop i komwu, myero aŋe ni, icuŋ wunu atek i cuny acel kede tam acel, kun ilwenyo wunu karacel pi iyee ame bino pi amut aber.

²⁸Kur iweku okworwu pot cunywu i ginnoro ducu. Man en anyut a cimmigi kannaler ni gin obino rwenyo odoco, cite nyuttiwu ni obino larowu; mano gire ya i baŋ Obaŋa.

²⁹Pien en omiowu winyo pi Kricito, mom winyo me ye en keken, cite dok winyo me neno can pire.

³⁰Idonyo wunu i kit romo a rik ineno wunu i koma, dok daŋ aman iwinyo wunu ni pwod atye iye.